ފިލިޕީންސްގައި ހޯމަ ދުވަހު ހިނގި ބަސް އެކްސިޑެންޓެއްގައި 15 މީހުން މަރުވެއްޖެ ކަމަށް އޮފިޝަލުން ބުނެފިއެވެ.

ޕިލިޕީންސްގެ ވެރިރަށް މެނިލާގެ އިރުން އޮންނަ ރިޒަލް ޕްރޮވިންސްގެ ޓެނޭ ޓައުންގައި އެކްސިޑެންޓް ހިނގަން މެދުވެރިވީ ކޮލެޖު ކުދިން ގޮވައިގެން ދިޔަ ބަސް އުސްމަގަކުން މައްޗަށް އެރުމުގެ ތެރޭ އިލެކްޓްރިކް ޕޯސްޓަކާ މުޑިއެރުމުގެ ސަބަބުންނެވެ.

ބަސް އެކްސިޑެންޓުގައި ކޮލެޖްގައި ކިޔަވާ 14 ދަރިވަރުންގެ އިތުރަށް ބަސް ޑްރައިވަރުވެސް މަރުވިއެވެ. ޑްރައިވަރު މަރުވީ އެކްސިޑެންޓުގައި ލިބުނު ޒަޚަމްތަކަށް ހޮސްޕިޓަލުގައި ފަރުވާ ދެމުން ދަނިކޮށެވެ.

ބަހުގައި ދަތުރު ކުރަމުން ދިޔައީ ފިލިޕީންސްގެ ކުއެޒަން ސިޓީގެ ބެސްޓްލިންކް ކޮލެޖުގެ ދަރިވަރުންނެވެ. މި އެކްސިޑެންޓުގައި ޒަޚަމްވި ޕަސެންޖަރުންގެ ރަސްމީ އަދަދު އަދި ހާމަކޮށްފައިނުވާއިރު ކަމާބެހޭ ފަރާތްތަކުން ބުނެފައިވަނީ ބަހުގައި ދަތުރުކުރަމުން ދިޔައީ 58 ޕަސެންޖަރުން ކަމަށެވެ.