ސްޓެމް ސެލް ތެރަޕީއަށް ރާއްޖޭގައި ހުއްދަ ނުދޭން އެދިއްޖެ
4 ފެބުރުއަރީ 2019 | ހޯމަ 06:41ސްޓެމް ސެލް ތެރަޕީއަކީ އޯޓިޒަމް ކުދިންގެ ފަރުވާއެއް ކަމަށް ކުރިއަރާފައިވާ ގައުމު ތަކުން ގަބޫލު ނުކުރޭ
ސްޓެމް ސެލް ތެރަޕީ- ބޯލްޑަރ ކޮލޮރާޑޯ
އޯޓިޒަމް ހުންނަ ކުދިންނަށް ދޭ ފަރުވާއެއް ކަމަށްވާ ސްޓެމް ސެލް ތެރަޕީއަކީ އަދި ރާއްޖޭގައި ހުއްދަ ދެވެން ނެތް ފަރުވާއެއް ކަމަށް ނިންމާ އެގޮތައް ކަނޑައެޅުމަށް ކަމާބެހޭ ފަރާތަކަށް ހުށައަޅާނެކަމަށް މޯލްޑިވްސް އޯޓިޒަމް އެސޯސިއޭޝަންއިން ބުނެފިއެވެ.
އޯޓިޒަމް އެސޯސިއޭޝަން އިން ހޯމަ ދުވަހު ނެރެފައިވާ ބަޔާނެއްގައި ބުނީ ސްޓެމް ސެލް ތެރަޕީއަކީ އޯޓިޒަމް ހުންނަ ކުދިންނަށް އޮތް ފަރުވާއެއް ކަމަށް ތަރައްގީވެފައިވާ ގައުމުތަކުގައިވެސް ގަބޫލު ނުކުރާ ކަމަށާއި އެ ތެރަޕީ އިން އޯޓިޒަމް ކުދިންނަނަށް ފަރުވާއެއް ލިބޭނެ ކަމަށް ޔަގީންކުރެވޭ ދަރަޖައަށް ދިރާސާތަކުން ދައްކާނަމަ ދުނިޔޭގެ ނަން މަޝްހޫރު ކްލިނިކަލް ގައިޑްލައިންތަކުގައިވެސް ފަރުވާއެއްގެ ގޮތުގައި އެ ފަރުވާ އޮންނާނެ ކަމަށެވެ.
އަދި އެމެރިކާގެ ފުޑް އެންޑް ޑްރަގް އޮތޯރިޓީއިންވެސް އެ ފަރުވާ ބަލައިގެންފައި ނުވާކަމަށް އެ އެސޯސިއޭޝަނުގެ ބަޔާނުގައި ބުނެފައި ވެއެވެ.
"އެހެން ކަމުން އަވައްޓެރި ގައުމެއްގެ ބަޔަކު ހިންގާ ގޮތް ނޭނގޭ ތަހުލީލީ މަރުހަލާއެއްގައި އޮތް ފަރުވާއަކަށް، ނޭނގުމުގެ ތެރޭގައިވެސް ބެލެނިވެރިން އެމީހުންގެ ބެލެނިވެރިކަމުގެ ދަށުގައި ތިބި ކުޑަކުދިން ހުށަހަޅަމުންދާތީ، ރާއްޖޭގައިވެސް މިފަރުވާއަކީ ތިޔަބޭފުޅުންގެ ބެލެނިވެރިކަމުގެ ދަށުގައި ތިބި ކުޑަކުދިން ހުށަޙެޅުމަށް އަދި ހުއްދަ ދެވެން ނެތް ފަރުވާއެއްގެ ގޮތުގައި ކަނޑައަޅާ ދެއްވުމަށް އެދި ކަމާބެހޭ ފަރާތްތަކުގައި ދަންނަވަން ނިންމާފައިވާ ވާހަކަ މިސެންޓަރުން ފަރުވާ ހޯދާ ކުދިންގެ ބެލެނިވެރިންގެ ސަމާލުކަމަށްޓަކައި ދެންނެވީމެވެ." އެ އެސޯސިއޭޝަންގެ ބަޔާނުގައި ބުނެފައި ވެއެވެ.
ސްޓެމް ސެލް ތެރަޕީ ހެދުމަށް ބައެއް ދިވެހިން ވެސް ގެންދަނީ މަސައްކަތް ކުރަމުންނެވެ. އެ ފަރުވާގެ އަގު ބޮޑުކަމުން ފަންޑް ރެއިސިންގް ހަރަކާތްތަކެއްވެސް ބާއްވަމުން ދާކަން ފާހަގަ ކޮށްލެވެއެވެ.
