މިސްރުގެ ޕްރޮސިކިއުޓަރެއް މަރާލި މުސްލިމް ބްރަދަރހުޑްގެ ނުވަ މީހަކު ދަންޖައްސާ މަރާލައިފި
20 ފެބުރުއަރީ 2019 | ބުދަ 19:10މި ނުވަ މީހުން ވެސް ދަންޖައްސާފައި ވަނީ، ބުދަ ދުވަހު މިސްރުގެ ވެރިރަށް ގާހިރާގައި ހުންނަ ޖަލެއްގައި
މުސްލިމް ބްރަދަރހުޑްގެ މެމްބަރުން ކުރި މުޒާހަރާއެއްގެ ތެރެއިން
މިސްރުގެ އިސް ޕްރޮސިކިއުޓަރެއް ކަމުގައިވާ ހިޝާމް ބަރަކާތް މަރާލިކަމުގެ ކުށް ސާބިތުވި މުސްލިމް ބްރަދަރހުޑްގެ ނުވަ މީހަކު ދަންޖައްސާ މަރާލައިފިއެވެ.
މި ނުވަ މީހުން ވެސް ދަންޖައްސާފައި ވަނީ، ބުދަ ދުވަހު މިސްރުގެ ވެރިރަށް ގާހިރާގައި ހުންނަ ޖަލެއްގައި ކަމަށް މިސްރުގެ ކަމާއިބެހޭ ފަރާތްތަކުން ވަނީ ބުނެފައެވެ. މިދިޔަ ނޮވެމްބަރު މަހުގެ ތެރޭގައި، މިސްރުގެ އެޕީލްސް ކޯޓުން ވަނީ ބަރަކާތް މަރާލުމުގައި ބައިވެރިވި މީހުންނަށް ދަށު ކޯޓުތަކުން އިއްވާފައިވާ މަރުގެ ހުކުމް ދަމަހައްޓާފައެވެ.
އޭޕީ ނޫސް އެޖެންސީއަށް މައުލޫމާތު ދެމުން މިސްރުގެ އިންޓީރިއަރ މިނިސްޓްރީގެ ފަރާތުން މައުލޫމާރު ދެމުން ބުނެފައިވަނީ މަރުވި މީހުންގެ އާއިލާތަކަށް އެ މީހުންގެ ހަށިގަނޑު ބަލާ އަންނަން އަންގާފައިވާ ކަމަށެވެ.
އިންސާނުންގެ ހައްގުތަކަށް މަސައްކަތް ކުރާ އެމްނެސްޓީ އިންޓަނޭޝަނަލްއިން އެ މީހުން މެރުން ހުއްޓުވުމަށް އެއްމެ ފަހު ވަގުތާއި ޖެހެންދެން ކުރި މަސައްކަތް ވަނީ ނާކާމިޔާބު ވެފައެވެ. އެ ޖަމިއްޔާއިން ބުނެފައިވަނީ ކުށްވެރިންނަށް އަދަބު ލިބެން ޖެހުނެއް ކަމަކު، އަނިޔާ ކޮށްގެން ހޯދާފައިވާ އިއުތިރާފެއްގެ މައްޗަށް ބިނާކޮށް އެއްވެސް މީހަކު މަރާލުން ބަލައެއް ނުގަނެވޭނެ ކަމަށެވެ. އެމްނެސްޓީއިން ވަނީ މި އަހަރުގެ ތެރޭގައި އިތުރު ހަ މީހަކު ވެސް އިންސާފުވެރި ޝަރީއަތަކާއި ނުލައި މިސްރުގެ ސަރުކާރުން މަރާލާފައިވާ ކަމަށް ތުހުމަތުކޮށްފައެވެ.
މިސްރުގެ ސަރުކާރުން ވަނީ މި އަހަރު ފެށުނު ފަހުން 16 މީހަކު ދަންޖައްސާ މަރާލާފައެވެ. އެގޮތުން މިދިޔަ ހަފުތާގެ ތެރޭގައި ވަނީ ފުލުސް އޮފިސަރު ނަބީލް ފަރަގް މަރާލި ތިން މީހަކު ދަންޖައްސާ މަރާލާފައެވެ. އަދި އޭގެ ކުރީ ހަފުތާގައި ވެސް ވަނީ ފަނޑިޔާރެއްގެ ދަރިއަކު މަރާލިކަމުގެ ކުށް ސާބިތުވެގެން ތިން މީހަކު މަރާލާފައިވާ ވެއެވެ. ހިއުމަން ރައިޓްސް ވޮޗްއިން ބުނެފައިވަނީ އެ ތިން މީހުންނަކީ ސިޔާސީ ކުށްވެރިންތަކެއް ކަމަށް ބުނެފައެވެ.
މި ހުރިހާ އެއްމެން ނިސްބަތްވާ ކަމަށް މިސްރުގެ ސަރުކާރުން ބުނާ މުސްލިމް ބްރަދަރހުޑް ޕާޓީ ވަނީ، 2013 ވަނަ އަހަރު އެ ގައުމުގައި ކުރި އަސްކަރީ ބަޢާވާތައް ފަހު މަނާކޮށްފައެވެ. އެ ޕާޓީގެ ލީޑަރު މުރްސީއާއި އެހެން އިސްވެރިންނަށް ވަނީ ދިގު މުއްދަތުގެ ޖަލު ހުކުމް އިއްވާފައެވެ. އަދި އެ ޕާޓީގެ ގިނަ އެކްޓިވިސްޓުންތަކަކަށް ވަނީ މަރުގެ ހުކުމް އިއްވާފައެވެ.
