ޔުނައިޓެޑް އަރަބް އެމިރޭޓްސް އިން ގަތަރަށް ކަނޑުމަގުން މުދާ ފޮނުވުމުގައި އަޅާފައިވާ ދަތިކުރުމުގެ ފިޔަވަޅުތަކަށް ލުޔެއް ދީފި ކަމަށް ބަނދަރު ހިންގާ ފަރާތްތަކާއި އެ ދާއިރާގެ އޮފިޝަލުންނާ ހަވާލާދީ ބައެއް މަސްދަރުތަކުން ބުނެެފިއެވެ.

ސިޔާސީ އަދި އިގްތިސާދީ ގޮތުން ދަތިކުރުމުގެ ފިޔަވަޅުތަށް އަޅައި ޔޫއޭއީ އިން އޮންނަނީ ގަތަރު ބޮއިކޮޓްކޮށްފައެވެ.

ޔޫއޭއީއާއި، ސައުދީއަރަބިއާ، މިސްރު އަދި ބަހްރެއިނުން ވަނީ ގަތަރުން ޓެރެރިޒަމަށް ވާގިވެރިވާ ކަމަށް ބުނެ އެ ގައުމާ އެކު އޮންނަ ޑިްޕްލޮމެޓިކް ގުޅުމާއި، ވިޔަފާރި އަދި ދަތުރުފަތުރުގެ ގުޅުން ވެސް 2017 ވަނަ އަހަރުގެ ޖޫން މަހުގެ 5 ވަނަ ދުވަހު ކަނޑާލާފައެވެ.

އަބޫދާބީގެ ބަނދަރުން ވަނީ ފެބްރުއަރީ 12 އިން ފެށިގެން ޤަތަރުން އެ ގައުމަށް ވަންނަ މުދަލާއި އަދި ޔޫއޭއީން ޤަތަރަށް މުދާ ފޮނުވުން މަނާކުރެވިފައި އޮތް އޮތުން ނިމުމަކަށް ގެނެސްފައެވެ.

ޤަތަރުގެ ބޯޓް ފަހަރާއި ޤަތަރުގައި ރަޖިސްޓްރީވެފައިވާ ނުވަތަ ޤަތަރުގެ ފަރމަކުން ނުވަތަ ރައްޔިތަކު އޮޕަރޭޓް ކުރާ ބޯޓްފަހަރު ޔޫއޭއީ އަށް ވަނުން މަނާކޮށްފައި އޮންނަ އޮތުމަށް އަދި ވެސް ނިމުމެއް ގެނެސްފައެއް ނުވެއެވެ.

ޔޫއޭއީގެ ބޯޓް ފަހަރަށް ޤަތަރަށް ވަނުން ވެސް އޮތީ މަނާކުރެވިފައެވެ.

ޝިޕިންގް އިންޑަސްޓްރީގެ ބޭފުޅަކު ވަނީ ޔޫއޭއީން ނެރެފައިވާ ސަރކިއުލާ އެގައުމުގެ ހުރިހާ ބަނދަރަކަށް ފޮނުވާފައިވާކަން ރޮއިޓަރސްއަށް ކަށަވަރުކޮށްދީފައެވެ.

ޔޫއޭއީން މިފަދަ ލުޔެއް ދީފައި މިވަނީ ވަރލްޑް ޓްރޭޑް އޯގަނައިޒޭޝަނަށް ހުށަހަޅާފައިވާ މައްސަލައާ ގުޅިގެން ކަމެއް ސާފެއްނުވެއެވެ.