"ރައީސް" ގެ ޕްރޮމޯޝަން މަސައްކަތްތަކުގައި ޝާހުރުކްއާ އެކު ބައިވެރި ނުވެވުނީތީ ދެރަވާ ކަމަށް ފިލްމުގެ ލީޑް އެކްޓްރެސް މާހިރާ ޚާން ބުނެފިއެވެ.
މިމަހު 25ގައި (މާދަމާ) ރިލީޒްކުރުމަށް ހަމަޖެހިފައިވާ ފިލްމު "ރައީސް" ގެ ޕްރޮމޯޝަން މަސައްކަތްތަކުގައި ޝާހުރުކް އަވަދިނެތި އުޅޭއިރު، އެކަމުގައި ބައިވެރިނުވެވުމުގެ ހިތާމަ އިންތިހާއަށް ކުރާ ކަމަށް ފިލްމުގައި ޝާހުރުކްއާ އެކު ފެނިގެންދާ ޕާކިސްތާނު އެކްޓްރެސް މާހިރާ ޚާން ބުނެއެވެ. ތަފާތު އެކި ޕްލެޓްފޯމްތަކުގައި ފިލްމުގެ ޕްރޮމޯޝަންތައް ޝާހުރުކް ޖައްސަމުން ގެންދާއިރު، ޕާކިސްތާނާއި އިންޑިއާ އާއި ދެމެދު އުފެދިފައިވާ ހަމަނުޖެހުންތަކުގެ ސަބަބުން މާހިރާ ޚާންއަށް އިންޑިޔާއަށް ދިއުމަށް ވަނީ ހުރަސް އެޅިފައެވެ.
އިންޓަނޭޝަނަލް ޑެއިލީ ނޫހަށް މާހިރާ ޚާން ދިން އިންޓަވިއުއެއްގައި އޭނާ ބުނީ، "ރައީސް"ގެ މަސައްކަތްތަކާ މެދު ވަރަށް ފަޚުރުވެރިވާ ކަމަށާއި އެހެންނަމަވެސް، ފިލްމުގެ ޕްރޮމޯޝަން މަސައްކަތްތަކުގައި ވެސް ބައިވެރިވާން ބޭނުންވާ ކަމަށެވެ. އަދި ފިލްމާ ގުޅޭ ގޮތުން ޝާހުރުކް ދޭ އިންޓަވިއުތަކުގައި އޭނާ ވެސް ބައިވެރިވާން ބޭނުންވާކަން ފާހަގަކުރަމުން މާހިރާ ޚާން ބުނީ މިއީ އޭނާގެ ވެސް ފިލްމެއް ކަމަށެވެ.
"ރައީސް" ގައި ޝާހުއާއެކު މަސައްކަތް ކުރުން ވެގެން ދިޔައީ ހުވަފެނެއް ޙަޤީޤަތަކަށް ވެގެން ދިއުން ކަހަލަ ކަމަކަށް ކަމަށް މާހިރާ ޚާން ބުންޏެވެ. އަދި ފިލްމުގެ މަންޒަރުތައް ނެގުމުގައި އެތައް ގޮތަކުން ޝާހުރުކް އެހީތެރިވިކަން ފާހަގަކުރަމުން މާހިރާ ބުނީ، ޝާހުރުކް އަކީ "ޖާދޫ" ކަމަށެވެ.
