ރައީސް ސޯލިހާއި، ރައީސް މައުމޫން ބައްދަލުކުރައްވައިފި، ކޯލިޝަންގެ ކުުރިމަގާއި ގުޅޭގޮތުން މަޝްވަރާކުރެއްވި!
މަޝްވަރާ ކުރެއްވިި ހުރިހާ ކަމެއްގައި ދެބޭފުޅުންނަށް އެއްބަސްވެވިފައިވާ ކަމަށް މައުމޫން ވިދާޅުވި
ރައީސް މައުމޫނާއި، ރައީސް އިބްރާހިމް މުހައްމަދު ސޯލިހް
ރައީސް އިބްރާހިމް މުހައްމަދު ސޯލިހާއި، ކުރީގެ ރައީސް މައުމޫން އަބްދުލްޤައްޔޫމާއި ބައްދަލުކުރައްވައި، މަޝްވަރާތައް ކުރައްވައިފި އެވެ.
ބައްދަލުކުރެއްވުމަށް ފަހު ރައީސް މައުމޫން، ކުރެއްވި ޓުވީޓެއްގައި ވިދާޅުވީ ސަރުކާރު ހިންގާ ކޯލިޝަންގެ ގުޅުން އިތުރަށް ހަރުދަނާކުރައްވާ، އެ ގުޅުން ދަމަހައްޓަވާނެކަމުގެ ޔަޤީންކަން ރައީސް ސޯލިހް ދެއްވި ކަމަށެވެ. އަދި މަޝްވަރާ ކުރެވުނު ހުރިހާކަމެއްގައި ދެ ބޭފުޅުންނަށް އެއްބަސްވުމަކަށް އާދެވިފައިވާ ކަމަށާއި، އެކަމާއި ވަރަށް އުފަލުން ހުންނެވި ކަމަށް ރައީސް މައުމޫން ވިދާޅުވި އެވެ.
ނަމަވެސް މަޝްވަރާކުރެވުނު އިތުރު ކަންކަމެއް ރައީސް މައުމޫންގެ ޓުވީޓްގައި ހާމަކުރައްވާފައެއް ނުވެއެވެ.
ކޯލިޝަންގެ ކުރިމަގާއި ގުޅޭގޮތުން ރައީސް މައުމޫނާއި، ރައީސް ސޯލިހް މަޝްވަރާ ކުރެއްވިއިރު، ކޯލިޝަންގެ މެދުގައި ވަނީ ބޮޑެތި ހިޔާލު ތަފާތުވުންތަކެއް އުފެދިފައެވެ. އެގޮތުން އެމްޑީޕީ އާއި ޖުމްހޫރީ ޕާޓީ އާއި ދެމެދު ބަހުގެ ހޫނު ހަމަލާތަކެއް އަމާޒު ކުރަމުންގެންދާއިރު، ނިމުނު މަޖިލީސް އިންތިހާބުގައި ޕާޓީތަކުން ވާދަކޮށްފައި ވަނީ ވަކިވަކިންނެވެ.
އެ އިންތިހާބުގައި އެމްޑީޕީން ބޮޑު ކާމިޔާބީއަކާއެކު، 65 ގޮނޑި ކާމިޔާބުކުރިއިރު، ވިޔަފާރިވެރިޔާ ޤާސިމް އިބްރާހިމަށް އިންތިހާބުގައި ލިބިފައިވަނީ އެންމެ ފަސް ގޮނޑި އެވެ. ރައީސް މައުމޫންގެ ތާއީދާއެކު ވާދަކުރެއްވި ބޭފުޅުންގެ ތެރެއިން އިންތިހާބު ކާމިޔާބުކުރެވުނީ ދެ ކެނޑިޑޭޓަކަށެވެ.
