ކުރީގެ ރައީސް އަބްދުﷲ ޔާމީންގެ ސަރުކާރުން 2016 ވަނަ އަހަރު ޓޫރިޒަމްގެ ބޭނުމަށް އުފެއްދި މޯލްޑިވްސް އިންޓަގްރޭޓެޑް ޓުއަރިޒަމް ޑިވެލޮޕްމެންޓް ކޯޕަރޭޝަން (އެމްއައިޓީޑީސީ) އިން އެންމެ ފުރަތަމަ ވެސް ހިންގި މަޝްރޫއަކީ ޕީޕީއެމްގެ އޮފީސް ހެދުމުގެ މަސައްކަތް ކަން ހާމަވެެއްޖެއެވެ. 

އެމްއައިޓީޑީސީގެ މެނޭޖިން ޑިރެކްޓަރ މުހައްމަދު ރާއިދު ވިދާޅުވީ ސިޔާސީ ޕާޓީއެއްގެ އޮފީސް ހިންގުމަށް 2016 ވަނަ އަހަރު އެ ކުންފުނީގެ ދެ މިލިއަން ރުފިޔާ ހޭދަކޮށްފައިވާކަން ހާމަވާ ކަމަށެވެ. އެއީ ކޮން އޮފީހެއްގެ ސިޔާސީ ޕާޓީއެއް ކަން ރާއިދު ވިދާޅުނުވި ނަމަވެސް ބޮޑު ތަކުރުފާނު މަގުގައި ހުންނަ ހ. ހުރަފަގައި ދެ ބުރިއަށް ހަދާފައިވާ ޕީޕީއެމްގެ އޮފީހަކީ 2016 ވަނަ އަހަރު ހަދަން ފެށި އިމާރާތެވެ.

ރާއިދު ރާއްޖެއެމްވީއަށް ވިދާޅުވީ އެ ކުންފުނި ހިންގުމާ ހަވާލުވެވަޑައިގަތުމަށް ފަހު އިންޓާނަލް އޮޑިޓެއް ކޮށްފައިވާ ކަމަށާއި ޕާޓީއެއްގެ އޮފީހެއް ހަދާފައި ވަނީ އެ ކުންފުނީގެ ދެ މިލިއަން ރުފިޔާ ޚަރަދުކޮށްގެންކަން ހާމަވާ ކަމަށެވެ. އެ މައްސަލައިގައި ކުންފުނީގެ ބޯޑު މެމްބަރަކާއި މުވައްޒަފަކު ސަސްޕެންޑް ކޮށްފައިވާ ކަމަށް ވެސް އޭނާ ވިދާޅުވިއެވެ. އަދި އެ މައްސަލަ އޭސީސީ އަށް ފޮނުވައި މައްސަލަ ބަލަން ފަށާފައިވާ ކަމަށް ވެސް ވިދާޅުވިއެވެ.

"އެންމެ ފުރަތަމަ ވެސް މި ކުންފުނިން ޚަރަދު ކޮށްފައި ވަނީ އެލާރި. 2016 ވަނަ އަހަރު ކުންފުނި ހަވާލުވުމަށް ފަހު ޚަރަދުކޮށްފައި ވަނީ އެ ފައިސާކަން އެ އޮތީ ހާމައަށް ފެންނަން. ކުންފުނީގެ އޮޑިޓް ރިޕޯޓުގައި އެކަން ފާހަގަ ކޮށްފައިވޭ،" ރާއިދު ވިދާޅުވިއެވެ. 

އޮޑިޓަށް ދޮގުމައްޗަށް ދޮގު

ރާއިދު ވިދާޅުވީ ކުންފުނީގެ ފައިސާއަށް ޚިޔާނާތްތެރި ވެފައިވާ މުއައްޒަފުން އޮޑިޓަށް ހާޒިރުކުރި ކަމަށެވެ. އަދި ކުންފުނިން އިސްނަގައިގެން ހިންގާފައިވާ އިންޓާނަލް އޮޑިޓަށް ދީފައިވާ ޖަވާބާއި އޮޑިޓް އޮފީހުން ކޮށްފައިވާ އޮޑިޓަށް ދީފައިވާ ޖަވާބު ދިމާނުވާ ކަމަށް ވިދާޅުވިއެވެ. 

