އެޑުކޭޝަން މިނިސްޓްރީން ހިންގާ ލައިފް ސްކިލް ޕްރޮގްރާމުގައި 624 ޓޗަރުން ތަމްރީނުކޮށްފި

ސްކޫލު ކުދިންނަށް ދިރިއުޅުނުގެ ހުނަރުތައް ދަސްކޮށްދިނުމަށް ހިންގާ ލައިފް ސްކިލްސް ޕްރޮގްރާމުގެ ދަށުން އެޑިއުކޭޝަން މިނިސްޓްރީން މިހާތަނަށް 624 ޓީޗަރުން ތަމްރީނު ކޮށްފައިވާ ކަމަށް އެ މިނިސްޓްރީން ބުނެފި އެވެ.

އެޑިއުކޭޝަން މިނިސްޓްރީ މިހެން ހާމަކޮށްފައިވާ އިރު މިހާރު ވެސް ސްކޫލުތަކުގެ ޓީޗަރުންނަށް އިސްވެރިންނަށް އަމާޒުކޮށް އެ މިނިސްޓްރީން ދަނީ ލައިފް ސްކިލް ޕްރޮގްރާމުތައް ހިންގަމުންނެވެ.

އެގޮތުން ހިންމަފުށީގައި ލައިފް ސްކިލްސް ނުވަތަ ދިރިއުޅުމުގެ ހުނަރުތައް ދަސްކޮށްދިނުމުގެ ތަމްރީނު ޕްރޮގްރާމްގައި ލައިފް ސްކިލްސް ފެސިލިޓޭޓަރުން ތަމްރީނު ކުރުމުގެ ދެ ޕްރޮގްރާމެއް އަދި ސްކޫލްތަކުގެ ޕްރިންސިޕަލުންނަށް ލައިފް ސްކިލްސްއާ ބެހޭ ގޮތުން އޮރިއެންޓޭޝަން ޕްރޮގްރާމެއް ވަނީ ކުރިއަށް ގެންގޮސްފަ އެވެ.

މި ޕްރޮގްރާމު ޚާއްސަކޮށްފައިވަނީ ލައިފް ސްކިލްސް ފްސިލިޓޭޓަރުން ތަމްރީނުވެފައި ނެތް ސްކޫލްތަކަށް އަމާޒުކޮށްގެން ކަމަށް އެޑިއުކޭޝަން މިނިސްޓްރީން ބުނެއެވެ.

މީގެ އިތުރުން އާބާދީ ބޮޑެތި ސްކޫލްތަކަށް އިތުރު ލައިފް ސްކިލްސް ފްސިލިޓޭޓަރުން ތަމްރީނުކުރުމަށްޓަކާ ފްސިލިޓޭޓަރުން ތަމްރީނު ކުރުމުގެ ފުރަތަމަ ބުރު މި މަހުގެ 19 އިން 27 އަށް ވަނީ ގެންގޮސްފަ އެވެ. އެފަހަރު މާލެ އާއި އަތޮޅުތެރޭގެ 22 ޓީޗަރަކު ބައިވެރިވެފައިވާ ކަމަށް އެޑިއުކޭޝަން މިނިސްޓްރީން ހާމަކުރެ އެވެ. އަދި ދެވަނަ ބުރު މި މަހުގެ 23 ން އަންނަ ފެބްރުއަރީ މަހުގެ 1 ގެ ނިޔަލަށް ކުރިއަށް ގެންދިޔުމަށް ހަމަޖެހިފައިވާ އިރު، މި ބުރުގައި މާލެ އާއި އަތޮޅުތެރޭގެ 18 ޓީޗަރަކު ބައިވެރިވެފައިވާ ކަމަށް އެޑިއުކޭޝަން މިނިސްޓްރީން ބުނެ އެވެ.

ސްކޫލްތަކުގެ ޕްރިންސިޕަލުންނަށް ދިރިއުޅުމުގެ ހުނަރުތަކާއި ބެހޭ މައުލޫމާތު ދިނުމަށް މި މަހުގެ 28 ން 30 ގެ ނިޔަލަށް އޮރިއެންޓޭޝަން ޕްރޮގްރާމެއް ކުރިއަށްގެންގޮސްފައިވާ އިރު ގއ.، ގދ.، ލ.، އަދި ދ. އަތޮޅުން 23 ޕަރިންސިޕަލަކު ބައިވެރިވެފަ ވެއެވެ.

ދިރިއުޅުމުގެ ހުނަރުތައް ދަސްކޮށްދިނުމަށް ސްކޫލްތަކުން ތަމްރީނުވާ ޓީޗަރުން ސްކޫލްގައި މަސައްކަތްކުރާ އެހެން ޓީޗަރުންނަށާއި ބެލެނިވެރިންނަށް މި ޕްރޮގްރާމް ހިންގާ ގޮތަށް ވަނީ ހަމަޖެހިފަ އެވެ.

ދިރިއުޅުމުގެ ހުނަރަކީ ސްކޫލްތަކުގެ މެންޑޭޓުގައި ހިމަނައިގެން ސްކޫލް ދައުރު ނިމުމުގެ ކުރިން ކޮންމެ ދަރިވަރަކަށް ވެސް އެނގެންޖެހޭ ކަމަކަށް ވާ އިރު، އެޑިއުކޭޝަން މިނިސްޓްރީގެ އަމާޒަކީ މި އަހަރުގެ ފުރަތަމަ ޓާމް ގެ ކިޔެވުން ނިމުމުގެ ކުރިން ލައިފް ސްކިލްސް ފްސިލިޓޭޓަރުން ތަމްރީނު ކުރުމުގެ އިތުރު ހަތަރު ތަމްރީނު ޕްރޮގްރާމެއް ކުރިއަށް ގެންދިއުން ވަނީ ހަމަޖެހިފަ އެވެ.

ސްކޫލުތަކުގެ ޕްރިންސިޕަލުންނަށް ޚާއްސަކޮށް ހަަތަރު ލައިފް ސްކިލްސް އޮރިއެންޓޭޝަން ޕްރޮގްރާމެއް ކުރިއަށް ގެންދިޔުން ހަމަޖެހިފައިވާ ކަމަށް އެޑިއުކޭޝަން މިނިސްޓްރީން ބުނެ އެވެ.