ކެނެޑާގެ މުސްލިމުން ވަރަށް ބޮޑަށް ބިރުގެންފައިވާ ކަމަށާއި މުސްލިމުންގެ ހިތްތައް ކުދިކުދިވެފައިވާ ކަމަށް ކެނެޑާގެ މުސްލިމުންގެ ހައްގުތަކަށް ވަކާލާތުކުރާ "ނެޝަނަލް ކައުންސިލް އޮފް ކެނޭޑިއަން މުސްލިމްސް" ޖަމާއަތުން ބުނެފިއެވެ.
"ނެޝަނަލް ކައުންސިލް އޮފް ކެނޭޑިއަން މުސްލިމްސް"ގެ ކޮމިއުނިކޭޝަންސް ޑައިރެކްޓާ އާމިރާ އަލްގަވާބީއާ ހަވާލާދީ އެމެރިކާގެ ލޮސް އެންޖެލިީސް ޓައިމްސް އިން މިހެން ބުނެފައިވަނީ، ލޮސް އެންޖެލީސް ޓައިމްސް އަށް އަލްގަވާބީ ދާދި ފަހުން ދެއްވި އިންޓަވިއުއެއްގައެވެ. އަލްގަވާބީ އިތުރަށް ވިދާޅުވީ މީހަކު މިސްކިތަކަށް ވަދެ ހަމަނުޖެހުން ހިންގައި މައުސޫމް ހަ މީހެއްގެ ފުރާނަ ދުއްވާލުމަކީ ހިތްހަލާކުވި ކަމެއް ކަމަށެވެ.
މިދިޔަ ޖެނުއަރީ ފަހުކޮޅު ކެނެޑާގެ ކުބެކް ސިޓީގެ މިސްކިތަކަށް ބަޑި ހިފައިގެން ހުރި ޒުވާނަކު ވަދެ ހަ މީހުން މަރާލާ 19 މީހުން ޒަޚަމްވި ހާދިސާ އިން ދޭހަވެގެން ދަނީ، ރިޕޯޓުތައް ބުނާ ގޮތުން މުސްލިމުންނާ ދެކޮޅު ވިސްނުން ކެނެޑާގައި އިތުރުވަމުންދާ ދިޔުން ކަމަށެވެ.
ކެނެޑާގެ ބޮޑުވަޒީރު ޖަސްޓިން ޓްރުޑޯ ވިދާޅުވެފައިވަނީ މިސްކިތަށް ދެވުނު ހަމަލާ ވަރަށް ބޮޑަށް ކުށްވެރި ކުރައްވާ ކަމަށާއި އަދި އެއީ ޓެރަރިސްޓް ހަމަލާއެއް ކަމަށެވެ.