އޮޑިޓަރ ޖެނެރަލް އޮފީހުން 2016 ވަނަ އަހަރު ކުރި އޮޑިޓްގައި އެސެޓް ރެޖިސްޓްރީ ނެތް ކަމަށް ބުނި ނަމަވެސް 2017 ވަނަ އަހަރު އެ އޮފީހުން ކުރި އޮޑިޓްގައި ކުންފުނީގެ ފައިސާ ބޭނުންކޮށްފައި ވަނީ ސީއެސްއާރަށް ކަމަށް ބުނެފައިވާ ކަމަށް ރާއިދު ވިދާޅުވިއެވެ. އަދި އެ ފައިސާއަކީ ވެލާނާގޭގައި ހުންނަ އެމްއައިޓީޑީސީގެ އޮފީސް މަރާމާތު ކުރުމަށް ނެގި ފައިސާ ކަމަށް އިންޓާނަލް އޮޑިޓަށް ބުނެފައިވާ ކަމަށް ވިދާޅުވިއެވެ. 

އެހެން ނަމަވެސް ވެލާނާގޭގައި ހުރި އޮފީހެއް މަރާމާތު ކުރުމަށް ދެ މިލިއަން ޚަރަދުވެދާނެ ކަމަށް ބުއްދި ގަބޫލު ނުކުރާ ކަމަށް ވެސް ވިދާޅުވިއެވެ.

"ކާކުތޯ ގަބޫލުކުރާނީ ވެލާނާގޭގައި ހިންގާ ކުންފުޏެއްގެ މަރާމާތަށް ދެ މިލިއަން ރުފިޔާ ޚަރަދުވެދާނެ ކަމަށް. އަޅުގަނޑުމެންގެ އޮޑިޓަށް އެ މުއައްޒަފުން ހާޒިރުކުރީމަ ބުނަނީ އެއީ މި އޮފީހުގެ މަރާމާތަށް ކުރި ޚަރަދު ކަމަށް،" ރާއިދު ވިދާޅުވިއެވެ. 

ޕީޕީއެމް އޮފީސް ހެދުމަށް އެމްއައިޓީޑީސީން ދެ މިލިއަން ރުފިިޔާ ބޭނުންކޮށްފައި ވަނީ ތިން ކުންފުންޏަކަށް އެކި ފަހަރުމަތިން ފައިސާ ދީގެންނެވެ. ފައިސާ އެ ކުންފުނިން ނަގާފައިވަނީ ޓްނާންސެކްޝަންގެ ގޮތުގައި ކަމެއް އަދި ނަގުދު ފައިސާގެ ގޮތުގައި ކަމެއް ރާއިދު ވިދާޅެއް ނުވިއެވެ. 

ޕީޕީއެމް ހިންގުން އެ ޕާޓީގެ މުސްތަޝާރު ޔާމީންއާ ހަވާލުކުރުމަށް ކޯޓުން ޕީޕީއެމްގެ މައްޗަށް އަމުރުކުރުމާ ގުޅިގެން ވަގުތީ ގޮތުން ދަރުބާރު ގޭގައި ޕީޕީއެމް އޮފީސް ހިންގުމަށް ފަހު ހ. ހުރަފަގައި އެ އޮފީސް ހުޅުވާފައި ވަނީ 2017 ވަނަ އަހަރުގެ ތެރޭގައެވެ. 

އެމްއައިޓީޑީސީއަކީ ޓޫރިޒަމް ދާއިރާގެ މަޝްރޫއުތަކަށް އިންވެސްޓް ކުރުމަށް ކުރީގެ ރައީސް އަބްދުﷲ ޔާމީންގެ ސަރުކާރުން 2016 ވަނަ އަހަރު އުފެއްދި ކުންފުންޏެކެވެ.