ހިނގާ މީހުންނަށް ތަން ދިނުމަށް ޒިބުރާކުރޮސް ކައިރިއަށް 80 އިންސައްތަ އުޅަނދު މަޑުކުރޭ: ސްޓޭޝަން އިންސްޕެކްޓަރ
11 އެޕްރީލު 2019 | ބުރާސްފަތި 16:46މަގަކީ އެންމެންގެވެސް ހައްގު އެކުލެވިގެންވާ ތަނެއް
އެކްސިޑެންޓެއް ހިނގާފައިވާ ސަރަހައްދެއް
ހިނގާ މީހުންނަށް ތަން ދިނުމަށް ޒިބުރާކުރޮސް ކައިރިއަށް 80 އިންސައްތަ އުޅަނދު މަޑުކުރާ ކަމަށް ސްޓޭޝަން އިންސްޕެކްޓާރ އޮފް ޕޮލިސް މުހައްމަދު ވަހީދު ވިދާޅު ވެއްޖެއެވެ.
ރާއްޓީވީގެ ޚަބަރުފީތާ ޕްރޮގްރާމްގައި ވާހަކަ ދައްކަވަމުން މުހައްމަދު ވަޙީދު ވިދާޅުވި ޒިބުރާ ކުރޮސްތަކަށް ޚާއްސަ ސަމާލުކަމެއް ދީގެން އެއް މަސްދުވަހުގެ މުއްދަތަށް ކުރިއަށް ގެންދިޔަ ޕްރޮގްރާމުގައި ކޮންމެ ދުވަހަކު ވެސް އެންމެ ބާރު ބޮޑު ގަޑީގައި ޒިބުރާ ކުރޮސްތަކަށް ޚާއްސަ ސަމާލުކަމެއް ދީގެން އެތަނުގައި ޒިބުރާ ކުރޮސްމަތިން ހުރަސްކުރާ މީހުންނަށް ވެހިކަލްތައް މަޑު ކުރަން ޖެހޭ ކަމަށް ވެހިކަލް ދުއްވާ މީހުންނަށް އަންގައިދީ އަދި ހިނގާ ބިނގާ ވާ މީހުންނަށް ވެސް ވެހިކަލް ތަކަށް ޖާގަ ދީގެން ހުރަސް ކުރަންޖެހޭނެކަން އަންގައިދީގެން އެތަނުގައި ޓްރެފިކް ފުލުހުން ތިބެގެން މަސައްކަތްތަކެއް ކޮށްފައި ވާނެކަމަށެވެ.
" ނަތީޖާއަކީ މިއަދު ދުއްވާ އުޅަނދުގެ 80 އިންސައްތަ މީހުން ޒިބުރާ ކޮރޮސް ހުރަސް ކުރާ މީހާއަށް މަޑުކުރޭ. އަދި ކުރިއަށް ވުރެ ބޮޑަށް މަގުމަތީގެ ގަވާއިދުތަކަށް މީހުން ހުރުމަތްތެރިކޮން ހިތާކަން ފާހަގަ ކުރެވިފައިވޭ" ވަހީދު ވިދާޅުވިއެވެ.
މީގެ އިތުރުން ވެސް މަގުމަތީގެ އެކްސިޑެންޓްތައް ހިނގުމަށް މެދުވެރިވާ މައިގަނޑު އެއްސަބަބާއި ބެހޭގޮތުން މި ޕްރޮގްރާމްގައި ވާހަކަ ދައްކަވަމުން ޗީފް ސްޓޭޝަން އިންސްޕެކްޓަރ އޮފް ޕޮލިސް މުހައްމަދު ހަސަން ވިދާޅުވީ ދުއްވާފައިދާ ޒުވާން ކުއްޖާއަށް މަގުމައްޗަކީ އެފަރާތްތަކުގެ އަމިއްލަ އެއްޗެއްގެ ގޮތަށް ހީކުރެވޭ ފަހަރު އަންނަ ކަމަށާއި އެކަމަކު އެއީ ގޯހެއް ކަމަށެވެ.
މަގުމައްޗަކީ އެންމެންގެ ތަނެއްކަން ފާހަގަ ކުރައްވާ އިންސްޕެކްޓަރ ހަސަން ވިދާޅުވީ މަގަކީ އެންމެންގެ ވެސް ހައްގު އެކުލެވިގެންވާ ތަނެއް ކަމަށާއި އެމަގުގެ ބޭނުން އުމުރުން ދުވަސް ވީ މީހުންނާއި ކުޑަކުދިންނާއި ޚާއްސައެހީއަށް ބޭނުންވާ މީހުންނާއި މިފަދަ އެތައްބަޔަކު ކުރާ ކަމަށެވެ.
އަދި އެކްސިޑެންޓްތައް ހިނގާ މިންވަރު މަދުކުރެވޭނީ އަމިއްލަ ފަރުދީ ޒިންމާ ވެސް އަދާކޮށްގެން ކަމަށް އޭނާ ވިދާޅުވިއެވެ
" އަޅުގަނޑުމެން މިހާރު ގަވާއިދާއި ޚިލާފަށް ދުއްވާ އެއްޗިހި ހުއްޓުވާ ނަސޭހަތް ދެމުން މިދަނީ އެފަދަ ކުއްތައް ތަކުރާރު ނުކުރުމަށް. އަދި ތަކުރާރު ކުރާ ފަރާތްތަކާއި މެދު އަޅަންޖެހޭ ފިޔަވަޅުތަކެއް އަޅާނަން. ފުލުހުން އެއްވެސް ވަރަކަށް ބޭނުން ނުވާނެ ފިޔަވަޅު އަޅާކަށް. ފުލުހުންނަކީ މަގު ދައްކާބައެއް. އަދި މޯލްޑިވްސް ޕޮލިސް ސާރވިސްގެ އެންމެ މަތީ ފަންތިން ފެށިގެން އެންމެ އާދައިގެ މީހާވެސް މަސައްކަތް ކުރަމުން ދަނީ މަގުމައްޗަކީ އެންމެންނަށް އަމާން ރައްކާތެރިތަނަކަށް ހެދުމަށްޓަކައި" އިންސްޕެކްޓަރ ހަސަން ވިދާޅުވިއެވެ
ހުސްވި މާރިޗު މަހު އެކަނި ވެސް މަގުމަތީ53 އެކްސިޑެންޓް ހިނގާފައިވާއިރު ސިނަމާލެ ބްރިޖްގައި ހިނގާ އެކްސިޑެންޓްތައް ގިނަވުމުގެ ސަބަބުން ޓްރާންސްޕޯޓް މިނިސްޓްރީން ވަނީ މާޗް މަހުގެ 10 ވަނަ ދުވަހުން ފެށިގެން ހެލްމެޓް އަޅައިގެން ދަތުރުކުރުމަށް މަޖުބޫރު ކޮށްފައެވެ. އަދި ހެލްމެޓް ނާޅާ ފަރާތްތަކާ މެދު ޤާނޫނީ ފިޔަވަޅު އަޅާނެ ކަމަށް ވެސް އެ މިނިސްޓްރީން ވަނީ ބުނެފައެވެ.
