އެކި ފަންތިތަކުގެ މީހުންނަށް ހާއްސަކޮށްގެން ގެދޮރު ބިނާކުރަން ޖެހޭ: އަސްލަމް
7 ފެބުރުއަރީ 2019 | ބުރާސްފަތި 14:03ހުރިހާ ރައްޔިތުން ގެދޮރިވެރި ކުރުވޭނެ ކަމުގެ ޔަގީންކަން އެބަ އޮތް ކަމަށް އަސްލަމް ވިދާޅުވި
މިނިސްޓަރު އަސްލަމް ރާއްޖެޓީވީގައި ވާހަކަ ދައްކަވަނީ
ރާއްޖޭގެ ހުރިހާ ރައްޔިތުން ގެދޮރުވެރި ކުރެވޭނީ، އެކި ފަންތީގެ މީހުންނަށް ހާއްސަކޮށްގެން ގެދޮރު ބިނާކޮށްގެން ކަމަށް މިނިސްޓަރ އޮފް ޕްލޭނިންގް އެންޑް އިންފްރާސްޓަރަކްޗަރ މުހައްމަދު އަސްލަމް ވިދާޅުވެއްޖެއެވެ.
ބުރާސްފަތި ދުވަހު ރާއްޖެޓީވީއަށް ދެއްވި އިންޓަވިއުއެއްގައި އަސްލަމް ވިދާޅުވީ، އެއްމެން ގެދޮރިވެރި ކުރުވޭނެ ކަމުގެ ޔަގީންކަން އެބަ އޮތް ކަމަށާއި ގެދޮރުވެރިކުރުމަށް އޮތް އެންމެ ބޮޑު ގޮންޖެހުމަކީ މި ވަގުތު ބާޒާރުގައި ލިބެން ހުރި އެޕާޓްމަންޓްތަކަކީ ރާއްޖޭގެ އާބާދީގެ ބޮޑު ބައެއްގެ އާމްދަނީއާ ނުބައްދަލު އަގުތަކަކަށް ވުން ކަމަށެވެ.
"ތިން ކޮޓަރީގެ 1000 އަކަފޫޓުގެ ފްލެޓެއް 3 މިލިއަން، 3.5 މިލިއަން ރުފިޔާއަށް ބާޒާރުގައި ގަންނަން އެބަހުރި ލިބެން. އެކަމަކު ދިވެހި ކިތައް އާއިލާއަށްތޯ އެ ގަނެވެނީ،" އަސްލަމް ސުވާލުކުރެއްވިއެވެ.
މާލޭގައި ދިރުއުޅޭ ފަގީރު އަދި މެދު ފަންތީގެ އާއިލާތަކަށް އިޝާރާތް ކުރައްވާ އަސްލަމް ވިދާޅުވީ، އެ އާއިލާތަކަށް އޮތް ބޯހިޔާވަހިކަމުގެ މައްސަލައަށް ހައްލެއް ގެނެވޭނީ އެ އާއިލާތަކަށް ލިބޭ އާމްދަނީއާ ބައްދަލު އަގުތަކެއްގައި ގެދޮރު ބިނާކުރެވިގެން ކަމަށެވެ.
އަސްލަމް ވަނީ މިހާރު 3.5 މިލިއަން ރުފިޔާއަށް ބާޒާރުގައި ލިބެން ހުރި ގެދޮރުގެ އަގުތައް 1.5 މިލިއަން ރުފިޔާއަށް ތިރިކުރައްވާނެ ކަމުގެ ޔަގީންކަން އަރުވާފައެވެ. އެގޮތުން އިމާރާތްކުރަން ޑިވޮލޮޕަރުންނާއި ބަންޑާރަ ބިން ހަވާލުކުރާ އިރު ރެންޓް ކޮންޓްރޯލް ކުރަން ޝަރުތު ކުރެވޭނެ ކަމަށާއި ހައުސިންގ ލޯނުގެ އިންޓްރެސްޓް ވެސް ތިރިކުރެވޭނެ ކަމަށް އަސްލަމް ވިދާޅުވިއެވެ.
"އިރާދަކުރެއްވިއްޔާ ހައުސިންގ ލޯނުގެ އިންޓްރެސްޓް ރޭޓް އަޅުގަނޑުމެން 6 ޕަސެންޓަށް ތިރިކުރާނަން. 6 ޕަސެންޓަށް ތިރިކޮށްފައި 1.5 މިލިއަން ރުފިޔާއަށް ގެއެއް ގަންނަން ހުރި ގެއެއް ގަތީމާ، ލޯނު ނަގާ ފަރާތަށް ދައްކަން ޖެހެނީ 10000 ވަރަކަށް ރުފިޔާ" އަސްލަމް ވިދާޅުވިއެވެ.
