އޭޝިއަން ފުޓބޯލް ކޮންފިޑަރޭޝަން (އޭއެފްސީ)ގެ ރައީސް ކަމަށް ޝައިހް ސަލްމާން ބިން އިބްރާހީމް އަލް ޙަލީފާ އެނެއްކާ ވެސް އިންތިޙާބު ވެއްޖެއެވެ. 

އޭޝިއާގެ މައި ފުޓުބޯޅަ އިދާރާ (އޭއެފްސީ) ގެ ރައީސްގެ މަޤާމުގައި މިހާރު ވެސް ހުންނެވީ ޝައިޙް ސަލްމާންއެވެ. ދެވަނަ ދައުރު ހަމަވާނީ 2023 ވަނަ އަހަރުއެވެ. އޭއެފްސީގެ ރައީސް ކަމުގެ އިތުރުން ފީފާގެ ނައިބު ރައީސްއެއްގެ ގޮތުގައި ވެސް ސަލްމާން ހުންނަވާނެ އެވެ.

މެލޭޝިއާގެ ވެރިރަށް ކުއާލާ ލަމްޕޫރުގައި ކުރިއަށްދާ ކޮންގްރެސް އަށް ކުއްލި ގޮތަކަށް މަންމަ އަވަހާރަވުމުން ސަލްމާން ހާޒިރު ނުވެއެވެ. އެހެން ނަމަވެސް، ސަލްމާން ވަނީ ކޮންގްރެސްގެ ބައިވެރިންނަށް އޭނާގެ މެސެޖު ފޮނުއްވާފަ އެވެ. ކޮންގްރެސް ފެށުނު އިރު ވެސް އިންތިހާބުގައި ސަލްމާނާ ވާދަ ކުރެއްވުމަށް ކުރިމަތިލެއްވި ދެ ކެންޑިޑޭޓުންނަން ގެންދިއުމުގެ ސަބަބުން ސަލްމާނަށް އޮތީ ގާތްގަނޑަކަށް މަގާމު ކަށަވަރުވެފައެވެ. 

އޭއެފްސީގެ އިންއިޙާބުގައި ވާދަކުރުމަށް ކުރިމަތި ލެއްވުމަށް ފަހުގައި ނަން ނެންގެވީ، އަރަބި އެމިރޭޓްސްގެ މުހައްމަދު ޚަލްފާން އަލް ރުމައިޘީ އާއި ގަތަރުގެ ސައުދު އަލް މުހަންދީ އެވެ. އަލް ރުމައިޘީ ކުރިން ނަން ނެންގެވި އެވެ. އެހެން ނަމަވެސް އަލް މުހަންދީ ނަން ނެންގެވީ މިދިޔަ މަހުގެ 28 ވަނަ ދުވަހު އެވެ.

އޭއެފްސީގެ މިހާރުގެ އެކްސްކޯ މެންބަރު އިންޑިއާގެ ޕްރަފުލް ޕަޓޭލް މެދުވެރިކޮށް ސަލްމާން ވިދާޅުވީ، ފުނިޔޭގެ ފުޓްބޯޅައިގެ މައި މަރުކަޒަކަށް އޭޝިއާ ހެދުމަށް ފީފާ އިން ކުރާ މަސައްކަތުގައި އޭއެފްސީން އެއްބާރުލުން ދެއްވާނެ ކަމަށެވެ. 

އޭއެފްސީގެ ރައީސް ކަމަށް ޝައިޙް ސަލްމާން އެންމެ ފުރަތަމަ ވެވަޑައިގެންނެވީ، 2013 ވަނަ އަހަރު އެވެ. އެއީ އޭރު އޭއެފްސީގެ ރައީސް ކަމުގައި ހުންނެވި ގަތަރުގެ މުހައްމަދު ބިން ހަމްމާމްގެ މައްޗަށް ކުރެވުނު ކޮރަޕްޝަންގެ ތުހުމަތުތަކާ އެކު އޭނާ އުމުރު ދުވަހަށް ސަސްޕެންޑް ކުރުމުން، އޭއެފްސީގެ ރައީސް ކަމުގެ މަގާމު ހުސްވުމުންނެވެ. 

އެ އަށް ފަހު އިންތިހާބަކާ އެކު އޭނާ، އޭއެފްސީގެ ރައީސް ކަމަށް ވަޑައިގެންނެވީ، 2015 ވަނަ އަހަރުއެވެ. އޭނާ ވަނީ 2016 ވަނަ އަހަރު ބޭއްވި އިންތިހާބުގައި، ފީފާގެ މިހާރުގެ ރައީސް ޖިއާނީ އިންފެންޓިނޯއާ ވާދަކޮށް ބަލިވެފައެވެ.