ޖުމްހޫރީ ޕާޓީގެ ދިދަ ބަދަލުކުރަން އަންގައިފި
13 މާރިޗު 2017 | ހޯމަ 00:58ދިދަ ބަދަލު ކުރުމުގެ ވިސްނުމެއް ނެތް
ޖުމްހޫރީ ޕާޓީގެ ހަރަކާތެއްގެ ތެރެއިން: އެޕާޓީގެ ދިދަ ބަދަލު ކުރަން ވަނީ އަންގާފައި
ޖުމްހޫރީ ޕާޓީގެ ދިދަ ބަދަލުކުރަން އިލެކްޝަންސް ކޮމިޝަނުން އަންގާފައިވާ ކަމަށް އެ ޕާޓީން ބުނެފިއެވެ.
ރާއްޖެ އެމްވީއަށް އެޕާޓީން ވަނީ އެކަން ކަށަވަރުކޮށްދީފައެވެ.
ރާއްޖެ އެމްވީއަށް މައުލޫމާތު ދެއްވަމުން ޖުމްހޫރީ ޕާޓީގެ ސެކްރެޓަރީ ޖެނެރަލް އަހުމަދު ސަމީރު ވިދާޅުވީ އެޕާޓީގެ ދިދަ މިއަހަރުގެ ޖޫން މަހުގެ އެއްވަނަ ދުވަހުން ފެށިގެން ބަދަލު ކުރުމަށް އިލެކްޝަންސް ކޮމިޝަނުން އެޕާޓީއަށް އަންގާފައިވާ ކަމަށާއި އެ އެންގުން އެންގީ ގާނޫނީ އެއްވެސް ބާރެއް އޮވެގެން ނޫން ކަމަށެވެ.
ސަމީރު ވިދާޅުވީ އެޕާޓީގެ ދިދަ ބަދަލު ކުރަން އެންގިއިރު މިހާރު ހުންނެވި ރައީސުލް ޖުމްހޫރިއްޔާވެސް އެމަޤާމަށް ހޮވިވަޑައިގެންނެވީ ސަރުކާރު ކޯލިޝަންގެ ތެރެއިން އެދިދަ ބޭނުން ކުރަމުން އައި ޖުމްހޫރީ ޕާޓީގެ އެހީތެރިކަމާއެކުގައި ކަމަށާއި އޭގެ ކުރީގެ ހުރިހާ ސަރުކާރު ތަކުންވެސް އެދިދަ ޤަބޫލު ކޮށްފައިވާ ކަމަށެވެ. އަދި އެދިދައަކީ ސިޔާސީ ޕާޓީތަކުގެ ގަވާއިދުގެ ދަށުން ޕާޓީ ރަޖިސްޓްރީކުރިއިރު ސަރުކާރުގެ ކަމާ ބެހޭ އިދާރާގައި ރަޖިސްޓްރީކޮށްފައިވާ ދިދައެއް ކަމަށްވެސް ސަމީރު ވިދާޅުވިއެވެ.
ސަމީރު ވިދާޅުވީ އެދިދަ ބަދަލު ކުރަން އެންގި ސަބަބެއް ހޯދަން އިލެކްޝަންސް ކޮމިޝަނާއެކު ބައްދަލުވުންތަކެއް ބާއްވާފައިވާ ކަމަށާއި ނަމަވެސް ދިދަ ބަދލުކުރަން ޖެހޭ ޤާނޫނީ އެއްވެސް ހުއްޖަތެއް ކޮމިޝަނަށް ދެއްކިފައި ނުވާ ކަމަށެވެ.
ސަމީރު ވިދާޅުވީ އެޕާޓީގެ ޤައުމީ ހިންގާ ކޮމެޓީގައި އެކަމާ ގުޅޭ ގޮތުން މަޝްވަރާ ކުރެވިފައިވާ ކަމަށާއި އެކޮމެޓީގެ މެންބަރުން ޚިޔާލު ދެއްވާފައި ވަނީ ދިދަ ބަދަލު ކުރަން ނުޖެހޭނެ ކަމަށް ކަމަށެވެ. ނަމަވެސް ގޮތެއް ނިންމާނީ އަދިވެސް އިތުރަށް އެކޮމެޓީގެ ބައްދަލުވުން ބޭއްވުމަށް ފަހުކަމަށްވެސް ސަމީރު ވިދާޅުވިއެވެ.
ސަމީރު ވިދާޅުވީ އިލެކްޝަންސް ކޮމިޝަނަށް އެގޮތައް އެންގޭނެ ކަމަށް އެއްވެސް ޤާނޫނަކުން ބާރެއް ނުލިބޭ ކަމަށާއި އެހެންކަމުން އެއެންގުމާ އެއްގޮތައް ޢަމަލު ކުރުމުގެ ވިސްނުމެއް އެޕާޓީގެ ނެތްކަމަށެވެ.
މީގެ އިތުރުން އެދިދައަކީ މީގެ 9 ވަރަކަށް އަހަރު ކުރިން އެޕާޓީގެ ކޮންގރެސްއިން ފާސްކޮށްފައިވާ ދިދައެއް ކަމަށާއި ދެންވެސް އެފަދަ ބަދަލެއް ގެނެޔަސް ގެނެވޭނީ ކޮންގްރެސް ބައްދަލުވުމަކުން އެގޮތައް ނިންމައިގެން ކަމަށެވެ.
