އަނެއްކާވެސް ހައިވޭގައި އެކްސިޑެންޓެއް ހިނގާ 4 މީހަކަށް އަނިޔާ ވެއްޖެ
އެކްސިޑެންޓް ހިނގާފައިވަނީ ބުރިޖު ހައިވޭގެ 4 ލޭނު ހިމެނޭ ސަރަހައްދު ގައި
ބުރިޖް ހައިވޭ
ހައިވޭގައި ދެ ސައިކަލް ޖެހި ހިނގި އެކްސިޑެންޓްގައި 4 މީހަކަށް އަނިޔާވެފައިވާ ކަމަށް ފުލުހުން ބުނެފިއެވެ.
ރާއްޖެ އެމްވީއާއި ވާހަކަ ދައްކަވަމުން ފުލުހުންގެ މީޑިއާ އޮފިޝަލް ވިދާޅުވީ ހޮނިހިރު ދުވަހުގެ ރޭ ހުޅުމާލެއިން މާލެއަށް ދުއްވާފައި ދިޔަ ދެ ސައިކަލް ޖެހި އެކްސިޑެންޓް ވެފައިވާ ކަމަށާއި އެކްސިޑެންޓް ވީ ބުރިޖު ހައިވޭގެ 4 ލޭނު ހިމެނޭ ސަރަހައްދު ގައި ކަމަށެވެ.
މި އެކްސިޑެންޓްގައި އަނިޔާވި 54 އަހަރުގެ ފިރިހެން މީހާއަށް އައިޖީއެމްއެޗްގައި ފަރުވާ ދީފައިވާއިރު އަނެއް ތިން މީހުންގެ ތެރެއިން 20 އަހަރުގެ ފިރިހެން މީހާ އާއި، 50 އަހަރުގެ ފިރިހެން މީހާއާއި އަދި 21 އަހަރުގެ އަންހެން މީހާ އަށް އޭޑީކޭގައި ފަރުވާ ދީފައިވާ ކަމަށް ފުލުހުން މައުލޫމާތު ދެއެވެ.
މި ހާދިސާގެ މައުލޫމާތު ފުލުހުންނަށް ރިޕޯޓް ކޮށްފައިވަނީ ރޭ ދަންވަރު 12:30 އެހާކަން ހާއިރު ކަމަށާއި މި ހާދިސާ އިތުރަށް ތަހުގީގު ކުރަމުން ދާކަމަށް ވެސް ފުލުހުން ބުނެފައި ވެއެވެ.
މިހާރަކަށް އައިސް މިފަދަ އެކްސިޑެންޓްތައް މާލެ އާއި އަތޮޅުތަކުގައި ގިނަ އަދަދަކަށް ހިނގާ މީހުންގެ ފުރަނައަށާއި އަގުބޮޑެތި މުދަލަށް ގެއްލުން ލިބޭކަން ވަނީ ފާހަގަ ކުރެވިފައެވެ.
އެގޮތުން މިދިޔަ ހަފްތާގެ އަންގާރަ ދުވަހުގެ ރޭ ފުވައްމުލަކު ސިޓީގައި ދެ ސައިކަލެއް ޖެހިގެން ހިނގި އެކްސިޑެންޓެއްގައި ތިން މީހަކަށް އަނިޔާވެފައިވާއިރު ކަފިހި ހުރަހުން މަގު ހުރަސް ކުރަނިކޮށް، 47 އަހަރުގެ އަންހެނަކު އެކްސިޑެންޓްވެ ސީރިއަސް އަނިޔާ ތަކެއް ލިބިފައިވާކަން ފާހަގަ ކޮށްލެވެއެވެ.
