ގައުމީ ޔުނިވާސިޓީގެ ސްޓޫޑެންޓް ޔޫނިއަންގެ ހިންގާ ކޮމެޓީއަށް ހޮވުނު ދަރިވަރުންނަށް މަގާމު ހަވާލުކޮށްފި
ގައުމީ ޔުނިވަރސިޓީގެ ޝަރަފްވެރިކަމުގެ އިނާމަކީ 2018 ވަނަ އަހަރު ތައާރަފް ކޮށްފައިވާ އިނާމެއް
އެމްއެންޔޫ އެސްޔޫގެ ހިންގާ ކޮމެޓީއަށް ހޮވުނު ދަރިވަރުންނަށް މަގާމު ހަވާލު ކުރުމުގެ ރަސްމިއްޔާތު
މޯލްޑިވްސް ނޭޝަނަލް ޔުނިވަރސިޓީ ސްޓޫޑެންޓް ޔޫނިއަން ހިންގާ ކޮމެޓީގެ ގޮފިތަކަށް ހޮވުނު ދަރިވަރުނަށް މަގާމު ހަވާލު ކޮށްފިއެވެ.
ގައުމީ ޔުނިވާސިޓީގައި ބުރާސްފަތި ދުވަހުގެ ރޭ ބޭއްވި ރަސްމިއްޔާތުގައި ޔުނިވާސިޓީގެ މާލޭގެ ކެމްޕަހުގެ ގޮފިތަކުގެ ހިންގާ ކޮމެޓީގެ ރައީސްގެ މަގާމަށް ހޮވުނު ދަރިވަރުންނަށް މަގާމު ހަވާލު ކޮށްދެއްވީ ޔުނިވާސިޓީގެ ވައިސް ޗާންސެލަރ ޑރ. އަލީ ފަވާޒެވެ.
ސްޓޫޑެންޓް ޔޫނިއަންގެ ނައިބު ރައީސް އިލްމީގެ މަގާމަށް ހޮވުނު ދަރިވަރުންނަށް މަގާމު ހަވާލުކޮށް ދެއްވީ ޔޫތު މިނިސްޓްރީގެ ސްޓޭޓް މިނިސްޓަރު އަދި މަޝްހޫރު ފުޓްބޯޅަ ކުޅުންތެރިޔާ އަސްއަދު އަލީ އެވެ. ހަޒާންދާރުގެ މަގާމަށް ހޮވިފައިވާ ދަރިވަރުންނަށް މަގާމު ހަވާލުކޮށް ދެއްވީ ގައުމީ ޔުނިވާސިޓީގެ ފެކަލްޓީ އޮފް އެޑިއުކޭޝަންގެ ޑީން މަރިޔަމް ފިޒާނާއެވެ. ސްޓޫޑެންޓް ޔޫނިއަންގެ ނައިބު ރައީސް އަމަލީގެ މަގާމަށް ހޮވިފައިވާ ދަރިވަރުންނަށް މަގާމު ހަވާލުކޮށް ދެއްވީ ޔުނިވާސިޓީގެ ކޮންޓްރޯލަރ އޮފް އެގްޒެމިނޭޝަންސް ފާތިމަތު ނާޒިޔާ އެވެ. އަދި މީޑިއާ ކޯޑިނޭޓަރުންނަށް މަގާމު ހަވާލުކޮށް ދެއްވީ ޔުނިވަރސިޓީގެ ޑީން އޮފް ރިސާރޗް ޑރ. ރަހީމާ އަބްދުއްރަހީމް ވެއެވެ.
ގައުމީ ޔުނިވަރސިޓީގެ ޝަރަފްވެރިކަމާއި، އިއްޒަތްތެރިކަމުުގެ ނިޝާންގެ ވެރިޔާގެ މަޤާމު ލިބުނު ފަރާތްތަކަށް ހަވާލު ކޮށްދެއްވާފައި ވަނީ ސްޓޫޑެންޓް ޔޫނިއަންގެ ރައީސް އަރުޝަދު އަޝްރަފެވެ. އެ ފަރާތްތަކަކީ އިބްރާހިމް މަފާޒް، މުހައްމަދު ޝިހާން، ހާލިދު މުހައްމަދު، އަލީ އަމީރު، ހުސެއިން މޫސާގެ އިތުރުން ހުސެއިން ފަޒީލް އަދި ހުސެއިން އަމީން އެވެ.
އެކި ރޮނގުތަކުން ގައުމީ ޔުނިވާސިޓީއަށް ދިގު މުއްދަތެއްގައި ޚިދުމަތްކޮށް ދެއްވާފައިވާ ފަރާތްތަކުގެ އަގުވަޒަންކުރުމަށްޓަކައި ގައުމީ ޔުނިވަރސިޓީގެ ޝަރަފްވެރިކަމުގެ އިނާމު ތައާރަފުކުރީ 2018 ވަނަ އަހަރު އެވެ.
