އީޔޫ އިން އިނގިރޭސިވިލާތް ވަކިވުން ފަސްކޮށްދިނުމަށް ރަސްމީކޮށް އެދިވަޑައިގެން އީޔޫއަށް ލިޔުއްވުމަށް ބޮޑުވަޒީރު ތެރީސާ މޭ ނިންމަވައިފިއެވެ.

މިނިސްޓަރަކާ ހަވާލާދީ ބީބީސީގައި ބުނެފައިވަނީ އީޔޫ އިން ވަކިވުން އެންމެ ދިގުވެގެން ފަސްކުރަނީ ދެ އަހަރަށް ކަމަށެވެ. ނަމަވެސް ބޮޑުވަޒީރުގެ ރަސްމީ އޮފީސް ޓެން ޑައުނިންގް ސްޓްރީޓުން ބުނެފައިވަނީ އަދި ވަކި ނިންމުމެއް ނިންމާފައި ނުވާ ކަމަށެވެ.

އީޔޫ އިން ވަކިވުމުގެ މަޝްވަރާތަކުގެ މެދުވެރިއެއްގެ ދައުރު އަދާކުރައްވާ މައިކަލް ބާރނިއަރ ވިދާޅުވީ އިނގިރޭސި ވިލާތުގެ "ހަރުދަނާ ޕްލޭނެއް" ނެތި އެ ޖަމާއަތުން އެކަން ނުކޮށްދޭނެ ކަމަށެވެ.

އިނގިރޭސިވިލާތް އީޔޫއިން ވަކިވުމަށް ބޮޑުވަޒީރު މޭ އެ ޖަމާއަތާ އެކު މަޝްވަރާކުރެއްވުމަށް ފަހު ހުށަހެޅުއްވި ދެވަނަ އެއްބަސްވުން ވެސް ގާނޫނު ހަދާ މަޖިލީހުން މިދިޔަ ހަފްތާގައި 149 ވޯޓާ އެކު ވަނީ ބޭރުކޮށްލާފައެވެ.

މީގެ އިތުރުން އެ މެމްބަރުން ވަނީ އީޔޫއާ އެކު އެއްބަސްވުމެއް ނެތި އެ ޖަމާއަތުން ވަކިވުމަށް އަދި ވަކިވުމުގެ މުއްދަތު ފަސްކޮށްދިނުމަށް ވޯޓް ދެއްވާފައެވެ.

އީޔޫ އިން ވަކިވުމަށް ވެވުނު އެއްބަސްވުމުގެ ގޮތުގައި ބޮޑުވަޒީރު މޭ ޖެނުއަރީ މަހު ހުށަހެޅުއްވި ހުށަހެޅުއްވުމާ ދެކޮޅަށް 230 މެމްމަބަރުން ވޯޓް ދެއްވާފައިވާއިރު އެއީ އެ ގައުމުގެ ތާރީޚުގައި ބޮޑުވަޒީރު ކަމުގެ މަގާމުގައި ހުންނެވި ބޭފުޅެއްގެ ހުށަހެޅުމާ ދެކޮޅަށް އެންމެ ގިނަ ވޯޓް ލިބުނު ފަހަރެވެ.

އެ ފަހަރުގެ ވޯޓުގައި އެއްކޮޅަށް 202 މެމްބަރަކު ވޯޓް ދެއްްވާފައިވާއިރު ދެކޮޅަށް ވޯޓްދެއްވި މެމްބަރުންގެ ތެރޭގައި ވެރިކަންކުރާ ކޮންޒަވެޓިވް ޕާޓީއަށް ނިސްބަތްވެ ވަޑައިގަންނަވާ 118 މެމްބަރަކު ހިމެނިވަޑައިގަންނަވައެވެ.

އީޔޫ އިން އިނގިރޭސިވިލާތް ވަކިވުމާ މެދު 2016 ވަނަ އަހަރުގެ ޖޫން މަހުގެ 23 ވަނަ ދުވަހު ނެގި ރައްޔިތުންގެ ފެންނަ ނުފެންނަ ވޯޓުގައި އީޔޫ އިން ވަކިވުމަށް ފެންނަ ކަމަށް 52 އިންސައްތަ މީހުން ވޯޓް ދީފައިވެއެވެ.