ހެލްމެޓު އެޅުމުގެ ޤަވާއިދުތަކާ ޚިލާފުވާނަމަ ފިޔަވަޅު އަޅާނީ އަންނަ މަހުން ފެށިގެން
ހެލްމެޓު ޤަވާއިދަށް އަމަލުކުރާނީ 10 މާރޗުގެ ފަހުން
މާލޭ ބޮޑުތަކުރުފާނު މަގު
ހެލްމެޓު އެޅުމުގެ ޤަވާއިދުތަކާ ޚިލާފުވާނަމަ ފިޔަވަޅުއަޅާނީ އޭޕްރީލް މަހުން ފެށިގެން ކަމަށް މިނިސްޓްރީ އޮފް ޓްރާންސްޕޯރޓް އެންޑް ސިވިލް އޭވިއޭޝަނުން ބުނެފިއެވެ.
އިންޖީނުލީ އެއްގަމު އުޅަނދު ދުއްވަންވީ ދުވެއްޔާބެހޭ ޤަވާއިދަށް އިސްލާހު ގެނައުމުގެ ޤަވާއިދު ބުރާސްފަތި ދުވަހު ސަރުކާރުގެ ގެޒެޓުގައި ޝާއިއުކޮށްފައިވާއިރު، އެ ޤަވާއިދަށް އަމަލު ކުރަން ފަށާނީ 10 މާރޗުން ފެށިގެން ކަމަށާއި، ނަމަވެސް ޤަވާއިދާ ޚިލާފުވާ ފަރާތްތަކާމެދު ފިޔަވަޅުއަޅާނީ އެޕްރީލުން ފެށިގެން ކަމަށް ޤަވާއިދުގައި ބުނެފައިވެއެވެ.
މި މަހުގެ 10 ދުވަހުގެ ފަހުން ތިރީސް ކިލޯމީޓަރަށްވުރެ ބާރަށް އެއްގަމު އުޅަނދު ދުއްވަން ހުއްދަކޮށްފައިވާ ސަރަހައްދުތަކުގައި ދުއްވާ މީހުން ހެލްމެޓު އެޅުން މަޖުބޫރުވާއިރު، ހެލްމެޓުގައި ހުންނަންޖެހޭ ޝަރުތުތައްވެސް އެ ޤަވާއިދުގައި ބަޔާންކޮށްފައިވެއެވެ. އެގޮތުން "A1" އާއި "A0" ގެ އުޅަނދުތަކުން ދުއްވާ ފަރާތްތަކުގެ ހެލްމެޓަކީ ބޮލަށް ހެއުވަރު ހެލްމެޓަކަށް ވުމާއި، ހެލްމެޓު ބޭނުންކުރައްވާ ފަރާތުގެ ދަތްދޮޅި ދަށުން ހަރުކުރެވޭ ގޮތަށް ޚާއްސަ ކަމަރެއް ހަރުކޮށްފައި ހުންނަ ހެލްމެޓަކަށް ވުމާއި، ހެލްމެޓު އުފެއްދި ފެކްޓަރީން އެ ހެލްމެޓެއްގައި ޖައްސާފައިވާ ކުލަ ނޫން ކުލައެއް ނުވަތަ ސޯލްވަންޓެއް ލާފައި ނުވާ ހެލްމެޓަކަށްވުން ފަދަ ޝަރުތުތައް ހިމެނެއެވެ.
އޭގެ އިތުރުން، ހެލްމެޓް ހުންނަންޖެހޭ ގޮތުގެ ނަމޫނާ ކުރެހުންވެސް ޤަވާއިދުގައި ބަޔާންކޮށްފައިވެއެވެ.
ހެލްމެޓް ހުންނަން ޖެހޭ ގޮތުގެ ނަމޫނާ ކުރެހުން
އެ އުސޫލާ ހިލާފުވާ ފަރާތްތައް ފުރަތަމަ ފަހަރަށް 500 ރުފިޔާއިން ޖޫރިމަނާ ކުރާނެ ކަމަށާއި، ދެ ވަނަ ފަހަރު 750 ރުފިޔާއިން ޖޫރިމަނާ ކޮށް، އަދި އޭގެ ފަހުން ގަވައިދާ ހިލާފުވާ ކޮންމެ ފަހަރަކު 1000 ރުފިޔާއިން ޖޫރިމަނާ ކުރެވޭނެ ކަމަށް ގަވައިދުގައި ބުނެފައިވެއެވެ.
ސަރުކާރުން 5000 ހެލްމެޓު ހިލޭ ބަހަން ނިންމާފައިވާއިރު، ހެލްމެޓު ބަހާނީ ޓްރާންސްޕޯރޓް މިނިސްޓްރީން ކުރިއަށްގެންދާ ޚާއްސަ ތަމްރީން ކޯހެއް ފުރިހަމަކުރާ ފަރާތްތަކަށް ކަމަށް އެ މިނިސްޓްރީން ބުނެފައިވެއެވެ. އެގޮތުން ބުރާސްފަތިި ދުވަހު ހެނދުނު ބޭއްވި ރަސްމިއްޔާތެއްގައި 300 ހެލްމެޓު ބަހާފައިވާއިރު، ކުރިއަށްއޮތް ތާނގައި އިތުރު ހެލްމެޓުތައް ބަހާނެ ކަމަށް މިނިސްޓްރީން މައުލޫމާތުދެއެވެ.
ހިލޭ ހެލްމެޓު ބެހުމުގެ ޕްރޮގްރާމްގެ ދަށުން މާލެ ސަރަހައްދަށް 2،500 ހެލްމެޓް ބަހަން ނިންމާފައިވާއިރު، ކުޑަކުދިންނަށް ހާއްސަކޮށްގެން 500 ހެލްމެޓް ބަހަން ވަނީ ނިންމާފައެވެ. އަދި ބާކީހުރި 2،000 ހެލްމެޓް ބަހަން ހަމަޖައްސާފައި ވަނީ ލާމު އަދި އައްޑޫ ސިޓީއަށެވެ.
