ދުނިޔޭގެ ފުޓުބޯޅައިގެ މައި އިދާރާ ފީފާ އަދި އޭޝިއަން ފުޓްބޯލް ކޮންފެޑެރޭޝަން (އޭއެފްސީ) ގެ ޓީމެއް އަންނަ އަންގާރަ ދުވަހު ރާއްޖެ އަންނަ ގޮތަށް ހަމަޖެހިއްޖެއެވެ.

ފީފާ އަދި އޭއެފްސީގެ ޓީމެއް ރާއްޖެ އަންނަ ގޮތަށް ހަމަޖެހުނީ އެފްއޭއެމްގެ މިވަގުތު ހާލަތު ދެނެގަނެ، ބައެއް މެމްބަރު ކްލަބްތަކުން އެކްސްޓްރާ އޯޑިނަރީ ކޮންގްރެސްއެއް ބޭއްވުމަށް އެދި ހުށަހެޅުމުން ކަން ހިނގައިދާގޮތް ބެލުމަށެވެ.

ފީފާ އަދި އޭއެފްސީގެ ޓީމު ފުރަތަމަ ރާއްޖެ އަންނަ ގޮތަށް ހަމަޖެހިފައި އޮތީ މިދިޔަ އާދީއްތަ ދުވަހުއެވެ. ނަމަވެސް ރާއްޖެއެމްވީއަށް މައުލޫމާތު ލިބިފައިވާ ގޮތުގައި އެޓީމު ރާއްޖެ ނައީ އެފްއޭއެމްއިން އެކަން ލަސްކޮށްދިނުމަށް އެދުމުންނެވެ.

ފީފާއިން ބުދަ ދުވަހު އެފްއޭއެމްއަށް ފޮނުވި ސިޓީއެއްގައި ބުނީ، ފީފާ އަދި އޭއެފްސީގެ ޓީމު އަންގާރަ ދުވަހު ރާއްޖެ އަންނާނެ ކަމަށާއި، އެ ޓީމުން އެފްއޭއެމް އާއި އެކްސްޓްރާ އޯޑިނަރީ ކޮންގްރެސް ބޭއްވުމަށް އެދި ހުށަހެޅި ކްލަބްތަކާއި، އެކްސްޓްރާ އޯޑިނަރީ ކޮންގްރެސް ބޭއްވުމަށް އެދި ސޮއިކުރުމަށްފަހު އެ ސޮއި އަނބުރާ ނެގި ކްލަބްތަކާ ބައްދަލުކުރާނެ ކަމަށެވެ.

މީގެއިތުރުން ފުރުސަތު އޮތްނަމަ، އެކްޓިން މިނިސްޓަރ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވާމެންޓް އަލީ ވަހީދުއާވެސް ފީފާ އަދި އޭއެފްސީން އަންނަ ޓީމު ބައްދަލުކުރައްވާނެ ކަމަށް ފީފާއިން ބުނެއެވެ.

ފީފާގެ ފަރާތުން ރާއްޖެ އައުމަށް ހަމަޖެހިފައިވަނީ އެލެގްޒެންޑްރާ ގްރޯސްއެވެ. އަދި އޭއެފްސީން އައުމަށް ހަމަޖެހިފައިވަނީ އެންޑްރޫ މާރސާ އާއި ޕްރުޝޮއްތަމް ކައްޓޭލްއެވެ.

އެފްއޭއެމްގެ އަސާސީ ގަވައިދު ބުނާގޮތުން އެފްއޭއެމްގެ ފުރިހަމަ މެމްބަރ ކްލަބްތަކުގެ ތެރެއިން 50 އިންސައްތައަށް ވުރެ ގިނަ ކްލަބްތަކުން އެކްސްޓްރާ އޯޑިނަރީ ކޮންގްރެސްއެއް ބާއްވަން ކޮންމެ ވަގުތަކު ވެސް އެދެވޭނެއެވެ. އަދި އެކްސްޓްރާ އޯޑިނަރީ ކޮންގްރެސް ބާއްވަން އެދޭތާ 14 ދުވަސް ތެރޭގައި އެކްސްޓްރާ އޯޑިނަރީ ކޮންގްރެސްއެއް ބޭއްވުމަކީ މަޖުބޫރު ކަމެކެވެ.

ނަމަވެސް 14 ދުވަސް ތެރޭގައި އެކްސްޓްރާ އޯޑިނަރީ ކޮންގްރެސް އެފްއޭއެމުން ބާއްވާފައެއް ނުވެއެވެ.