ވީޑިއޯއެއް ބޭނުން ކޮށްގެން އެކިއެކި މީސްމީހުން ބްލެކްމެއިލް ކުރުމަށް ރާވާ ކަމަށްބުނެ، ހައްޔަރުކުރީ ޕީޕީއެމްގެ ރައީސް އަދި ކުރީގެ ރައީސް މައުމޫން އަބްދުލް ގައްޔޫމް ހައްޔަރުކުރެވޭފަދަ ބަޔާނެއް ހޯދުމަށް ކަމަށް މާލޭސިޓީ ކައުންސިލް މެންބަރު އަދި މެންބަރު ޒައިދުލް އަމީން ވިދާޅުވެއްޖެއެވެ.
އިތުރު ބަޔަކާ ބައިވެރި ވެގެން، ވީޑިއޯއެއް ބޭނުން ކޮށްގެން އެކިއެކި މީސްމީހުން ބްލެކްމެއިލް ކުރުމަށް ރާވާ، އެ ވީޑިއޯތައް މީޑިއާއަށް ދީގެން މާލީ ގޮތުންނާއި ސިޔާސީ ގޮތުން މަންފާތަކެއް ލިބިގަތުމަށް މަސައްކަތް ކުރަމުން ދާކަމަށް ތުހުމަތުގައި ފުލުހުން ޒައިދުލް އަމީން ހައްޔަރުކޮށްފައިވަނީ 13 ޖަނަވަރީ 2017 ވަނަ ދުވަހުއެވެ.
ޒައިދުލް އަމީން ހައްޔަރުކުރި މައްސަލައާއި ގުޅިގެން އޭނާ ނެރުއްވި ބަޔާނެއްގައި ވިދާޅުވެފައިވަނީ ހައްޔަރުގައި ބަހައްޓައިގެން ބަޔާން ނެގިއިރު، ހައްޔަރުކޮއްގެން އުޅެނީ ކޮންފަރާތް ތަކެއް ބްލެކްމެއިލް ކުރަންއުޅުނު ކަމުގެ ތުހުމަތުގައި ކަމެއް ފުލުހުންގެ ފަރާތުން ބުނެދީފައިނުވާ ކަމަށެވެ.
ހައްޔަރުކުރި މައްސަލަ ސާފުނުވާއިރު ފަހުން ފުލުހުން މަސައްކަތްކޮށްފައިވަނީ ކުރީގެ ރައީސް އަލްއުސްތާޛް މައުމޫން ޢަބްދުލް ޤައްޔޫމް މިހާރުގެ ސަރުކާރާ ދެކޮޅަށް ސިއްރު ރޭވުންތަކެއް ރާއްވަވަމުންދާ ކަމުގައި ބުނެ ބަޔާނެއްދިނުމަށް ކަމަށް ޒައިދުލް އަމީން ވިދާޅުވެފައިވެއެވެ.
މީގެ އިތުރުން ޒައިދުލް އަމީން ވިދާޅުވެފައިވަނީ ޕީ.ޕީ.އެމްގެ އޮފީހުން ގެއްލިފައިވާކަމަށްބުނާ ހާޑް ޑިސްކާއި، ފުލުހުން ބޭނުންވެގެން އުޅޭ ވީޑިއޯ އަކާއި ގުޅޭ ގޮތުން ސުވާލުކޮށް އެ ހާޑްޑިސްކް އާއި ވީޑިއޯއެއް ވަނީ ކުރީގެ ރައީސް އަލްއުސްތާޛް މައުމޫން ޢަބްދުލް ޤައްޔޫމްގެ އަތްޕުޅުގައިކަމަށް ބުނެ ބަޔާން ދިނުމަށް ފުލުހުން އެދިފައިވާ ކަމަށެވެ.
" މި ބައްދަލުވުން ތަކުގައި އަޅުގަނޑާއި ސުވާލުތައް ކުރަނީ އެސިސްޓެންޓް ކޮމިޝަނަރ އޮފް ޕޮލިސް ޢަބްދުﷲ ނަވާޒްއެވެ. އޭގެ އިތުރުން މިހާރު އަޅުގަނޑު ވަކީލަކީ ސަރުކާރުގެ ސިޔާސަތު ތަކާއި އިދިކޮޅު ފިކުރުގެ ވަކީލެއް ކަމަށާއި އެ ވަކީލު މި މައްސަލައިގައި އިތުރަށް ބޭނުން ނުކުރުމަށާއި އަދި ވަކީލު ބަދަލު ކުރުމަށް އެދުނެވެ. އެކަމުގެ މަޢުލޫމާތު އަދި އެހެން އެއްވެސް ފަރާތަކަށް ދީފިނަމަ އަޅުގަނޑު ގޭގެ ބަންދުން ޖަލަށް ބަދަލުކުރެވޭނޭކަމަށް ބުނެ އެސިސްޓެންޓް ކޮމިޝަނަރ އޮފް ޕޮލިސް ޢަބްދުﷲ ނަވާޒް ވަނީ އަޅުގަނޑަށް އަންގާފައެވެ." ޒައިދުލް އަމީން ވިދާޅުވެފައިވެއެވެ.
މީގެ އިތުރުން އެސިސްޓެންޓް ކޮމިޝަނަރ އޮފް ޕޮލިސް ޢަބްދުﷲ ނަވާޒް ވަނީ، "މިހާރު ރައީސް މައުމޫން ގެ އެއްވެސް ބާރެއް ނެތްކަމަށާއި ރައީސް މައުމޫންއަށް ތާއީދުކުރުން ހުއްޓާލައި، ސަރުކާރާއި ގުޅުމަށް އެދިފައި ކަމަށް ޒައިދުލް އަމީން ވިދާޅުވިއެވެ.
" އޭގެ އިތުރުން އަޅުގަނޑު މިސަރުކާރުން ބޭނުންވާ ކޮންމެ ވަޒީފާއެއް ހަމަޖައްސައި ދެވިދާނެ ކަމަށްވެސް ދެންނެވިއެވެ. ރައީސް މައުމޫން ހައްޔަރުކުރުމަށްޓަކައި އަޅުގަނޑުގެ ބަޔާން ކޮންމެހެންވެސް ބޭނުންވާކަމަށާއި، އެކަމުގައި އެއްބާރުލުން ނުދީފިނަމަ "ޝުމްބާ ގޮންގް" ޖަލުގައި ޝަރީޢަތެއް ނެތި އޮންނަހެން އަޅުގަނޑުވެސް އޮންނަން ޖެހޭނީ ޖަލުގައި ކަމަށް ކިތަންމެ ފަހަރަކު އަޅުގަނޑު ގާތުގައި އެބޭފުޅާ ވިދާޅުވިއެވެ." ޒައިދުލް އަމީންގެ ބަޔާނުގައި ވިދާޅުވެފައިވެއެވެ.
