އަޅުގަނޑަށް ލިބުނު ހައްގު ނޫން ފައިސާއެއް ނުހުންނާނެ: ރިޔާޒު ރަޝީދު
ރިޔާޒު ވިދާޅުވެފައި ވަނީ އޭނާގެ އެކައުންޓަށް ޖަމާވެފައި އެ ހުރި ފައިސާއަކީ މެރީޑިއަމްގެ ޝެޑު ވިއްކާލައިގެން ލިބުނު ފައިސާ ކަމަށް
ރައްޔިތުންގެ މަޖިލީހުގެ ވިލުފުށީ ދާއިރާގެ މެމްބަރު ރިޔާޒު ރަޝީދު
އެމްއެމްޕީއާރްސީގެ ޚިޔާނާތުގައި އެއްމެ އިސް ރޯލެއް އަދާކުރި އެސްއޯއެފް ޕްރައިވެޓް ލިމިޓެޑުން ވިލުފުށީ ދާއިރާގެ މެންބަރު ރިޔާޒު ރަޝީދާއި އޭނާއަށް ނިސްބަތް ކުރެވޭ އެއްވެސް ބަޔަކަށް ނުވަތަ ކުންފުންޏަކަށް ވެސް ލިބުނު ހައްގު ނޫން ފައިސާއެއް ނުހުންނާނެ ކަމަށް އޭނާ ވިދާޅުވެއްޖެއެވެ.
ރިޔާޒްގެ އެކައުނަޓަށް އެސްއޯއެފް އިން ފައިސާ ޖަމާކޮށްފައިވާކަން އޭސީސީގެ ތަހުގީގަށް ހާމަވެފައިވާ މައްސަލައަށް ރައްދު ދެއްވަމުން ބަޔާނަކާ އެކު ކުރެއްވި ޓްވީޓްއެއްގައި ރިޔާޒު ވިދާޅުވެފައި ވަނީ އޭނާގެ އެކައުންޓަށް ޖަމާވެފައި އެ ހުރި ފައިސާއަކީ މެރީޑިއަމްގެ ޝެޑު ވިއްކާލައިގެން ލިބުނު ފައިސާ ކަމަށެވެ.
ބުރާސްފަތި ދުވަހު އޭސީސީން ނެރުނު އެމްއެމްޕީއާރްސީގެ ހިޔާނާތުގެ ރިޕޯޓުގައިވާ ގޮތުން 8 ޑިސެމްބަރު 2014 ގައި އެސްއޯއެފްގެ އެކައުންޓަކުން 455،000 (ހަތަރު ލައްކަ ފަންސާސް ފަސް ހާސް) ޑޮލަރު ރިޔާޒު ރަޝީދު އިސްލާމިކް ބޭންކުގައި ހުޅުވާފައިވާ ޑޮލަރު އެކައުންޓަކަށް ޖަމާކޮށްފައި ވެއެވެ. އަދި އޭނާގެ ނަމުގައި ބޭންކް އޮފް މޯލްޑިވްސްގައި ހުޅުވާފައިވާ ޑޮލަރ އެކައުންޓަށް 21 އެޕްރިލް 2015 ގައި އެސް.އޯ.އެފް ޕްރައިވެޓް ލިމިޓެޑްއިން 100،000 (އެއް ލައްކަ) ޑޮލަރު ޖަމާކޮށްފައި ވެއެވެ. މީގެ އިތުރުން ރިޔާޒުގެ އާއިލީ މަސްލަހަތު އޮންނަ ޕޮޕިއުލަރ މޯލްޑިވްސް ޕްރައިވެޓް ލިމިޓެޑް ނަމަކަށް ކިޔާ ކުންފުންޏަކުން ސްޓޭޓް ބޭންކް އޮފް އިންޑިއާގައި ހުޅުވާފައިވާ އެކައުންޓަކަށް 13 ޖުލައި 2015 ގައި އެސްއޯއެފް ޕްރައިވެޓް ލިމިޓެޑްއިން 150،000 (އެއް ލައްކަ ފަންސާސް ހާސް) ޑޮލަރު ޖަމާކޮށްފައި ވެއެވެ.
