މަޖިލިސް އިންތިޙާބުގައި އެމްޑީޕީއަށް ލިބުނު ކާމިޔާބީ ފާހަގަކުރުމަށް ހޮނިހިރު ދުވަހުގެ ރޭ ޚާއްސަ ހަރަކާތެއް!
11 އެޕްރީލު 2019 | ބުރާސްފަތި 07:52އޭޕްރީލް 6 ވަނަ ދުވަހު ބޭއްވި ރައްޔިތުންގެ މަޖިލީހުގެ އިންތިޚާބުގައި އެމްޑީޕީން ވަނީ 65 ގޮނޑި ކާމިޔާބުކޮށްފައި
ރައީސް ސޯލިހު އަދި ރައީސް ނަޝީދު މި ހަރަކާތުގައި ބައިވެރިވެވަޑައިގަންނަވާނެ!
ނަވާރަ ވަނަ ރައްޔިތުންގެ މަޖިލީހުގެ އިންތިޚާބުގައި އެމްޑީޕީއަށް ލިބުނު ބޮޑު ކާމިޔާބީ ފާހަގަ ކުރުމަށް އެ ޕާޓީން ޚާއްސަ ހަފްލާއެއް ބޭއްވުމަށް ނިންމައިފިއެވެ.
އެމްޑީޕީން ބުނީ މި ހަފްލާ އޮތީ ލޮނު ޒިޔާރަތްކޮޅު ސަރަހައްދުގައި ހޮނިހިރު ދުވަހުގެ ރޭ 8:30 ގައި ކަމަށެވެ. މި ހަފްލާގައި ރައީސުލް ޖުމްހޫރިއްޔާ އިބްރާހިމް މުހައްމަދު ސޯލިހާއި، ރައީސް މުހައްމަދު ނަޝީދު ބައިވެރިވެ ވަޑައިގަންނަވާނެއެވެ.
އެމްޑީޕީއަށް ލިބުނު ކާމިޔާބީ ފާހަގަކުރުމަށް ދާއިރާތަކުގައި ވެސް ދަނީ ޚާއްސަ ހަރަކާތްތައް ބާއްވަމުންނެއެވެ. އެ ގޮތުން އައްޑޫ ސިޓީގެ ހަތް ދާއިރާގެ ހަތް ގޮނޑި ފުރަތަމަ ފަހަރަށް އެމްޑީޕީއަށް ކާމިޔާބު ކުރެވުމާ ގުޅިގެން ހަތް ވަނަ ދުވަހުގެ ހަވީރު ވަނީ ސައިކަލް ބުރެއް ބާއްވާފައެވެ. މީގެ އިތުރުން ވެސް މާލޭގެ ދާއިރާތަކުގެ ޖަގަހަތަކުގައި ވެސް އަންނަނީ އުފާފާޅުކުރުމުގެ ހަރަކާތްތައް ބާއްވަމުންނެވެ. އަދި ރަށްރަށުގައި ވެސް ދަނީ އުފާފާޅުކުރުމުގެ ހަރަކާތްތައް ބާއްވަމުންނެވެ.
އެޕްރީލް 6 ވަނަ ދުވަހު ބޭއްވި ރައްޔިތުންގެ މަޖިލީހުގެ އިންތިޚާބުގައި 65 ގޮނޑި ކާމިޔާބުކޮށް، އެމްޑީޕީން ވަނީ މަޖިލީހުގެ ސުޕަރ މެޖޯރިޓީ ނަގާފައެވެ. މިއީ ރާއްޖޭގެ ބަރުލަމާނީ ހަޔާތުގައި އެއް ޕާޓީއަކަށް އެންމެ ގިނަ ގޮނޑި ލިބުނު ފަހަރެއެވެ.
