ކޮމިޝަންތަކުގެ ބިލް ފާސްނުކުރަނީ މެމްބަރުންގެ މަސްލަހަތު އޮތުމުން ކަމަށް ބެލެވޭ: ރިޔާޒު
25 ފެބުރުއަރީ 2019 | ހޯމަ 11:00ބިލަ ވޯޓަށް އަހަން ބެލި އިރު ގިނަ މެންބަރުންތަކެއް މަޖިލީހުގެ ތަޅުމުގައި ނެތް
ޖޮއިންޓް ޕާލަމެންޓްރީ ގްރޫޕް ލީޑަރ އަބްދުﷲ ރިޔާޒް
ރިޔާސީ ކޮމިޝަންތަކަށް ބާރުދޭ ބިލް މަޖިލީހުން ފާސްނުވެ ލަސްވެގެންދަނީ، ބައެއް މެމްބަރުންގެ މަސްލަހަތު އޮތުމުން ކަމަށް ބެލެވޭ ކަމަށް ޖޮއިންޓް ޕާލަމެންޓްރީ ގްރޫޕް ލީޑަރ ކިނބިދޫ ދާއިރާގެ މެމްބަރު އަބްދުﷲ ރިޔާޒް ވިދާޅުވެއްޖެއެވެ.
ރިޔާސީ ކޮމިޝަންތަކަށް ބާރުދޭ ބިލް ހޯމަދުވަހު އޮތް ރައްޔިތުންގެ މަޖިލީހުގެ ޖަލްސާއަށް ވޯޓަށް އެހުމަށް އެޖެންޑާކޮށް، ބިލަށް ވޯޓަށް އެހި ވަގުތު މަޖިލިސް ތަޅުމުގައި 43 މެމްބަރުން ނެތުމުގެ ސަބަބުން ބިލަށް ވޯޓަށް ނޭހި ހޯމަދުވަހުގެ ޖަލްސާ ވަނީ ނިންމާލާފައެވެ. ވޯޓަށް އަހަން ބެލި އިރު މަޖިލީހުގައި ތިއްބެވީ 42 މެންބަރުން ކަމަށް މަޖިލީހުގެ ރިޔާސަތުން އިއުލާނުކުރެއްވިއެވެ. ރައްޔިތުން އަމަލުކުރަން ލާޒިމްކުރާ ގާނޫނެއް މަޖިލީހުން ފާސްކުރާ ނަމަ، ވޯޓަށް އަހާ ވަގުތު މަޖިލިސް ޗެމްބަރުގައި 43 މެމްބަރުން ތިބެންޖެހެއެވެ.
ޖުމްހޫރީ ޕާޓީގެ ޕާލަމެންޓްރީ ގްރޫޕްގެ ލީޑަރުކަން ވެސް ކުރައްވަމުން އަންނަ ރިޔާޒް ވިދާޅުވީ އެ ބިލަށް ވޯޓަށް އަހަން ބެލި އިރު ކުރިން ތިއްބެވި ބައެއް މެންބަރުން ވެސް ޖަލްސާ ދޫކުރައްވައި ނިކުމެވަޑައިގެންނެވި ކަމަށެވެ. އޭގެ ތެރޭގައި ޖޭޕީ އާއި އެމްޑީޕީ އަށް ނިސްބަތްވާ މެންބަރުން ވެސް ހިމެނޭ ކަމަށް ރިޔާޒް ފާހަގަކުރެއްވިއެވެ.
ރިޔާޒް ވިދާޅުވީ ރިޔާސީ ކޮމިޝަންތަކުގެ ބިލް މަޖިލީހުން ފާސްނުވީ މެމްބަރުންގެ މަސްލަހަތު ހިމެނޭ ކަމަކަށް ވުމުން ކަމަށް ދެކިވަޑައިގަންނަވާ ކަމަށާއި މި ބިލް ފާސްކުރަން ނޭދޭ ސަރުކާރަށް ނިސްބަތްވެވަޑައިގަންނަވާ މެމްބަރުންތަކެއް އެބަތިއްބެވި ކަމަށެވެ.
