ސައުތު އޭޝިއަން ގޭމްސް ޑިސެމްބަރު މަހަށް ފަސް ކޮށްފިއެވެ.

މާރޗް މަހު ބޭއްވުމަށް މީގެ ކުރިން ތާވަލް ކުރި އޭޝިއަން ގޭމްސް ޑިސެމްބަރު މަހަށް ފަސްކުރަން ނޭޕާލުން ހުށައެޅީ އެ ގައުމުން ގޭމްސްއަށް ތައްޔާރު ކުރަމުން އަންނަ ސްޓޭޑިއަމް ތަކުގެ މަސައްކަތް ނިންމާ ނުވެލުމުންނެވެ.

މާރޗް މަހުގެ އެއްވަނަ ދުވަހު ބޭއްވުނު ސައުތު އޭޝިއަން އޮލިމްޕިކް ކައުންސިލްއިން ބޭއްވި ބައްދަލުވުމުގައި އެޖެންޑާ ކުރެވިފައި އޮތީ، ސެޕްޓެމްބަރު މަހުގެ ތެރޭގައި ސައުތު އޭޝިއަން ގޭމްސް ބާއްވާނެ ތާރީހެއް ކަނޑަ އެޅުމަށެވެ. އެހެން ނަމަވެސް ބައްދަލުވުމުގައި ސަރަހައްދުގެ ގައުމުތަކުން އެއްބަސްވެފައި ވަނީ ޑިސެމްބަރު މަހުގެ އެއްވަނަ ދުވަހުން 10 އަކަށް ގޭމްސް ކުރިއަށް ގެންދިއުމަށެވެ.

ޑިސެމްބަރު މަހަށް ގޭމްސް ލަސްކުރުމުން ބައެއް ގައުމުތަކުން ވަނީ ކަތުމަންޑޫ އާއި ޕޮކާރާ އާދަޔާ ހިލާފަށް ފިނިވާނެތީ އެކަން ފާހަގަ ކޮށްފައެވެ. އެހެން ނަމަވެސް 2016 ވަނަ އަހަރު އިންޑިއާގައި ބޭއްވުނު ގޭމްސްގައި ވެސް ފިނިހޫނުމިން ދަށުގައި ހުރުމުން މި އަހަރުގެ ގޭމްސްއަށް ވެސް މޫސުން މައްސަލައަކަށް ނުވާނެ ކަމަށް ރިޕޯޓްތައް ބުނެއެވެ.

އިންޑިއާގައި 2016 ވަނަ އަހަރު ބޭއްވި، އެންމެ ފަހުގެ ގޭމްސްގައި ރާއްޖޭގެ ދުވުންތެރިޔާ ހަސަން ސާއިދު ވަނީ 100 މީޓަރު ދުވުމުންނާއި 200 މީޓަރު ދުވުމުން ރިހި މެޑަލް ހޯދައިފަ އެވެ. އަދި ފެތުންތެރިޔާ އައިމިނަތު ސަޖަން ވަނީ ލޯ މެޑެއްޔެއް ހާސިލް ކޮށްފައެވެ.

މި އަހަރުގެ ގޭމްސްގައި ރާއްޖެއިން ބައިވެރިވާނީ ފުޓްބޯޅަ، ބާސްކެޓްބޯޅަ، އެތުލެޓިކްސް، ވޮލީބޯޅަ ބެޑްމިންޓަން، ހޭންޑްބޯޅަ، ޝޫޓިން، ސްވިމިން، ޓެނިސް، އަދި މީގެ އިތުރުން ކްރިކެޓާއި ޓޭބަލް ޓެނިސްގައި ކަމަށް މޯލްޑިވްސް އޮލިމްޕިކް ކޮމިޓީން މައުލޫމާތު ދެއެވެ.