ވާ ޖަހާފައި މި އޮތީ ހޯރަފުއްޓަށް އެއާޕޯޓް ގެނެސްފައި: މިނިސްޓަރު އައިޝާ
މި ސަރުކާރު ނުގެނެވުނު ނަމަ، އެއާޕޯޓު ނޭޅޭނެ: މިނިސްޓަރު
ޓްރާންސްޕޯޓް މިނިސްޓަރު އައިޝަތު ނަހުލާ ހޯރަފުށީގައި ވާހަކަފުޅު ދައްކަވަނީ
ހޯރަފުށީގައި އެއާޕޯޓް އެޅުމަކީ އެ ރަށުގެ ރައްޔިތުން އެތައް ދުވަހެއް ވަންދެން ކުރަމުންދިޔަ އިންތިޒާރެއް ކަމަށާއި ހއ. އަތޮޅުގެ އެކި ދިމަ، ދިމާލުގައި އަޅަން ނިންމި އެއާޕޯޓް ވާ ޖަހައި ދަމާފައި ހޯރަފުއްޓަށް ގެނެސްފައިވާ ކަމަށް ޓްރާންސްޕޯޓް މިނިސްޓަރު އައިޝަތު ނަހުލާ ވިދާޅުވެއްޖެއެވެ.
ހޯރަފުށީ އެއާޕޯޓުގެ އަމަލީ މަސައްކަތް ފެށުމުގެ އެއްބަސްވުމުގައި ސޮއި ކުރުމަށް އެ ރަށުގައި ބޭއްވި ރަސްމިއްޔާތުގައި ވާހަކަފުޅު ދައްކަވަމުން މިނިސްޓަރު ނަހުލާ ވިދާޅުވީ ހޯރަފުށީގައި އެއާޕޯޓް އެޅުމުގެ ވާހަކައަކީ ކުޑައިރު ވެސް އަޑުއިވެމުންދިޔަ ވާހަކައެއް ކަމަށާއި އެ ރަށުގައި އެއާޕޯޓު އެޅުމަށް ސަރުކާރުން ނިންމުމަކީ އެތައް ދުވަހެއް ވަންދެން އުންމީދުކޮށްގެން ތިބި ކަމެއް ހާސިލުވުމުން ކަމަށެވެ.
އުފަން ރަށް، ހޯރަފުށީގައި ވާހަކަފުޅު ދައްކަވަމުން މިނިސްޓަރު ވިދާޅުވީ އެ ރަށުގައި އެއާޕޯޓް އެޅުމަށް ނިންމުނީ ރައްޔިތުންގެ ހިތްވަރާއި އެއްބާރުލުން ސަރުކާރަށް ލިބުމުން ކަމަށެވެ. ހޯރަފުށީ ރައްޔިތުންގެ އަގުލަބިއްޔަތާ އެކު، ރައީސް ސޯލިހުގެ ސަރުކާރު ނުގެނެވުނު ނަމަ، އެއާޕޯޓުގެ މަސައްކަތް އެ ރަށުގައި ނުފެށުނީސް ކަމަށް މިނިސްޓަރު އައިޝާ ވިދާޅުވިއެވެ.
"އަޅުގަނޑުމެން ކުޑައިރުން ފެށިގެނ އަޑު އިވެމުންދަނީ ކޮން އިރަކުންތޯ ހޯރަފުށީގައި އެއާޕޯޓެއް އެޅޭނީ. އެއާޕޯޓް އިހަވަންދޫ އާއި އެއާޕޯޓް ހުވަހަންދޫއާ އެކި ތަންތަނަށް ދެމެމުން ދެމެމުން ގޮއްސައި، ވާ ޖަހާފައި މި އޮތީ މާތްﷲގެ އިރާދަފުޅުން ހޯރަފުއްޓަށް ގެނެސްފައި،" މިނިސްޓަރު އައިޝާ ވިދާޅުވިއެވެ.
ހޯރަފުށި އެއާޕޯޓުގެ އެއްބަސްވުމުގައި ސޮއިކުރި ރަސްމިއްޔާތުގެ ތެރެއިން-- ފޮޓޯ/ ޝުއިބު މުހައްމަދު އިގުބާލް
ހޯރަފުށީގައި އެއާޕޯޓް އެޅުމުގެ އަމަލީ މަސައްކަތް ފެށުމުގެ އެއްބަސްވުމުގައި އެމްޓީސީސީ އާއި ޓްރާންސްޕޯޓް މިނިސްޓްރީން ހޯމަ ދުވަހުގެ ހަވީރު އެ ރަށުގައި ބޭއްވި ރަސްމިއްޔާތެއްގައި ވަނީ ސޮއިކޮށްފައެވެ.
އެ ރަސްމިއްޔާތަށް މިނިސްޓަރު ނަހުލާ ހޯރަފުއްޓަށް ވަޑައިގަތުމާ އެކު، އެކަމަނާ އަށް ހޫނު މަރުހަބާއެއް އެ ރަށުން ވަނީ ދަންނަވާފައެވެ. އައިޝާ ހޯރަފުއްޓަށް ވަޑައިގަތުމާ އެކު، އެކަމަނާގެ މަންމާފުޅު ހަދީޖާ އިބްރާހިން ވަނީ މަރުހަބާ ވިދާޅުވެފައެވެ. ދެމައިން އުފަލުން ބައްދާލި ވަގުތު މަންމާފުޅުގެ ލޮލުން ކަރުނަ ހިލުނެވެ.
ވަޒީރު ކަމަށް ވަޑައިގަތުމަށް ފަހު، މިއީ ނަހުލާގެ އުފަން ރަށް ހޯރަފުށްޓަށް ވަޑައިގެންނެވި ފުރަތަމަ ފަހަރެވެ.