އެސްއޯއެފް އިން ރިޔާޒު ރަޝީދުގެ އެކައުންޓަށް ޖަމާކުރި ފައިސާގެ ތަފްސީލް
މައްސަލައާ ގުޅިގެން އޭސީސީއަށް ރިޔާޒު ދެއްވި ބަޔާނުގައި ވިދާޅުވެފައި ވަނީ އެސްއޯއެފް އިން އޭނާގެ އެކައުންޓަށް ޖަމާކުރި 455،000 ޑޮލަރަކީ މެރީޑިއަމް ސަރވިސަސް ޕްރައިވެޓް ލިމިޓެޑުން ހިންގަމުން ގެންދިޔަ ފިއުލް ޑިސްޕެންޝަން ސްޓޭޝަން "މެރީޑިއަމް ފިލިންގް" އެސްއޯއެފް ޕްރައިވެޓް ލިމިޓެޑްއަށް ވިއްކުމުގެ އަގުގެ ގޮތުގައި ލިބިފައިވާ ފައިސާ ކަމަށެވެ.އަދި 21 އެޕްރިލް 2015 ގައި އެސްއޯއެފް ޕްރައިވެޓް ލިމިޓެޑުން ޖަމާކުރި 100،000 ޑޮލަރު އެއީ އެސްއޯއެފް އިން ޑޮލަރު ގަނެފައިވާ ފައިސާ ކަމަށް ވެސް ރިޔާޒު ރަޝީދުގެ ބަޔާނުގައި ވެއެވެ.
ތ. އޮޅުގިރީގެ އެކުއިޒިޝަން ކޮސްޓް ޕޮޕިއުލަރ މޯލްޑިވްސް އިން ހަމަކުރި ގޮތުގެ ތަފްސީލް
މީގެ އިތުރުން އޭނާގެ އާއިލީ ހިއްސާ އޮންނަ ޕޮޕިއުލަރ މޯލްޑިވްސް ޕްރައިވެޓް ލިމިޓެޑަށް ޖަމާކޮށްފައިވާ ފައިސާއާ ބެހޭ އެއްވެސް މައުލޫމާތެއް ނޭނގޭ ކަމަށް ރިޔާޒު ވިދާޅުވި އިރު، އެ ކުންފުނީގެ އެއް ހިއްސާދާރު ބުނެފައި ވަނީ އެ ފައިސާއަކީ ޑޮލަރު ގަތުމަށް އެސްއޯއެފްއާ އެކު ކުރި މުއާމަލާތެއްގެ ފައިސާ ކަމަށެވެ. ޕޮޕިއުލަރ މޯލްޑިވްސް ޕްރައިވެޓް ލިމިޓެޑަކީ ރިޔާޒްގެ ދެ ކުދިން ހިއްސާވާ ކުންފުންޏެއް ކަމަށާއި އެ ކުންފުންޏާ އޭނާއާ ދެމެދު އެއްވެސް ވިޔަފާރީގެ މުޢާމަލާތެއް ކޮށްފައި ނުވި ނަމަވެސް އެ ކުންފުންޏަށް ފައިސާ ދޭކަމަށް އޭސީސީގެ ރިޕޯޓުގައި ރިޔާޒާ ހަވާލާދީ ބަޔާންކޮށްފައި ވެއެވެ.
