މޫނު ބުރުގާ އަޅައިގެން ސިވިލް ސާވިސް ގެ މުވައްޒަފުންނަށް ވަޒީފާއަށް ނުކުތުމަށް  އޮތް ހުރަސް ސިވިލް ސާރވިސް ކޮމިޝަނުން ނައްތާލައިފިއެވެ.

ސިވިލް ސާރވިސް ކޮމިޝަނުން މިމަހުގެ 12 ވަނަ ދުވަހު ނެރެފައިވާ ސަރކިއުލާއެއްގައި ބުނެފައިވަނީ ދިވެހި ސިވިލް ސާވިސްގެ ގަވާއިދު 2014 ގެ 145 ވަނަ މާއްދާގެ (ހ)ގައި، "ސިވިލް ސާވިސްގެ މުވައްޒަފުން މަސައްކަތު ގަޑިގައި ހެދުން އަޅާފައި ހުންނަންވާނީ ކާކުކަން ރަނގަޅަށް އެނގޭ ފަދަ ގޮތެއްގައި" ކަމުގައި ބަޔާންވެގެންވާއިރު، މި އިބާރާތުން މާނަކޮށްފައި ވަނީ މުވައްޒަފުން އަޅާފައި ހުންނަ ހެދުމުގެ ބާވަތަށާއި ވައްތަރަށް ނުވަތަ ހެދުން އަޅާފައި ހުންނަގޮތަށް އެކަނި ނޫން ކަމަށެވެ.

އަދި ހެދުން އެޅުމުގެ ތެރޭގައި، މުވައްޒަފަށް ވަޒީފާ އަދާކުރާ އިދާރާއަކުން ދޫކޮށްފައިވާ، މުވައްޒަފަކީ ކާކުކަން އެނގޭފަދަ ކާޑާއި، މުވައްޒަފުގެ ނަމާއި މަގާމު އެނގޭ ފަދަ ޓެގް ބޭނުން ކުރުން ހިމެނޭ ކަމަށެވެ.

އެހެންކަމުން އެ އިދާރާއަކުން ކަނޑައަޅާ ގޮތެއްގެ މަތިން މުވައްޒަފަކީ ކާކުކަން ކަށަވަރު ކުރެވޭ ގަވާއިދުގައި ބަޔާންކޮށްފައިވާ ހެދުމާއި ތަކެތި ފިޔަވައި، އެކަށޭނަ ހެދުމެއްގައި ވަޒީފާ އަދާކުރުމަށް ސިވިލް ސާވިސް ގަވާއިދު 2014 ގެ 145 ވަނަ މާއްދާގެ (ހ) އިން ހުރަހެއް ނެތް ކަމަށް ސާރކިއުލާގައި ވަނީ ބުނެފައެވެ.