ސައުދު ނެންގެވި ފިޔަވަޅު ނަންގަވާނެ އެތައް މެމްބަރުން އެބަތިއްބެވި: ފާރިސް
2 އެޕްރީލު 2017 | އާދީއްތަ 21:09ސައުދު ވަނީ އިދިކޮޅު ފަރާތްތަކާއެކު މަސައްކަތް ކުރައްވަން ނިންމަވާފަ
ދިއްގަރު ދާއިރާގެ މެމްބަރު އަހްމަދު ފާރިސް މައުމޫން
ރައީސް އަބްދުﷲ ޔާމީންގެ ފެކްޝަން ދޫކުރައްވި ވިލިނގިލީ ދާއިރާގެ މެމްބަރަކީ އިސްލާހަށް ލޯބިކުރައްވާ ބޭފުޅެއް ކަމަށާއި އޭނާ އެ ނެންގެވި ފިޔަވަޅު ނަންގަވާނެ އެތައް މެމްބަރުންނެއް ސަރުކާރުގެ ކޯލިޝަންގައި އަދިވެސް އެބަ ތިއްބެވި ކަމަށް، ދިއްގަރު ދާއިރާގެ މެމްބަރު އަހްމަދު ފާރިސް މައުމޫން ވިދާޅުވެއްޖެ އެވެ.
ރާއްޖެޓީވީގެ 60 މިނެޓަށް ދެއްވި އިންޓަވިއުގައި، ރައީސް މައުމޫން އަބްދުލް ގައްޔޫމްގެ ދަރިކަލުން ފާރިސް ވިދާޅުވީ މެމްބަރު ސައުދު ނެންގެވި ފިޔަވަޅަށް އެ ދާއިރާގެ ގިނަ ރައްޔިތުން ވެސް ތާއިދު ކުރައްވާ ކަމަށާއި ވިލިނގިލީ ދާއިރާއަކީ ރައީސް މައުމޫނަށް ވަރަށް ބޮޑު ތާއިދެއް އޮތް ދާއިރާއެއް ކަމަށެވެ. ވިލިނގިއްޔަކީ އާއިލީ ގޮތުންވެސް ގާތް ގުޅުމެއް އޮތް ރަށެއް ކަމަށް ވެސް ފާރިސް ވިދާޅުވި އެވެ.
އިސްލާހީ ހަރަކާތްތަކަށް ސަރުކާރު ކޯލިޝަންގައި ތިއްބެވި ގިނަ މެމްބަރުން ތާއިދު ކުރައްވާ ކަމަށާއި ވަގުތާއި ހާލަތު ހުރި ގޮތުން އެ މެމްބަރުން ފެކްޝަން ދޫނުކުރައްވައި ތިއްބެވީ ކަމަށެވެ. އެ ބޭފުޅުންނަށް "ވަގުތު" ޖެހުމުން ރައީސް ޔާމީން ފެކްޝަން ދޫކުރައްވައި، އިސްލާހީ ހަރަކާތާ ގުޅިވަޑައިގަންނަވާނެ ކަމުގެ ޔަގީންކަން އެބަ އޮތް ކަމަށް ފާރިސް ވިދާޅުވި އެވެ.
ރާއްޖެޓީވީއާ ވާހަކަ ދައްކަވަމުން މެމްބަރު ސައުދު ވިދާޅުވީ، ޕީޕީއެމްގެ ރައީސްއަކީ ރައީސް މައުމޫން އަބްދުލް ގައްޔޫމް ކަމަށް ގަބޫލުކުރައްވާ ކަމަށާއި އެ މަނިކުފާނާއެކު ސާބިތުކަމާއެކު ކުރިއަށް ވަޑައިގަންނަވާނެ ކަމަށެވެ.
ސައުދު އިސްލާހީ ހަރަކާތާ ގުޅިވަޑައިގެންނެވިކަން އިއުލާނު ކުރެއްވީ ފާރިސްއާއެކު އާދީއްތަ ދުވަހުގެ ރޭ އިރައިކޮޅު ބޭއްވި ބައްދަލުކުރެއްވުމަށް ފަހު އެވެ.
ރައްޔިތުންގެ މަޖިލީހުގެ ރައީސް އަބްދުﷲ މަސީހުގެ އިތުބާރު ނެތްކަމުގެ ވޯޓް ނެގި ދުވަހު، މަޑުއްވަރީ ދާއިރާގެ މެމްބަރު މުހައްމަދު އަމީތު ވެސް ވަނީ ރައީސް ޔާމީން ފެކްޝަން ދޫކޮށްލައްވައި، އިސްލާހީ ހަރަކާތާ ގުޅިވަޑައިގެންފަ އެވެ.
މަސީހްގެ އިތުބާރު ނެތްކަމުގެ މައްސަލަ އަލުން މަޖިލީހަށް ވެއްދުމުގެ މަސައްކަތް ކުރަމުންދާއިރު، އެ މައްސަލަ މަޖިލީހަށް ވައްދާނީ، ރޯލް ކޯލް ވޯޓަށް ދިޔަސް ފާސްކުރެވޭނެ ކަމުގެ ފުރިހަމަ ޔަގީން ކަމާއެކުގައި ކަމަށް އިދިކޮޅު މެމްބަރުން ވިދާޅުވެ އެވެ.
ރައީސް ޔާމީންގެ ފެކްޝަން ދޫކުރައްވާ މެމްބަރުން އިތުރުވަމުންދާއިރާއިރު، މަޖިލީހުގައި ސަރުކާރަށް އޮތް ސުޕަ މެޖޯރިޓީ ވަނީ ގެއްލިފަ އެވެ. މިހާރު އެ ކޯލިޝަންގައި 47 މެމްބަރުން ތިއްބެވިއިރު، ރައީސް ޔާމީންގެ ސިޔާސަތު ތަކަށް ތާއިދު ނުކުރައްވާ ކަމަށް ވިދާޅުވާ އެތައް މެމްބަރުންނެއް އެބަ ތިއްބެވި އެވެ. ނަމަވެސް އެ މެމްބަރުންނަށް ފާޅުގައި ނުކުމެވަޑައިގަތުމަށް އަދި ކެރިވަޑައިނުގަންނަވަނީ ކަމަށް، ރާއްޖެއެމްވީއާ ވާހަކަ ދެއްކެވި ބައެއް މެމްބަރުން ވިދާޅުވި އެވެ.
