އާސަހަރާ ފުރި އަނެއްކާ ވެސް ފަސް އަޅަނީ

އާސަރަހާއަށް އަނެއްކާ ވެސް ފަސް އަޅަން ނިންމައިފިއެވެ.

މާލެ ސިޓީ ކައުންސިލުން ކުރި އިއުލާނެއްގައި ބުނެފައިވަނީ އާސަހަރާގަ ޖާގަ ނެތުމުން ޖާގަ ހެދުމަށްޓަކައި، ސަހަރާގެ އިރުމަތި ފަރާތަށް ވެލި އެޅުމުގެ މަސައްކަތް ކުރުމަށް ހަމަޖެހިފައިވާ ކަމަށާއި އާސަހަރާގެ އިރުމަތީ ފަރާތުގެ މައްޔިތުން ވަޅުލާފައިވާ ބައިގެ މަހާނަތަކުގައި ޖަހާފައި ހުރި މަހާނަ ގައުތައް، މައްޔިތުންގެ އާއިލާގެ ފަރާތުން 31 މާރޗް 2019 ގެ ނިޔަލަށް ނެގުމަށް އެދޭ ކަމަށެވެ. އަދި އެ މުއްދަތުގެ ފަހުން ނުނަގާ ހުރި ގައުތައް، އެތަނުން ނަގައި އެތަނަށް ވެލި އެޅޭނެ ކަމަށާއި މަހާނަ ގައުތައް ނެގުމުގައި، އެ ގައުތަކަށް ލިބިދާނެ ގެއްލުމަކަށް، އެ ކައުންސިލުން ޒިންމާ ނުވާނެ ކަމަށެވެ.

އާ ސަހަރާ ފުރިގެން މީގެ ކުރިން ހަތަރު ފަހަރެއްގެ މަތިން ވަނީ ފަސް އަޅާފައެވެ. އަދި އެކަމަށް ދާއިމީ ހައްލެއް ގެންނަން ކަމަށް ބުނެ ކުރީގެ ރައީސް ޔާމީންގެ ސަރުކާރުން ވަނީ މީހުން ވަޅުލުން ހުޅުމާލެއަށް ބަދަލުކޮށްފައެވެ. އެހެންނަމަވެސް މީހުންގެ ޝަކުވާތަކާއި ގުޅިގެން އެކަން ވަނީ ހުއްޓާލާފައެވެ.

މާލެ ސިޓީގައި މިހާރު މީހުން ވަޅުލަން އޮންނަ ހަމައެކަނި ތަނަކީ އާސަހަރާއެވެ. މިދިޔަ ސަރުކާރުގައި މާލޭގައި މީހުން ވަޅުލުން ހުއްޓާލައި ހުޅުމާލޭގައި މީހުން ވަޅުލާ ގޮތަށް ވެސް ހަމަޖެއްސިއެވެ. ނަމަވެސް ބްރިޖް ނެތުމުން މައްޔިތާ އުފުލުގައި ދަތިތައް ދިމާވުމާ ގުޅިގެން އެކަން ބަދަލުކުރިއެވެ.