އޭއެފްސީގެ މާކެޓިން ކޮމެޓީގެ ޗެއާޕާސަނަކަށް ޝަވީދު އައްޔަންކުރައްވައިފި

އޭޝިއަން ފުޓްބޯލް ކޮންފެޑެރޭޝަން (އޭއެފްސީ) ގެ މާކެޓިން ކޮމެޓީގެ ޗެއާޕާސަނަކަށް އޮލިމްޕިކް ކޮމެޓީގެ ރައީސް އަދި އެފްއޭއެމްގެ ނޯމަލައިޒޭޝަން ކޮމެޓީގެ ކުރީގެ ޗެއާމަން މުހައްމަދު ޝަވީދު އައްޔަންކުރައްވައިފި އެވެ.

މިހާރުވެސް އޭއެފްސީގެ އެގްޒެކެޓިވް ކޮމެޓީގެ މެމްބަރުކަން ފުރުއްވަމުން ގެންދަވާ ޝަވީދު މާކެޓިން ކޮމެޓީގެ ޗެއާމަންކަމަށް އައްޔަންކުރެއްވިއިރު، އެބޭފުޅާ އަކީ މީގެކުރިން އެ ކޮމެޓީގެ ވައިސް ޗެއާމަން އެވެ.

އެފްއޭއެމް ނޯމަލައިޒޭޝަން ކޮމެޓީގެ ޗެއާމަންކަން ކުރިން ކުރެއްވި ޝަވީދު ވަނީ އެފްއޭއެމްގެ ރައީސް ކަމަށްވެސް ކުރިމަތިލައްވާފައެވެ. އެހެންނަމަވެސް އެބޭފުޅާ ވަނީ ނަން އަނބުރާ ގެންދަވާ މިހާރުގެ ރައީސް ބައްސާމް އަދީލް ޖަލީލަށް ތާއީދުކުރައްވާފައެވެ.

ޝަވީދު ވަނީ ނޯމަލައިޒޭޝަން ކޮމެޓީގެ ޗެއާމަންގެ މަގާމުގައި ހުރެ ރާއްޖޭގެ ފުޓުބޯޅަ ކުރިއެރުއްވުމަށް ގިނަ މަސައްކަތްތަކެއް ކޮށްފައެވެ. އެގޮތުން އެބޭފުޅާ ވަނީ މުޅި ރާއްޖެއަށް ހުޅުވާލައިގެން މިހާރު ކުރިޔަށްގެންދާ މިނިވަން ޗެމްޕިއަންޝިޕް މުބާރާތް ތައާރަފްކޮށްދެއްވާ އަތޮޅު ތެރޭގައި ފުޓުބޯޅަ ފޯރިގަދަ ކުރުމަށްވެސް މަސައްކަތްކުރައްވާފައެވެ.

ވީބީ ސްޕޯޓްސް ކްލަބް އުފައްދައި އެ ކްލަބް ހިންގެވުމުގައި އިސް ދައުރެއް އަދާކުރެއްވި ޝަވީދު މޯލްޑިވްސް އޮލިމްޕިކް ކޮމިޓީއަށް އިންތިހާބުވެފައި ވަނީ 2013 ވަނަ އަހަރުގެ ޖުލައިމަހުއެވެ. އޭގެ ފަހުން މި އަހަރު އެބޭފުޅާ ވަނީ އޮލިމްޕިކް ކޮމެޓީގެ ދެވަނަ ދައުރަކަށް އިންތިހާބުވެފައެވެ. މި ދައުރަށްފަހު ދެން އޮލިމްޕިކް ކޮމެޓީގެ ރައީސްގެ މަގާމަށް ކުރިމަތިނުލައްވާނެ ކަމަށް ޝަވީދު ވިދާޅުވިއެވެ.