ރެހެންދި އެވޯޑަށް ފިރިހެނުންނަށްވެސް ކުރިމަތިލެވޭގޮތަށް ބަދަލުކޮށް އެވޯޑަށް ކުރިމަތިލުމުގެ ފުރުސަތު މިނިސްޓްރީ އޮފް ޖެންޑަރ، ފެމެލީ އެންޑް ސޯޝަލް ސަރވިސަސްއިން އަލުން ހުޅުވާލައިފިއެވެ.

އެމިނިސްޓްރީން ކޮށްފައިވާ އިއުލާނެއްގައި ބުނެފައިވަނީ 31 ޖަނަވަރީ 2019 ވަނަ ދުވަހު ކުރެވުނު ޢިއުލާނު ބާތިލްކޮށް އަލުން އެފުރުސަތު ހުޅުވާލާފައިވާ ކަމަށެވެ. 

އެވޯޑަށް ކުރިމަތިލުމަށް އަލުން ހުޅުވާލާފައިވަނީ ހޯމަ ދުވަހުން ފެށިގެން މިމަހުގެ 14ވަނަ ދުވަހުގެ 14:00 ގެ ނިޔަލަށެވެ. 

އެވޯޑަށް ކުރިމަތިލުމަށް އަމިއްލައަށް ނަން ހުށަހެޅުމުގެ ފުރުޞަތާއި، އެހެން ފަރާތަކުން ނަން ހުށަހެޅުމުގެ (ނޮމިނޭޓް ކުރުމުގެ) ފުރުޞަތު އަދި މުއައްސަސާ، އޮފީސް އަދި ކުންފުނިތަކުން ނަން ހުށަހެޅުމުގެ ފުރުޞަތު ވަނީ ހުޅުވާލެވިފައެވެ. މި އެވޯޑަށް އެދި ހުށަހަޅާ ފަރާތްތަކުން ހުށަހަޅަންޖެހޭ ތަކެތީގެ ތަފްސީލު ރެހެންދި އެވޯޑަށް ނަން ހުށަހަޅާ ފޯމުގައި ވަނީ ހިމަނާފައެވެ.

އަންހެނުންގެ ތަރައްޤީއާއި، އަންހެނުން ބާރުވެރިކުރުވުމާއި ޖެންޑަރ މެއިންސްޓްރީމް ކުރުމުގެ ދާއިރާގައި 10 އަހަރަށްވުރެ މަދުނޫން މުއްދަތަކަށް މަސައްކަތް ކޮށްފައިވާ ފިރިހެނުންނަށް މިހާރު ރެހެންދި އެވޯޑަށް ކުރިމަތިލެވޭނެއެވެ.

މީގެ އިތުރުން ދެ ދާއިރާއަކުން ހަތް ފަރާތަކަށް އެވޯޑް ދިނުމަށް ހަމަޖެހިފައިވެއެވެ.

އެވޯޑް ދޭނެ ފުރަތަމަ ކެޓަގަރީ އަކީ އާއްމު ފަރުދުންނަށް ކުރިމަތިލެވޭ ކެޓަގަރީއެވެ. މިކެޓަގަރީގެ ދަށުން ސިޔާސީ ދާއިރާ، އިޤްތިޞާދީ ދާއިރާ، އިޖްތިމާޢީ ދާއިރާ، އަދާކުރާ ވަޒީފާގެ ގޮތުން އޮފީހަށް ނުވަތަ ދާއިރާއަށް ކޮށްދީފައިވާ ޚިދުމަތް (އެކްސެޕްޝަނަލް އިންސްޓިޓިއުޝަނަލް ސަރވިސް) އަންހެނުން ޢާންމުކޮށް ކޮށްނޫޅޭ މަސައްކަތްތައް ނުވަތަ "ނޮން-ޓްރެޑިޝަނަލް ރޯލްސް"ގެ ދާއިރާ އިން އެވޯޑް ދޭނެއެވެ.

މީގެ އިތުރުން ވަޒީދޭ ފަރާތްތައް ނުވަތަ އިދާރާތައް ނުވަތަ މުއައްސަސާތަކަށް ހާއްސަ ކޮށްފައިވާ ކެޓަގަރީގެ ދަށުން ވަޒީފާދޭ ފަރާތްތަކުގެ ތެރެއިން އަންހެނުންގެ ތަރައްޤީއާއި، އަންހެނުން ބާރުވެރިކުރުވުމާއި ޖެންޑަރ މެއިންސްޓްރީމް ކުރުމުގެ ދާއިރާ އަދި ވަޒިފާދޭ އިދާރާތަކާއި މުއައްސަސާތަކަށްވެސް ކުރިމަތިލެވޭނެ ގޮތައް ވެސް އެވޯޑް ދޭނެއެވެ.

ރެހެންދި އެވޯޑަކީ ޖެންޑަރ މިނިސްޓްރީއިން 2014 ވަނަ އަހަރުން ފެށިގެން ދެމުން އަންނަ އެވޯޑެކެވެ. މި އެވޯޑު ދިނުމުގެ މަޤްސަދަކީ މުޖުތަމައު އާއި ޤައުމުގެ ތަރައްޤީ ލާބަޔާ މަންފާ ލިބޭފަދަ އަގުހުރި ހިދުމަތްތަކެއް ކޮށްފައިވާ ފަރާތްތަކުގެ އަގުވަޒަން ކުރުން ކަމަށް މިނިސްޓްރީއިން ބުނެއެވެ.