ރިޔާޒު ރަޝީދު އޭސީސީއަށް ދެއްވި ބަޔާނުގައި އޭނާގެ އަމިއްލަ ނަމުގައި އެއްވެސް ވިޔަފާރިއެއް ނުކުރައްވާ ކަމަށާއި އަދި އެއްވެސް ކުންފުންޏެއްގައި އޭނާގެ ޙިއްޞާއެއް ވެސް ނުވާނެ ކަމަށް ވެސް ވަނީ ވިދާޅުވެފައެވެ. ނަމަވެސް އޭސީސީގެ ތަހުގީގު ރިޕޯޓުގައިވާ ގޮތުން ރިޔާޒުގެ އާއިލީ ހިއްސާ އޮންނަ ޕޮޕިއުލަރ މޯލްޑިވްސް އަށް 7 ޖޫން 2015 ގައި އެމްއެމްޕީއާރްސީގެ އޭރުގެ މެނޭޖިންގ ޑިރެކްޓަރ ޢަބްދުالله ޒިޔަތު ސޮއިކުރައްވައި އެ ކުންފުނިން ފޮނުވި ސިޓީގައި ރިޔާޒު ރަޝީދަށް ނިސްބަތްކޮށްފައި ވަނީ ކުންފުނީގެ ޗެއަރމަންގެ ގޮތުގައެވެ.
މީގެ އިތުރުން ޕޮޕިއުލަރ މޯލްޑިވްސް ޕްރައިވެޓް ލިމިޓެޑުން އެމްއެމްޕީއާރްސީން ދޫކުރި ތ. އޮޅުގިރީގެ އެކުއިޒިޝަން ކޮސްޓްގެ ގޮތުގައި ދީފައިވާ ފައިސާއަކީ މެރީޑިއަންގެ ޝެޑު ވިއްކާލައިގެން ލިބުނު ފައިސާކަން ހާމަކޮށްފައެވެ. އަދި ރިޔާޒު އަމިއްލަފުޅަށް ޝައުގުވެރިކަން ފާޅުކޮށްގެން ތ. އޮޅުގިރި ހޯދަން މަސައްކަތްކުރެއްވި ކަމުގައިވީ ނަމަވެސް، އޭނާ ޕޮޕިއުލަރ މޯލްޑިވްސް އަށް ދެއްވި ފައިސާއަކީ ކީއްކުރަން ބޭނުންކުރި ފައިސާއެއް ކަން އޭނާ އަށް ނޭނގޭ ކަމަށް ވިދާޅުވެފައިވާ ކަމަށް ވެސް އޭސީސީގެ ރިޕޯޓުން ވަނީ ފާހަގަކޮށްފައެވެ.
އޭސީސީން ނެރުނު ރިޕޯޓްގައިވާ ގޮތުން އެމްއެމްޕީއާރުސީން 57 ރަށަކާއި ފަޅެއް ދޫކޮށްފައި ލިބުނު ފައިސާގެ ތެރެއިން އެކުއިޒިޝަން ކޮސްޓްގެ ގޮތުގައި 77.5 މިލިއަން ޑޮލަރު ލިބެން ޖެހޭ އިރު އެމްއެމްޕީއާރުސީގެ އެކައުންޓަށް ޖަމާކޮށްފައި ވަނީ އެންމެ 12.5 މިލިއަން ޑޮލަރު (192.75 މިލިއަން ރުފިޔާ) އެވެ. ހިޔާނާތްވީ ފައިސާގެ ތެރެއިން ބޮޑު ބައެއް ޖަމާކޮށްފައި ވަނީ އެސްއޯއެފްގެ އެކައުންޓަށެވެ. އަދި އެސްއޯއެފް އިން ވަނީ އެ ފައިސާތައް އެކި މީހުންނާއި ކުންފުނިތަކުގެ އެކައުންޓްތަކަށް ޖަމާކޮށްފައެވެ. މީގެ ތެރޭގައި ރާއްޖޭގެ ބޮޑެތި ކުންފުނިތަކާއި، މަޖިލިސް މެމްބަރުންނާއި، ވިޔަފާރިވެރިން އަދި މިހާރު ސަރުކާރުގައި ތިއްބެވި ބައެއް ބޭފުޅުން ވެސް ހިމެނިވަޑައިގަންނަވައެވެ.
