އެމެރިކާ އިން އަފްގާނިސްތާނާމެދު ގެންގުޅޭ ސިޔާސަތު ބަދަލު ކުރުމަށާއި އެހެންނޫން ނަމަ ތާރިޚީ ބޮޑު ލަދުވެތިކަމަކާ ކުރިމަތިލާން ޖެހިދާނެ ކަމުގެ އިންޒާރު ތާލިބާނުން، އަލަށް އެމެރިކާގެ ރައީސް ކަމާ ހަވާލުވެވަޑައިގެންފައިވާ ޑޮނަލްޑް ޓްރަމްޕަށް ދީފިއެވެ.

ތާލިބާން ޖަމާއަތުން ހިންގާ ވެބްސައިޓާއި، ސޯޝަލް މީޑިއާގައި ޝާއިއުކޮށްފައިވާ އެޖަމާއަތުގެ ލިޔުމެއްގައި އެމެރިކާގެ ޑޮނަލްޑް ޓްރަމްޕް ސިފަކޮށްފައިވަނީ އެމެރިކާގެ ރައްޔިތުންނަށާއި، ދުނިޔޭގެ އެކި ކަންކޮޅުތަކުގައި ތިބި އެތައް ބިލިއަން ރައްޔިތުންނަށް ކުރިމަތިވާނެ "ގޮތްނޭނގޭ" މީހެއްގެ ގޮތުގައެވެ. މީގެ އިތުރުން އެލިޔުމުގައި ވަނީ ތާލިބާނުން އުންމީދު ކުރަނީ ރައީސް ޓްރަމްޕާއި އަދި ކެބިނެޓުން ވޭތުވެދިޔަ ސަރުކާރުތަކުގެ ވެރިން ކަންކަން ކުރި ގޮތަށް ކަންކަން ނުކުރާނެ ކަމަށެވެ.

އަގްގާނިސްތާނުގައި ހަރަކާތްތެރިވާ އަލްގައިދާ ބާރުތައް ފުނޑުފުނޑުކޮށްލުމަށް އެމެރިކާ ސިފައިން އަފްގާނިސްތާނަށް އަރައިގެންފައިވަނީ 2001 ވަނަ އަހަރުގެ އޮކްޓޫބަރު މަހުގެ 7 ވަނަ ދުވަހުއެވެ. މީގެ އިތުރުން އެފަަހަރު އަލްގައިދާ އަށް ވާގިވެރިވަމުން ދިޔަ ތާލިބާން ސަރުކާރުވެސް އެމެރިކާއިން ވައްޓާލިއެވެ.

މިދިޔަ ހުކުރުދުވަހު އެމެރިކާގެ ރައީސްކަމާ ހަވާލުވެވަޑައި ގެންނެވި ޑޮނަލްޑް ޓްރަމްޕް، އޭނާގެ ސަރުކާރުން އަފްގާނިސްތާނާ މެދު ގެންގުޅޭނޭ ސިޔާސަތެއް އަދި ހާމަ ނުކުރައްވައެވެ.