އީސީގެ މެމްބަރު ހަބީބު މިނިވަން މުއައްސަސާތަކާ ބެހޭ ކޮމިޓީއަށް ހާޒިރުކުރަނީ!
23 ޖެނުއަރީ 2019 | ބުދަ 12:46އީސީގެ މެމްބަރުން ކޮމިޓީއަށް ހާޒިރުކުރަނީ ކޮންގްރެސް ޕާޓީ އީސީގެ ދަފްތަރުގައި ރެޖިސްޓްރީކޮށް ދިނުމުގައި ތަފާތުތަކެއް ގެންގުޅޭ ކަމަށް ބުނެ
ކޮންގްރެސް ޕާޓީން ރެޖިސްޓްރީ ކުރުމުގައި އީސީން ތަފާތު ތަކެއް ގެންގުޅޭ ކަމަށް އެ ޕާޓީން ވަނީ ބުނެފައި
އިލެކްޝަންސް ކޮމިޝަން(އީސީ) ގެ މެމްބަރު އިސްމާއިލް ހަބީބް ރައްޔިތުންގެ މަޖިލީހުގެ މިނިވަން މުއައްސަސާތަކާއި ބެހޭ ކޮމިޓީއަށް ހާޒިކުރާނެ ކަމަށް ޕީޕަލްސް ނެޝަނަލް ކޮންގްރެސް(ޕީއެންސީ) އުފެއްދެވުމުގައި އިސްކޮށް ހުންނަވާ ފޮނަދޫ ދާއިރާގެ މެމްބަރު އަބްދުއްރަހީމް އަބްދުﷲ ވިދާޅުވެއްޖެއެވެ.
އަބްދުއްރަހީމް ވިދާޅުވީ ހަބީބު ރައްޔިތުންގެ މަޖިލީހުގެ މިނިވަން މުއައްސަސާތަކާ ބެހޭ ކޮމިޓީއަށް ހާޒިރުކުރަން ނިންމާފައި ވަނީ، ކޮންގްރެސް ޕާޓީ އީސީގެ ދަފްތަރުގައި ރެޖިސްޓްރީނުކޮށް ލަސްކުރަމުންދަނީ އެ ޕާޓީއާ ދޭތެރޭ "ޒާތީ" ވެގެން ކަމަށް ވިދާޅުވެފައިވާތީ ކަމަށެވެ.
އަބްދުއްރަހީމް ވިދާޅުވީ ހަބީބްގެ އިތުރުން އީސީގެ އަނެއް ހަތަރު މެމްބަރުން ވެސް މިނިވަން މުއައްސަސާތަކާ ބެހޭ ކޮމިޓީއަށް ހާޒިރުކުރާނެ ކަމަށެވެ. ހަބީބް ފިޔަވައި އީސީގައި ހިމެނިވަޑައިގަންނަވާ އަނެއް ހަތަރު މެމްބަރުންނަކީ އަހުމަދު އަކްރަމާއި، އަލީ ނަޝާތު، އަމްޖަދު މުސްތަފާ އަދި ކޮމިޝަނުގެ ރައީސް އަހްމަދު ޝަރީފްއެވެ.
އަބްދުއްރަހީމްގެ މި ތުހުމަތު ހަބީބު ވަނީ ދޮގުކުރައްވާފައެވެ.
އަބްދުއްރަހީމްގެ ތުހުމަތު ހަބީބް ދޮގުކުރެއްވުމާ ގުޅިގެން އޭނާ އަށް ރައްދުދެއްވަމުން އަބްދުއްރަހީމް ވިދާޅުވީ ހަބީބް އަށް އެ ވާހަކަތަށް ދޮގު ނުކުރެއްވޭނެ ކަމަށާއި، ހަބީބް އެހެން ވިދާޅުވި ކަމުގެ ހެކި އޭނާ އަތުގައި އެބަހުރި ކަމަށެވެ.
"ހަބީބް މާދަމާ ނޫން އަނެއް ދުވަހު މިނިވަން މުއައްސަސާތަކާ ބެހޭ ކޮމިޓީއަށް ހާޒިރުކުރުމުން އެހެން ނުދެންނެވޭނެ. ހަބީބް މިވެނި މީހަކާއި، މިވެނި ގަނޑިއެއްގައި ވާހަކަދެއްކީ، އެ ފެންވަރަށް ހެކި ހުރެގެން މިހެން މި ދަންނަވަނީ،" އަބްދުއްރަހީމް ވަނީ ވިދާޅުވެފައެވެ.
ކޮންގްރެސް ޕާޓީ އެ ކޮމިޝަނުގެ ދަފްތަރުގައި ރެޖިސްޓްރީ ނުކޮށް އީސީން ލަސްކުރަމުންދަނީ ރައީސް ޔާމީންގެ ފަރާތުން 19 ވަނަ ރައްޔިތުންގެ މަޖިލީހުގެ ވާދަކުރައްވަން ބޭނުންފުޅުވާ މެމްބަރުންނަށް، އެ ފުރުސަތު ގެއްލުވާލަން ކަމަށް އަބްދުއްރަހީމް ވަނީ ތުހުމަތުކުރައްވާފައެވެ.
