މަރުތައް ތަހުގީގުކުރާ ކޮމިޝަނަށް ބާރުތައް ދިނުމަށް ސީޕީޖޭއިން މަޖިލީހުގެ ރައީސަށް ދަންނަވައިފި
ސީޕީޖޭއިން ވަނީ މަޖިލީހުގެ ރައީސްގެ ޖަވާބަކަށް އެދޭ ކަމަށް ބުނެފައި
މަރާލެވިފައިވާ މީހުންނާއި ގެއްލުވާލެވިފައިވާ މީހުންގެ މައްސަލަތައް ބެލުމަށް އުފައްދާފައިވާ ކޮމިޝަނުން ބޭއްވި ނޫސްވެރިންގެ ބައްދަލުވުމެއްގައި ކޮމިޝަނުގެ ރައީސް ހުސްނުއް ސުއޫދު ވާހަކަދައްކަވަނީ
މަރާލެވިފައިވާ މީހުންނާއި ގެއްލުވާލެވިފައިވާ މީހުންގެ މައްސަލަތައް ބެލުމަށް ރައީސުލް ޖުމްހޫރިއްޔާ އިބްރާހީމް މުހައްމަދު ސާލިހު އުފައްދަވާފައިވާ ރިޔާސި ކޮމިޝަނަށް ގާނޫނީ ބާރު ދިނުމަށް ރައްޔިތުންގެ މަޖިލީހުގެ ރައީސް ގާސިމް އިބްރާހީމްއަށް ކޮމިޓީ ޓު ޕްރޮޓެކްޓް ޖަރނަލިސްޓް (ސީޕީޖޭ) އިން ގޮވާލައިފިއެވެ.
ނޫސްވެރިކަމުގެ މިިނިވަން ކަމަށް މަސައްކަތްކުރާ ބައިނަލްއަޤްވާމީ ޖަމާއަތުން މިހެން ގޮވާލާފައި ވަނީ މަޖިލީހުގެ ރައީސް ގާސިމް އިބްރާހީމް އަށް ފޮނުވި ސިޓީއެއްގައެވެ.
"މަދަނީ ޖަމްއިއްޔާތަކުގެ ފުޅާ ކޯލިޝަނަކުންނާއި މި ކަމުގައި ޝާމިލުވާ އާއިލާތަކުން ވަނީ މި ވޯޓް ނެގުމަށް ގޮވާލާފައި. އަދި އަޅުގަނޑުމެން ސިޓީ ލިޔުނީ އެ ފަރާތްތަކަށް ތާއީދުކުރާކަން ހާމަކުރުމަށް," ސީޕީޖޭގެ ސިޓީގައި ވެއެވެ.
ސީޕީޖޭއިން ވަނީ ނިމިގެންދިޔަ ފެބްރުއަރީ މަހު އެ ޖަމާއަތުން ރާއްޖެއަށް ކުރި ޒިޔާރަތުގައި، ނޫސްވެރިކަމުގެ މިނިވަންކަން ރާއްޖޭގައި ކުރިއަރަމުން ދާކަން ފާހަގަކުރެވިފައިވާ ކަމަށް ބުނެފައެވެ. އަދި އެ ކޮމިޝަނަށް ބާރުތައްދީ ހަވާލުކުރެވިފައިވާ މަސައްކަތް ނިންމަން ފުރުސަތު ދިނުމަކީ އިތުރު ކުރިއެރުމަކަށް ވާނެ ކަމަށް އެ ޖަމާއަތުން ވަނީ ބުނެފައެވެ.
ކޮރަޕްޝަނާއި ފަސާދައިގެ އަމަލުތައް ތަހުގީގު ކުރުމަށް ރައީސުލްޖުމްހޫރިއްޔާ އުފައްދާފައިވާ ރިޔާސީ ކޮމިޝަނާއި މަރުތައް ބެލުމަށް އުފައްދާފައިވާ ރިޔާސީ ކޮމިޝަނަށް ބާރު ދިނުމަށް ހުށަހަޅާފައިވާ ބިލް ހަތަރު ފަހަރަށް އެޖެންޑާ ކުރުމަށް ފަހު ވެސް ބިލް ވަނީ ފާސްނުވެފައެވެ.
މަޖިލީހުގެ ރައީސަށް ފޮނުވާފައިވާ ސިޓީގައި ސީޕީޖޭ އިން ބުނެފައި ވަނީ ކޮމިޝަންތަކުގެ ބިިލް ގާނޫނުއަސާސީއާ ޚިލާފް ކަމަށް މަޖިލީހުގެ ރައީސް ފުރަތަމަ ވިދާޅުވި ކަމަށާއި ނަމަވެސް އެކަން ވެސް ކައުސެލް ޖެނެރަލް ސާފްކޮށްދެއްވާފައިވާ ކަމަށެވެެ.
ސީޕީޖޭއިން ވަނީ މަޖިލީހުގެ އިންތިޚާބުގެ ކުރިން ބިލް އެޖެންޑާކޮށް ވޯޓަށް އެހުމަށް ގޮވާލާފައެވެ. އަދި މަޖިލީސް ރައީސްގެ ޖަވާބަކަށް އިންތިޒާރުކުރާ ކަމަށް ސިޓީގައި ވެއެވެ.
މަރުތަކާއި ގެއްލުވާލާފައިވާ މީހުންގެ މައްސަލަތައް ބެލުމަށް ރައީސުލް ޖުމްހޫރިއްޔާ އުފެއްދެވި ރިޔާސީ ކޮމިޝަން އުފައްދާފައި ވަނީ ރައީސް ސާލިހު މަގާމުގެ ހުވާކުރެއްވި ދުވަހުއެވެ.
