ޤާޒީ ސްކޫލުން ހުޅުމާލޭ ގޮނޑުދޮށް ސާފުކޮށްފި
7 މާރިޗު 2019 | ބުރާސްފަތި 12:46މި ހަރަކާތުގެ ދަށުން ސްކޫލްގައި ކިޔަވާ މާއްދާތަކުގެ އަމަލީ ތަޖުރިބާ ކުރެވޭނެ
ގާޒީ ސްކޫލުން ކުރިއަށް ގެންދިޔަ ހުޅުމާލޭ ގޮންޑުދޮށް ސާފުކުރުމުގެ ހަރަކާތުގެ ތެރެއިން
ގާޒީ ސްކޫލުން އިސްނަގައިގެން ހުޅުމާލޭ ގޮނޑުދޮށް ސާފު ކުރުމުގެ ހަރަކާތެއް ކުރިއަށް ގެންގޮސްފިއެވެ.
ރާއްޖެ އެމްވީއަށް މައުލޫމާތު ދެއްވަމުން ގާޒީ ސްކޫލްގެ ޕްރިންސިޕަލް މަރިޔަމް މުހައްމަދު ވިދާޅުވީ ބުރާސްފަތި ދުވަހު ކުރިއަށް ގެންދިޔަ މި ހަރަކާތަކީ ސްކޫލްގައި ކިޔަވައިދޭ މާއްދާތަކާ ގުޅޭ ގޮތުން ކުދިންނަށް އަމަލީ ތަޖުރިބާ ހޯދައި ދިނުމުގެ މަގްސަދުގައްޔާއި، ދަރިންވަރުނެގެ ފަރާތުން އިޖުތިމާއީ ގޮތުން މުޖުތަމައުއަށް ނަމޫނާ ދެއްކުމުގެ ގޮތުން ހިންގުނު ހަރަކާތެއް ކަމަށެވެ.
ސާފު ކުރުމުގެ ހަރަކާތުގައި ބައިވެރިވި ބައެއް ކުދިން
މި ހަރަކާތުގެ ސަބަބުން ކުރިއަށް އޮތް ސްކޫލް ބަންދަށް ކުދިން ދާއިރު އެ ކުދިންގެ ފަރާތުން މެސެޖުތަކެއް އެސަރަހައްދުން ފެންނަން ހުރުމުން ހުޅުމާލެއަށް މޫދަށް އެރެން އަންނަ ފަރާތްތަކަށް އޭގެ ސަބަބުން ރަނގަޅު މެސެޖެއް ދެވޭނެ ކަމަށް ގަބޫލްކުރެވޭ ކަމަށް ޕްރިންސިޕަލް ވިދާޅުވިއެވެ.
ސާފު ކުރުމުގެ ހަރަކާތުގައި ބައިވެރިވި ބައެއް ކުދިން
މީގެ އިތުރުން ވެސް އެ ބޭފުޅާ ވިދާޅުވީ މި ހަރަކާތުގައި ސްކޫލްގެ ފައުންޑޭޝަން ސްޓޭޖުން ފެށިގެން ކީ ސްޓޭޖް ދޭއްގެ ކުދިން ބައިވެރިވެފައި ވާކަމަށާއި، މީގެ އިތުރުންވެސް ހާއްސަ އެހީއަށް ބޭނުންވާ ގާތް ގަނޑަކަށް 39 ކުދިން މި ހަރަކާތުގައި ބައިވެރިވެފައި ވާ ކަމަށެވެ.
އެހެން ކަމުން މި ހަރަކާތަކީ ހުރިހާ ކުދިންގެ ބައިވެރިވުމާ އެކު ކުރިއަށް ގެންދެވުނު ހަރަކާތެއް ކަމަށާއި،މި ހަރަކާތަށް ބެލެނިވެރިންގެ ފަރާތުން ވަރަށް ބޮޑު ތަރުހީބެއް ލިބިގެން ދިޔަކަމަށް ޕްރިންސިޕަލް މަރިޔަމް މުހައްމަދު ވިދާޅުވިއެވެ.
ގާޒީ ސްކޫލްގެ ޕްރިންސިޕަލް ވިދާޅުވީ، ކުރިއަށް އޮތް ތާނގަވެސް މިފަދަ ހަރަކާތް ތަކެއް އެސްކޫލުން ހިންގާނެ ކަމަށެވެ.
