އިންތިހާބީ ކޮރަޕްޝަން ހުއްޓުވުން 2019 ގެ ނަމުގައި އޭސީސީގެ ފަރާތުން ކެމްޕެއިނެއް ފަށައިފި
25 ފެބުރުއަރީ 2019 | ހޯމަ 07:29އާންމުން ހޭލުންތެރިކުރުމަށް މީޑިއާ މެދުވެރިކޮށް ތަފާތު ޕްރޮގުރާމް ހިންގުމަށް ވަނީ ހަމަޖެހިފައި
އެންޓި ކޮރަޕްޝަން ކޮމިޝަނުގެ ބޭއްވި ބައްދަލުވުމެއްގެ ތެރެއިން
ކުރިޔަށް އޮތް ރައްޔިތުންގެ މަޖިލީހުގެ އިންތިހާބާއި ދިމާކޮށް އެންޓި ކޮރަޕްޝަން ކޮމިޝަން ( އޭސީސީ ) ގެ ފަރާތުން " އިންތިހާބީ ކޮރަޕްޝަން ހުއްޓުވުން 2019 " ގެ ނަމުގައި ކެމްޕެއިންއެއް ފަށައިފިއެވެ.
އޭސީސީން ނެރުނު ނޫސްބަޔާނެއްގައި ބުނެފައިވަނީ މި ޕްރޮގުރާމް ހިންގުމުގެ މަގްސަދަކީ ކޮރަޕްޝަންގެ ގެއްލުމުގެ މައްޗަށާއި އިންތިހާބު ތެރޭގައި ހިނގާފާނެ ކޮރަޕްޝަންގެ އަމަލުތަކާއި ގުޅިގެން އާންމުން ހޭލުންތެރިކުރުވައި ، ދައުލަތް ހިންގުމުގައި ތެދުވެރިކަމާއި އަމާނެތްތެރިކަން ކުރިއަރުވައި ކޮރަޕްޝަން ހުއްޓުވުމާއި މަނާކުރުމާއި ގުޅޭގޮތުން އާންމުކޮށް ހާމަކުރަންޖެހޭ ކަންކަން ހާމަކޮށް އިންތިހާބުގައި ނަޒާހަތްތެރިވުމާއި ނަޒާހަތްތެރި ކެންޑިޑޭޓުން އިހްތިޔާރުކުރުމަށް ބާރުއެޅުން ކަމަށެވެ.
އެގޮތުން އާންމުން ހޭލުންތެރިކުރުމަށްޓަކައި ރާއްޖޭގެ ޓީވީ ޗެނަލްތަކާއި އޭސީސީން ސިލްސިލާ ގޮތެއްގައި ކުރިޔަށް ގެންދާ ރޭޑީއޯ ޕްރޮގުރާމް މެދުވެރިކޮށް އިންތިހާބީ ކޮރަޕްޝަން ހުއްޓުވުމަށް މައުލޫމާތު ދިނުމާއި، މީސް މީޑިއާ މެދުވެރިކޮށް ހޭލުންތެރިކުރުމުގެ ތަފާތު މެސެޖުތައް ދިނުމުގެ އިތުރުން ކޮރަޕްޝަނާއި ގުޅޭގޮތުން ތަފާތު ވީޑީއޯ ސްޕޮޓް ތައްޔާރުކޮށް މީޑިއާތަކުން ދެއްކުމަށް ހަމަޖެހިފައިވާކަމަށް ނޫސްބަޔާނުގައިވެއެވެ.
