ސިންގަޕޫރުގެ ބްލޮގަރއަކަށް އެމެރިކާއިން ހިމާޔަތްދީފި
25 މާރިޗު 2017 | ހޮނިހިރު 19:12އެމެރިކާގެ ހޯމް ލޭންޑް ސެކިއުރިޓީއިންވަނީ އޭނާއަށް އެސައިލަމް ދިނުމަށް ދެކޮޅު ހަދާފަ
އުމުރުން 18 އަހަރުގެ ޔީ ވަނީ ޑިސެމްބަރު މަހު އެމެރިކާގެ ޝިކާގޯގެ އޯހެއަރ އެއާޕޯޓުން ހައްޔަރުކޮށްފައި
ދީނީ އަދި ސިޔާސީ ކަންކަމަށް ފާޑު ކިއުމާ ގުޅިގެން ދެ ފަހަރެއްގެ މަތިން ޖަލަށް ލީ ސިންގަޕޫރުގެ ބްލޮގަރ އާމޯސް ޔީ އަށް އެމެރިކާއިން ހިމާޔަތްދީފިއެވެ.
އުމުރުން 18 އަހަރުގެ ޔީ ވަނީ ޑިސެމްބަރު މަހު އެމެރިކާގެ ޝިކާގޯގެ އޯހެއަރ އެއާޕޯޓުން ހައްޔަރުކޮށްފައެވެ.
އޭނާ އެ ގައުމަށް ގޮސްފައިވަނީ ޓޫރިސްޓް ވިސާގައި ނަމަވެސް އޭނާވަނީ އެގައުމުން ރެފިޖީއެއްގެ ދަރަޖަ ދިނުމަށް އިމިގްރޭޝަން އޮފިޝަލުން ކިބައިން އެދިފައެވެ.
ހުކުރު ދުވަހު ފަނޑިޔާރު ކަނޑައެޅުއްވި ނިޔާއާއެކު އަވަސް ގޮތެއްގައި އޭނާ މިނިވަން ކުރާނެ ކަމަށް ވަނީ ބެލެވިފައެވެ.
އެމެރިކާގެ ހޯމް ލޭންޑް ސެކިއުރިޓީއިން ވަނީ އޭނާއަށް އެސައިލަމް ދިނުމަށް ދެކޮޅު ހަދާފައެވެ. ނަމަވެސް އިމިގްރޭޝަން ފަނޑިޔާރު ވަނީ އޭނާއާ އެއްކޮޅަށް މައްސަލަ ނިންމަވާފައެވެ.
ފަނޑިޔާރު ސެމުއެލް ކޯލް މައްސަލަ ނިންމަވައި ނެރުއްވާފައިވާ 13 ސަފްހާގެ ބަޔާނުގައި ވިދާޅުވެފައިވަނީ ޔީ އަކީ އޭނާގެ ސިޔާސީ ފިކުރުގެ ސަބަބުން ސިންގަޕޫރުގައި އަދަބު ލިބެމުންދާ މީހެއް ކަމަށެވެ.
އަދި ކުރިޔަށް އޮތްތަނުގައި ވެސް އެ ސަބަބާހުރެ ސިންގަޕޫރުގައި އަދަބު ލިބިދާނެ މީހެއް ކަމަށް ބެލެވޭތީ އޭނާއަށް އެސައިލަމް ދިނުމަށް ނިންމާ ކަމަށެވެ.
