ޕްރޮސެކިއުޓާ ޖެނެރަލް އައިޝަތު ބިޝާމާއި އެކްޓިން ކޮމިޝަނާ އޮފް ޕޮލިސް މުހައްމަދު ހަމީދު މަޖިލީހުގެ ކޮމިޓީތަކަށް ހާޒިރު ކޮށްދިނުމަށް އެދި ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) އަދި ޕީޕަލްސް ނޭޝަނަލް ކޮންގްރެސް (ޕީއެންސީ) އިން  މަޖިލީހަށް ހުށަހަޅައިފި އެވެ.

ބިޝާމް އާއި ހަމީދު މަޖިލީހުގެ އިދާރާއަށް ހާޒިރު ކޮށްދެއްވުމަށް އެދިފައިވަނީ ކެލާ ދާއިރާގެ މެންބަރު އަލީ އާރިފާއި، ގައްދޫ ދާއިރާގެ މެންބަރު އަހުމަދު ރަޝީދާއި، ނައިފަރު ދާއިރާގެ މެންބަރު އަހުމަދު ޝިޔާމްގެ އިތުރުން ވިލިމާލެ ދާއިރާގެ މެންބަރު އަހުމަދު ނިހާން ހުސައިން މަނިކުއެވެ.

ެބޭފުޅުން ވަނީ ދިވެހިރާއްޖޭގެ ރައީސުލް ޖުމްހޫރިއްޔާކަން ކޮށްފައިވާ ކުރީގެ ރައީސް އަބްދުﷲ ޔާމީނާއި މެދު އިންސާފުން އެއްކިބާވެ ފުލުހުންގެ އިދާރާއިން ތަހުގީގުކޮށް ޕީޖީ އޮފީހުން ކްރިމިނަލް ކޯޓަށް ދައުވާ ކުރުމަށް ފޮނުވާފައިވާ މައްސަލަ އަކީ ދިވެހި ރާޢްޖޭގެ ޖުމްހޫރިއްޔާގެ ޤާނޫނު އަސާސީގެ 16 ވަނަ މާއްދާ (ހައްގުތައް ކަށަވަރު ކޮށްދިނުން) އާއި، 17 ވަނަ މާއްދާ (ތަފަތު ނުކުރުން) އާއި، 19 ވަނަ މާއްދާ (މަނާކުރެވިފައި ނުވާ ކަންކަން ކުރުމުގެ މިނިވަންކަން) އާއި، 20 ވަނަ މާއްދާ ( ހަމަހަމަކަން) އާއި، 33 ވަނަ މާއްދާ ( ނަމާއި އަބުރު ރައްކާތެރި ކުރުމުގެ ހައްގު) އާއި، 40 ވަނަ މާއްދާ (މުދާ ހޯދުމާއި މުދާ ގެންގުޅުމުގެ ހައްގު) އާއި، 45 ވަނަ މާއްދާ (ޤާނޫނާއި ޚިލާފަށް ހައްޔަރު ނުކުރުމާއި ބަންދު ނުކުރުން) އާއި އަދި 55 ވަނަ މާއްދާ (މަދަނީ މައްސަލަ ތަކުގައި ބަންދު ނުކުރުން) އާއި ޚިލާފަށް ފުލުހުންގެ ފަރާތުން ހުށަހަޅައިގެން ސިޔާސީ ބޭނުމަކަށްޓަކައި  އުފުލާފައިވާ  ދައުވާއެއް ކަމަށް ވިދާޅުވެފައެވެ.

އެހެންކަމުން ޕްރޮސެކިއުޓަރ ޖެނެރަލް އައިޝަތު ބިޝާމް އާއި ކޮމިޝަނަރ އޮފް ޕޮލިސް މުހައްމަދު ހަމީދު ރައްޔިތުންގެ މަޖިލީހުގެ ގަވާއިދުގެ 123 ވަނަ މާއްދާގެ ދަށުން މިނިވަން މުއައްސަސާ ތަކާއި ބެހޭ ކޮމިޓީއަށް ހާޒިރުކޮށް މިމއްސަލަ ކުރިއަށް ގެންގޮސްދެއްވުމަށް އެދޭ ކަމަށް ހުށަހެޅި ލިޔުމުގައި އެދިލައްވައިފައިވެއެވެ..