ރައީސް ޔާމީންގެ އޯޑަރު: އިދިކޮޅު މެންބަރުންނަށް ފިޔަވަޅު އަޅާފައިވިޔަސް، ވޯޓް ނަގާތި!

ރައްޔިތުންގެ މަޖިލީހުގެ ރައީސް އަބްދުﷲ މަސީހުގެ އިތުބާރުގެ މައްސަލައިގައި އިދިކޮޅު މެންބަރުންނަށް ފިޔަވަޅު އަޅާފައިވިޔަސް ހޯމަ ދުވަހު ވޯޓް ނެގުމަށް ރައީސް އަބްދުﷲ ޔާމީން ޕީޕީއެމް ޕާލިމެންޓްރީ ގްރޫޕަށް އެންގެވިކަން ފަޅާއަރައިފި އެވެ.

މަސީހުގެ އިތުބާރުގެ މައްސަލައިގައި ހޯމަ ދުވަހު ބޭއްވި ޖަލްސާ ކުރިއަށް ދިޔަ ވަގުތު ޕީޕީއެމް ޕާލިމެންޓްރީ ގްރޫޕުގެ ވައިބާ ގްރޫޕުގައި ރައީސް ޔާމީން ދައްކަވާފައިވާ ވާހަކަފުޅުގެ ސްކްރީންޝޮޓްތަކެއް ވަނީ އާއްމުވެފައެވެ.

އެ ސްކްރީންޝޮޓްތަކުން ހާމަވާ ގޮތުގައި ޖަލްސާ ކުރިއަށް ދިޔަ ވަގުތު ރައީސް ޔާމީން ވަނީ ޖަލްސާ ކުރިއަށް ގެންދާނެ ގޮތް، ކަމަކަށް ފަހު ކަމެއް ވިދާޅުވެ މެންބަރުންނަށް އިރުޝާދު ދެއްވާފަ އެވެ.

އެގޮތުން ވޯޓަށް އަހަން ކުޑަތަން ވެފައިވަނިކޮށް 1:06 ގައި ރައީސް ޔާމީން ވަނީ ރޯލް ކޯލް އަކަށް ވާތީ ބޭނުން ކުރަންވާ އިބާރާތް ވަރަށް ސާފުކޮށް ރިޔާސަތުން އޮޅުންފިލުވުމަށް މެންބަރުންނަށް އަންގަވާފަ އެވެ.

އެއަށްފަހު 1:09 ގައި ރައީސް ޔާމީން ވަނީ ރިޔާސަތުން އިއުލާނު ކުރާ އިބާރާތް ނޫން އެހެން އިބާރާތެއް ބޭނުން ނުކުރެއްވުމަށް މެންބަރުންނަށް އަންގަވާފަ އެވެ. ރައީސް ޔާމީން ވިދާޅުވެފައިވަނީ އެކަން އެގޮތަށް ކުރަންވީ ފަހުން މައްސަލަ ޖެއްސުމަށް ޖާގަ ނުދިނުމުގެ ގޮތުން ކަމަށެވެ.

މަސީހުގެ އިތުބާރު ނެތްކަމުގެ ވޯޓަށް އެހުމާއެކު އިދިކޮޅު މެންބަރުން އަޑުގަދަކޮށް އިހުތިޖާޖުކުރަން ފެށުމުން 1:51 ގައި ރައީސް ޔާމީން ވަނީ އިދިކޮޅު މެންބަރުންނާ މެދު ފިޔަވަޅު އަޅާފައިވިޔަސް، އެ ޖަލްސާގައި ވޯޓް ނެގެންވާނެ ކަމަށް މެންބަރުންނަށް އަންގަވާފަ އެވެ.

އެއަށްފަހު 1:58 ގައި ރައީސް ޔާމީން ވަނީ ވޯޓަށް އެހުން އެހެން ގަޑިއަކަށް ފަސްކުރިޔަ ވެސް ނުދިނުމަށް މެންބަރުންނަށް އަންގަވާފަ އެވެ. އަދި ވޯޓް އެ ގަޑީގައި ނަގަންޖެހޭ ކަމަށް ރައީސް ޔާމީން ވިދާޅުވެފައިވެ އެވެ.

ރައީސް ޔާމީންގެ އެންގެވުންތަކާ އެއްގޮތަށް ޕީޕީއެމްގެ މެންބަރުން ވަނީ އަމަލުކޮށްފަ އެވެ. ވައިބާ ގްރޫޕުގައި ވެސް ގިނަ މެންބަރުންތަކެއް ވަނީ އެ އެންގެވުންތަކަށް "ޔެސް ސާ" ވިދާޅުވެފަ އެވެ.

މަސީހުގެ އިތުބާރު އޮތް ކަމަށް ހޯމަ ދުވަހުގެ ޖަލްސާއިން ފާސްކުރީ، އިދިކޮޅު ޕާޓީތަކަށް ނިސްބަތްވާ 13 މެންބަރުންގެ ނަން އިއްވައި ގަދަކަމުން މަޖިލީހުން ބޭރުކޮށްލައިގެންނެވެ. ގިނަ މެންބަރުންތަކެއް ޖަލްސާ އިން ނެރުމާއެކު، އިދިކޮޅު ހުރިހާ މެންބަރުން ވަނީ ޖަލްސާ ދޫކޮށް ބޭރަށް ނިކުމެފަ އެވެ.

މަސީހުގެ އިތުބާރު އޮތްތޯ ބެލުމަށް ނެގި ވޯޓުގައި އިދިކޮޅު މެމްބަރުން ބައިވެރިވެ ވަޑައި ނުގަންނަވައެވެ.