ސްޓޭޓް ޑިޕާޓްމަންޓްގެ އިސް އޮފިޝަލުން އިސްތިއުފާ ދީފި

އެމެރިކާގެ ސްޓޭޓް ޑިޕާޓްމަންޓްގެ ހަތަރު އިސް މުއައްޒަފުން ވަޒީފާ އިން އިސްތިއުފާ ދީފި އެވެ.

ސްޓޭޓް ޑިޕާޓްމަންޓްގެ ހިންގެވުން ވަކި ބޭފުޅަކާއި އަދި ހަވާލުކުރައްވާފައެއް ނުވެ އެވެ. ސެކެޓްރީ އޮފް ސްޓޭޓްގެ މަގާމަށް ޓްރަމްޕް އިހްތިޔާރު ކުރައްވާފައިވާ ރެކްސް ޓިލަސަންގެ ނަން ސެނެޓުން ދަނީ ދިރާސާކުރަމުންނެވެ.

މިހާތަނަށް އިސްތިއުފާ ދެއްވާފައިވަނީ ފޮރިން މިޝަންތަކުގެ މަސައްކަތްތަކާއި ހަވާލުވެވަޑައިގެން ހުންނެވި ގެންޓްރީ ސްމިތް، އަންޑަ ސެކެޓްރީ ފޯ މެނޭޖެްމަންޓް ޕެޓްރިކް ކެނެޑީގެ އިތުރުން ދެ އެސިސްޓަންޓް ސެކެޓްރީންނެވެ. މިހަތަރު ބޭފުޅުންނަކީ ސްޓޭޓް ޑިޕާޓްމަންްޓްގައި ގިނަ ދުވަސްތަކެއް ހިދުމަތް ކުރައްވާފައިވާ ބޭފުޅުންނެވެ.

އާންމު ގޮތެއްގައި ވެރިކަން ބަދަލުވާ އިރު، އެކި ވުޒާރާތަކުގެ އިސް އޮފިޝަލުން ޓްރާންޒިޝަން ޕީރިއަޑްގައި ހަރަކާތްތެރިވެ އެވެ. ސްޓޭޓް ޑިޕާޓްމަންޓްގެ ބޭފުޅުން އިސްތިއުފާ ދެއްވި ސަބަބު ހާމަކޮށްފައެއް ނުވެ އެވެ.