ސިޔާސީ ޕާޓީތަކުން ރަސްމީކޮށް ބޭނުންކުރާ ކުލަ އެހެން ފަރާތްތަކުން ސިޔާސީ ހަރަކާތްތަކުގައި ބޭނުންކުރުމަކީ ޤާނޫނީ ކުށެއް ކަމަށް އިލެކްޝަންސް ކޮމިޝނުން ބުނެފިއެވެ.
އާދިއްތަ ދުވަހު އެ ކޮމިޝަނުގެ ރައީސް އަހުމަދު ޝަރީފް ކުރެއްވި ޓްވީޓެއްގައި ވަނީ، ސިޔާސީ ޕާޓީތަކުން ސިޔާސީ އެކި ހަރަކާތްތަކުގައި ރަސްމީކޮށް ބޭނުންކުރާ ކުލަ އެހެން ސިޔާސީ ޕާޓީއަކުން ނުވަތަ އަމިއްލަ ފަރާތަކުން ވިޔަސް، އެޕާޓީއެއްގެ ހުއްދަ ނެތި ސިޔާސީ ކަމެއްގައި ބޭނުންކުރުމަކީ ޤާނޫނީ ކުށެއް ކަމަށެވެ. އަދި އެކަމަށް ސަމާލުވުމަށް ވެސް ޝަރީފްގެ ޓްވީޓުގައި ވިިދާޅުވެފައި ވެއެވެ.
Siyaasee party akun siyaasee harakaithakuga rasmeekoh beynun kuraa kula ehen siyaasee party thakunaai ammila faraithakun e party ge huhdha nethi beynun kurumakee gaanoonee kusheh, mikamah samaaluve lahvaa
— Ahmed Shareef (@ShareefRangondi) February 10, 2019
އެކަމާ ގުޅިގެން "ރާއްޖެއެމްވީ"އަށް މައުލޫމާތު ދެއްވަމުން އެ ކޮމިޝަނުގެ މެމްބަރު އަހުމަދު އަކުރަމް ވިދާޅުވީ، ސިޔާސީ ޕާޓީތަކުގެ އިތުރުން އިންތިހާބުތަކާއި އެކި ސިޔާސީ ހަރަކާތްތަކުގައި ބައިވެރިވާ އަމިއްލަ ފަރާތްތަކުން ވެސް އެހެން ސިޔާސީ ޕާޓީއެއްގެ ރަސްމީ ކުލަ ހުއްދަ ނެތި ބޭނުންކުރުމަކީ މަނާ ކަމެއް ކަމަށެވެ.
ޝަރީފް އެހެން ވިދާޅުވެފައިވާއިރު، ސިޔާސީ ޕާޓީތަކުގެ ކަންކަން މޮނިޓަރކޮށް، ހިންގުމުގެ ކަންކަން ބެލުމަށްޓަކައި އިލެކްޝަންސް ކޮމިޝަނުން ވަނީ އައު ގަވައިދެއް އެކުލަވާލާފައެވެ. އެ ޤަވާއިދު އެކުލަވާލީ ރާއްޖޭގެ ހާލަތަށް ބަލައި، އަދި ވޭތުވެދިޔަ މާޒީގައި ކަންތައްތައް ވެފައިވާ ގޮތަށް ބެލުމަށް ފަހުގައި ކަމަށާއި، ސިޔާސީ ޕާޓީތަކަށް ދިމާވާ އުދަނގޫތަކަށް ހައްލު ހޯދައިދިނުން އެ ޤަވާއިދުގައި ހިމަނާފައިވާކަން ޝަރީފް ފާހަގަކުރެއްވިއެވެ.
ޝަރީފް މި ޓްވީޓްކުރައްވާފައި މި ވަނީ ކުރިއަށް އޮތް ރިޔާސީ އިންތިޚާބުގައި ވާދަކުރާ ބައެއް ފަރާތްތަކުން ސިޔާސީ ޕާޓީތަކުގެ ހުއްދަ ނެތި އެ ޕާޓީތަކުގެ ކުލަތައް ކެމްޕެއިންގައި ބޭނުންކުރާ ކަމުގެ ޝަކުވާތައް ފެންމަތިވެފައި ވަނިކޮށެވެ.
