ހީނާ ޚާން އަދިވެސް ކަސޯޓީ ޒިންދަގީކީ 2 އިން ފެނިދާނެތަ؟
ހީނާ ބުނެފައިވަނީ އޭނާ އެ ޝޯ ހުއްޓާނުލާ ކަމަށް
ހީނާ ޚާން
ބޮލީވުޑް ފިލްމެއް ކުޅުމަށް ސްޓާ ޕްލަސް އިން ދައްކަމުންދާ ޑްރާމާ ސީރިއަލް "ކަސައުޓީ ޒިންދަގީކީ 2" ގައި ކޮމޯލިކާގެ ރޯލް ކުޅެމުންދާ ހީނާ އެ ރޯލް ދޫކޮށްލި ކަމަށް ވަނީ އަޑުފެތުރިފައެވެ.
މި ޚަބަރާއި ގުޅޭގޮތުން ހީނާ ބުނެފައިވަނީ ވިކްރަމް ބަޓްގެ ފިލްމްގައި މަސައްކަތް ކުރުމަށްޓަކައި އޭނާ ބްރޭކެއް ނެގީ ކަމަށާއި މިއަހަރުގެ ސެޕްޓެމްބަރުގައި އަލުން ގުޅޭނެ ފަދަ އިޝާރާތެއް ވަނީ ދީފައެވެ.
ހިންދުސްތާން ޓައިމްސް" އަށް ދިން އިންޓަވިއު އެއްގައި ހީނާ ބުނެފައިވަނީ އޭނާ އެ ޝޯ ހުއްޓާނުލާ ކަމަށެވެ.
ހީނާގެ ބަދަލުގައި ކޮމޯލިކާގެ ރޯލަށް އެހެން މީހަކު ހަމަޖެއްސި ކަމަށް އަޑުފެތުރިފައިވާތީ އެކަމާއި ގުޅޭ ގޮތުން ހީނާ ބުނެފައިވަނީ އެހެން މީހަކު އެ އެރޯލަށް ހަމަޖައްސަން ނުވިސްނާ ކަމަށް ޑްރާމާ އުފައްދާ ފަރާތްތަކުން ބުނި ކަމަށެވެ.
“ އަހަރެން ގެ ރޯލް އޯޑިއަންސް ވަނީ ބަލައިގެންފައި. އަހަރެން އެ ކެރެކްޓަރ އަށް ވަރަށް ބޮޑަށް މަސައްކަތް ކުރިން. އަހަރެން ފްރީ ވާނީ ސެޕްޓެމްބަރުގައި. އަހަރެން ވަރަށް ބޭނުންވޭ ޝޯއަށް އެނބުރ އަންނަން" ހީނާ ވަނީ ބުނެފައެވެ.