އެއްމެ ފަގީރު އާއިލާތަކަށް ހާއްސަކޮށްގެން ސޯޝަލް ހައުސިންގ ނުވަތަ ކައުންސިލް ހައުސިންގ ޔުނިޓްތަކެއް އަޅަން ނިންމާފައިވާ ކަމަށާއި، މި އިމާރާތްތަށް އަޅާނީ ސަރުކާރުން ކަމަށް ވެސް އަސްލަމް ވަނީ ވިދާޅުވެފައިއެވެ.
މާލެ ތޮއްޖެހުމުގެ މައްސަލައަށް ވާހަކަދައްކަވަމުން އަސްލަމް ވިދާޅުވީ އެ މައްސަލައަށް އޮތް ހަމައެކަނި ހައްލަކީ އަތޮޅުތައް ތަރައްގީ ކުރުން ކަމަށެވެ. އަސްލަމް ވިދާޅުވީ ރާއްޖޭގެ އާބާދީގެ 38 އިންސައްތަ މިހާރު ވެސް މާލޭގައި އުޅޭއިރު، މި މައްސަލަ ހައްލުކުރުމަށް ސަރުކާރުގެ އަމާޒު ހުރީ އަލަށް އާބަދުވާ ހުރިހާ ފަރާތްތައް ހުޅުމާލޭގައި އާބާދަކުރުން ކަމަށް އަސްލަމް ވިދާޅުވިއެވެ.
މާލޭގެ ޕާކިން މައްސަލައަށް ހައްލެއް ގެނައުމުގެ ގޮތުން، މާލޭގައި ހުރި ހުސްބިންތަކުގައި ސަރުކާރުގެ އެއްވެސް އިމާރާތެއް ދެން ނާޅާނެ ކަމަށާއި، މަސައްކަތް ކުރަމުން މި ދަނީ ހުސް ބިންތަކުގައި ޕާކް ކުރުވޭނެ ގޮތަށް ޕާކުތަކެއް ހެދުމަށް ކަމަށް އަސްލަމް ވިދާޅުވިއެވެ. އެގޮތުން މިހާރު ވެސް ފިނޭސްސް މިނިސްޓްރީ ވަށާ އޮތް ހުސްބިމުގައި ޕާކެއް އެޅުމުގެ މަސައްކަތް ކުރަމުންދާ ކަމަށް އަސްލަމް ހާމަކުރެއްވިއެވެ.
މާލޭގެ ކަންކަން މިހާ ހިސާބަށް އައީ ދުރާލާ ކަންކަން ރޭވިގެން ކުރެވިގެން އައިސްފައި އޮތުމުން ކަމަށް ވުމުން، އަސްލަމް ވަނީ މާލެ ވެސް ހިމިނޭ ގޮތަށް މުޅި ރާއްޖެ ތަރައްގީ ކުރުމަށް "ސްޕޭޝަލް ޑިވޮލޮޕްމަންޓް" ޕްލޭނެއް ތައްޔާރު ކުރުމުންދާ ކަމަށް ވިދާޅުވެފައެވެ. އަދި ކުރިޔަށް އޮތް އެއް މަސް ދުވަހުގެ ތެރޭގައި ރައްޔިތުންނަށް މުޅި ރާއްޖެއަށް މި ސަރުކާރުން ގެންގުޅޭ ތަރައްގީގެ ތަސައްވުރު ހާމަކުރައްވާނެ ކަމަށް އަސްލަމް ވިދާޅުވިއެވެ.
"އަޅުގަނޑުމެން ދާދި އަވަހަށް ނިންމާނެ ދިވެހިރާއްޖޭގެ ތަރައްގީގެ ތަސައްވަރު، މުޅި ރާއްޖެ ތަރައްގީ ކުރުމަށް ސަރުކާރުގެ ވިސްނުން އޮތް ގޮތް. ރާއްޖޭގެ އެހެން ސަރަހައްދުތައް ތަރައްގީ ވެގެން މާލޭގެ މައްސަލައަށް ވެސް ޖުމުލަ ހައްލެއް ލިބެން އޮތީ" އަސްލަމް ވިދާޅުވިއެވެ.
އަސްލަމް މިހެން ވިދާޅުވިއިރު، މި އަހަރުގެ ރިޔާސީ ބަޔާން އިއްވަވަމުން ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވަނީ ހުޅުމާލޭގައި އިތުރު 4000 ހައުސިން ޔުނިޓާއި އަތޮޅު ތެރޭގައި އިތުރު 550 ހައުުސިންގ ޔުނިޓް އެޅުމުގެ މަސައްކަތް ފެށިގެން ދާނެ ކަމަށް ވިދާޅުވެފައެވެ.