ހޯމަދުވަހުގެ ޖަލްސާގައި ރިޔާސީ ކޮމިޝަންތަކުގެ ބިލަށް ވޯޓަށް އަހަން އޮތުމުން، އެ ބިލް ފާސްކުރުމަށް ޖޮއިންޓް ޕާލަމެންޓްރީ ގްރޫޕްގެ ދެ ބައްދަލުވުމެއް ބާއްވައި، ތްރީލައިން ވިޕެއް ނެރުނު ކަން ރިޔާޒު ވަނީ ފާހަގަކުރައްވާފައެވެ. ނަމަވެސް ބައެއް މެމްބަރުން މަޖިލީހަށް ހާޒިރުވެވަޑައިގެން، ވޯޓަށް އެހި ވަގުތު ޗެމްބަރަށް ވަދެވަޑައިގެންފައިނުވާއިރު، ބައެއް މެމްބަރުން މަޖިލީހަށް ހާޒިރުވެވަޑައިގެންފައިނުވާ ކަމަށް ރިޔާޒް ވިދާޅުވިއެވެ. އެއީ ކޮން މެންބަރުންނެއްތޯ ބައްލަވާނެ ކަމަށް ރިޔާޒު ވިދާޅުވިއެވެ.
"މަޖިލިހުގައި މިއަދު ބޭއްވި ޖޮއިންޓް ޕީޖީ ބައްދަލުވުމުގައި ވެސް އެބިލްތަކާ ގުޅޭ ތަފާތު ހިޔާލެއް ނެތް. އެބިލްތަކަށް ކުރިން ވެސް ވޯޓްދޭން އޮތީ ނިންމާފައި. އެނިންމުމަށް އަމަލު ނުކުރި މެމްބަރުންނަށް ފިޔަވަޅު އަޅާނެ. އަދިވެސް އެބިލްތައް ފާސްކުރެވިދާނެ ކަމަށް ގަބޫލު ކުރަން. ނަމަވެސް ބޭނުން ވަނީ މެމްބަރުންގެ އިޚްލާސްތެރިކަން،" ރިޔާޒް ވިދާޅުވިއެވެ.
ރިޔާޒް ވިދާޅުވީ އެ ބިލް ފާސްކުރުމުން ރިޔާސީ ކޮމިޝަންތަކަށް ލިބިގެންދަނީ މިހާރު ވެސް ފުލުހުންނާއި އޭސީސީ ފަދަ ކޮމިޝަންތަކަށް ވެސް އޮތް ބާރުތައް ކަމަށާއި އެ ބިލް ފާސް ނުވިޔަސް އިދާރާތަކުން ބޭނުން ނަމަ މައްސަލަތައް ކުރިއަށް ގެންދެވޭނެ ކަމަށެވެ. ނަމަވެސް ބިލް ފާސްވުމުން ކޮމިޝަންތަކަށް ގާނޫނީ އޮނިގަނޑެއް ކަނޑައެޅި މަސައްކަތްތައް ފަސޭހަވެގެންދާނެ ކަމަށެވެ.
ރިޔާސީ ކޮމިޝަންތަކުގެ ބިލް ފާސްނުކޮށް ހޯމަދުވަހު އޮތް މަޖިިލިސް ޖަލްސާ ނިންމާލާފައި ވާތީ، މަރުތައް ބަލާ ކޮމިޝަންގެ ރައީސް ހުސްނުއްސުއޫދު ކުރެއްވި ޓްވީޓެއްގައި ވިދާޅުވެފައި ވަނީ ރައްޔިތުން ވޯޓްދޭން ވާނީ މަޖިލީހަށް ހާޒިރުވުމަށް ވަގުތު ލިބޭނެ ބޭފުޅުން ހޮވަން ކަމަށާއި، ރިޔާސީ ކޮމިޝަންތަކުގެ މަސައްކަތް އަވަސް ކުރުމަށްޓަކައި ބިލްތައް އަވަހަށް ފާސްކުރަންޖެހޭ ކަމަށެވެ.
ރިޔާސީ ކޮމިޝަންތަކުގެ ބިލް ފާސްނުކޮށް މެމްބަރުން ޗުއްޓީއަށް ދިއުމާ ގުޅިގެން، ސަރުކާރުން ވަނީ ދައުރުން ބޭރުން ޖަލްސާއެއް ބާއްވައިގެން ރިޔާސީ ކޮމިޝަންތަކުގެ ބިލް ފާސްކުރުމަށް މަސައްކަތް ކޮށްފައެވެ. ނަމަވެސް މެމްބަރުންގެ ފަރާތުން އެކަމަށް ބޭނުންވާ އެއްބާރުލުމެއް ނުލިބިގެން ވަނީ ބިލް ފާސްނުކުރެވިއެވެ.
