ގޮނޑި ގެއްލުނު ކަމަށް ކަނޑައެޅި 12 މެންބަރުންގެ ތެރެއިން ޖުމްހުރީ ޕާޓީއަށް ސޮއިކުރެއްވި މެމްބަރުންނަށް ޕާޓީގެ ޓިކެޓް ދިނުމަށް ނިންމާފައިވާކަމަށް އެ ޕާޓީން ބުނެފި އެވެ. 

ރާއްޖެ.އެމްވީއަށް މައުލޫމާތުދެއްވަމުން ޖުމްހޫރީ ޕާޓީގެ ތަރުޖަމާން އަލީ ސޯލިހު ވިދާޅުވީ މިދިޔަ އަހަރު ސްޕްރީމް ކޯޓުންނާއި، އިލެކްޝަންސް ކޮމިޝަނުން މެމްބަރުކަމުގެ ގޮނޑި ގެއްލިފައިވާ ކަމަށް ކަނޑައެޅި 12 މެންބަރުންގެ ތެރެއިން ޖޭޕީއަށް ނިސްބަތްވާ އަދި އެ ޕާޓީގެ ޓިކެޓްގައި ރައްޔތުންގެ މަޖިލީހަށް ވާދަކުރެއްވުމަށް ޝައުގުވެރިކަން ފާޅުކުރައްވާފައިވާ މެނބަރުންނަށް ޕާޓީގެ ޓިކެޓް ދިނުމަށް ނިންމާފައިވާކަމަށެވެ. 

ގޮނޑި ގެއްލުނުކަމަށް ސްޕްރީމް ކޯޓުންނާއި އިލެކްޝަންސް ކޮމިޝަނުން ކަނޑައެޅި 12 މެމްބަރުންގެ ތެރޭގައި ހިމެނޭ ޖޭޕީގެ މެމްބަރުންނަކީ ދިއްދޫ ދާއިރާގެ މެމްބަރު އަބްދުއްލަތީފް މުހައްމަދު، ހަނިމާދޫ ދާއިރާގެ މެންބަރު ހުސެން ޝަހުދީ، މަޑުއްވަރީ ދާއިރާގެ މެމްބަރު މުހައްމަދު އަމީތު އަހުމަދު މަނިކު، ދަނގެތީ ދާއިރާގެ މެމްބަރު އިލްހާމް އަހުމަދު، ތިނަދޫ ދެކުނު ދާއިރާގެ މެމްބަރު އަބްދުﷲ އަހުމަދު އަދި ފުވައްމުލަކު އުތުރު ދާއިރާގެ މެމްބަރު އަލީ ޝާހް އެވެ.

އަންނަ އެޕްރީލް މަހުގެ 6 ގައި ބާއްވާ ރައްޔިތުންގެ މަޖިލީހުގެ އިންތިޚާބުގައި ޖޭޕީގެ ޓިކެޓްގައި ވާދަކުރެއްވުމުގެ ޝައުގެވެރިކަން 97 ފަރާތަކުން ފާޅުކޮށްފައިވާކަން ފާހަގަކުރައްވާ އަލީ ސޯލިހު ވިދާޅުވީ މިހާރު އެ ފަރަތްތަކާ އިންޓަވިއުކޮށް އެކަމުގެ އިދާރީ މަސައްކަތްތައް ކުރިއަށްދާ ކަމަށެވެ.  

އިދާރީ މަސައްކަތް ނިންމުމަށްފަހު އެކުލަވާލާ ރިޕޯޓް ފަސް މެންބަރުންގެ މައްޗަށް އެކުލެވޭ ކޮމެޓީއަކަށް ހުށައަޅަންޖެހޭ ކަމަށާއި ކޮމެޓީގެ މަޝްވަރާއަށް ފަހު އެޕާޓީގެ ޓިކެޓް ހަވާލުކުރާނެ ކެންޑިޑޭޓުން ކަނޑަ އަޅާނީ ޕްރައިމަރީއަކުންތޯ ނުވަތަ އެނޫން ގޮތަކަށްތޯ ކަނޑައެޅިގެންދާނެ ކަމަށް އޭނާ ވިދާޅުވިއެވެ. އަލީ ސޯލިހު ވިދާޅުވީ ޕާޓީގެ އަސާސީ ގަވާއިދުގައި އިންތީޚަބުގެ ކަންކަން ވަރަށް ރަނގަޅަށް ކަނަޑައެޅިފައިވާކަމަށާއި ހުރިހާ ކަމެއްވެސް ކުރިއަށްދާނީ ޕާޓީގެ ގަވާއިދާ އެއްގޮތަށް ކަމަށެވެ.

މަޖިލިސް އިންތިޚާބުގައި ވާދަކުރުމަށް އެ ޕާޓީން ޓިކެޓް ދޭނީ އެ ކޮމެޓީގެ މަޝްވަރާއާ އެކު ޖެނުއަރީ މަހުގެ 25 ގެ ކުރިން އެކަމަށް އެދި ކުރިމަތިލާ މީހުންގެ ތެރެއިން ކަމަށް އެ ޕާޓީން ކުރިން ބުނެފައިވެއެވެ.

ޖޭޕީން މަޖިލީހުގެ ޝައުގުވެރިކަން ހުރި ދާއިރާއަށް ވާދަ ކުރުމަށް އެ ޕާޓީގެ މެމްބަރުންނަށް ހުޅުވާލާފައިވަނީ މަޖިލީހުގެ 86 ގޮނޑިއަށް ވާދަ ކުރުމަށް އެމްޑީޕީގެ މެމްބަރުން އެ ޕާޓީއަށް ފޯމު ހުށަހަޅާފައި ވަނިކޮންނެވެ.

މީގެ އިތުރުން ކުރިއަށް އޮތް ރައްޔިތުންގެ މަޖިލީހުގެ އިންތިޚާބުގައި ރައީސް މައުމޫނުގެ ރިފޯމް މޫވްމަންޓް (އެމްއާރުއެމް)ގެ ޓިކެޓްގައި ވާދަކުރުމަށް މިހާތަނަށް 108 ފަރާތަކުން ޝައުގުވެރިކަން ފާޅުކޮށްފައިވާ ކަމަށް އެ ޕާޓީގެ ނައިބު ރައީސާ އާމިނަތު ނާދިރާ ވިދާޅުވެފައިވެއެވެ. އޭގެ ތެރެއިން 89 ފަރާތަކާ އިންޓަވިއުކޮށް ނިމިފައިވާ ކަމަށާއި ބާކީ ތިބި ފަރާތްތަކާ ވެސް އިންޓަވިއު ކުރުމުގެ މަސައްކަތް ކުރިއަށްދާކަމަށް ނާދިރާ ވިދާޅުވިއެވެ.

ނާދިރާ ވިދާޅުވީ އެމްއާރުއެމްގެ ޓިކެޓްގައި ވާދަކުރަނީ 3 އަންހެން ކަނބަލުން ކަމަށާއި މިއީ ނިސްބަތުން މަދު އަދަދެއް ކަމަށެވެ.

އެމްއާރުއެމްގެ ޓިކެޓްގައި މަޖިލީހުގެ 17 ދާއިރާއަކަށް ވާދަކުރުމުގެ ފުރުސަތު ލިބިފައިވާއިރު 4 ލީޑަރުންގެ މަޝްވަރައާ އެކު ވާދަކުރާނީ ކޮން ދާއިރާތަކަކަށް ކަން އެނގިގެންދާނެ ކަމަށް ވެސް ނާދިރާ ވިދާޅުވިއެވެ.