ޕީއެންސީ ރަޖިސްޓްރީކުރުމަށް ޕީޕީއެމްގެ މެމްބަރަކަށް ވުމަށް އެދޭ ފޯމު ހުށައެޅި: އީސީ
23 ޖެނުއަރީ 2019 | ބުދަ 09:35ޕީއެންސީ ރަޖިސްޓްރީކުރުމުގެ ހުއްދަ ދީފައިވަނީ ޑިސެމްބަރ 27 ގައި
ޕީއެންސީ ރަޖިސްޓްރީކުރުމަށް ހުށައެޅުއްވި ޕީޕީއެމްގެ އަބްދުއްރަހީމް(ވ) އަދި އެޕާޓީގެ މެމްބަރު ސައީދު
ޕީޕީއެމް ގެއްލިދާނެތީ އުފައްދާ ޕާޓީ ޕީޕަލްސް ނެޝެނަލް ކޮންގްރެސް (ޕީއެންސީ) ރަޖިސްޓްރީކުރުމަށް ޕީޕީއެމްގެ މެމްބަރަކަށް ވުމަށް އެދޭ ފޯމު ހުށައެޅި ކަމަށް އިލެކްޝަންސް ކަމިޝަންގެ މެމްބަރު އިސްމާއިލް ހަބީބު ވިދާޅުވެއްޖެއެވެ.
ހަބީބު ވިދާޅުވީ ޕީއެންސީން މިހާތަނަށް އެކަމިޝަނަށް ހުށައެޅި ފޯމުތަކުގެ ތެރޭގައި ޕީޕީއެމްގެ މެމްބަރަކަށް ވުމަށް އެދޭ ފޯމު ހުށައަޅާފައިވާ ކަމަށެވެ.
އެގޮތުން ޕީއެންސީ ރަޖިސްޓްރީކުރުމަށް ހުށައެޅުއްވި ޕީޕީއެމްގެ ރައްޔިތުންގެ މަޖިލީހުގެ ފޮނަދޫ ދައިރާގެ މެމްބަރު އަބްދުއްރަހީމް އަބްދުއްﷲ ވެސް ވަނީ އެކަމަށް އެއްބަސްވެ ވަޑައިގެންފައެވެ.
ޕީޕީއެމުން ބޭއްވި ނޫސްވެރިންގެ ބައްދަލުވުމެއްގައި އަބްދުއްރަހީމް ވިދާޅުވީ "އަޅުގަނޑުމެން އެކަމާ ދެކޮޅެއް ނަހަދަން. އެބޭފުޅުން ވިދާޅުވެފައި އެބަވޭ ޕީޕީއެމްގެ ތިން ފޯމު އޮތްކަމަށް." ކަމަށެވެ.
ޕީއެންސީ ރަޖިސްޓްރީ ކުރުވިޔަނުދޭން އީސީގެ މެމްބަރުން ފިއްތުންތައް ކުރިމަތި ކުރުވާކަމަށް އަބްދުއްރަހީމް ވިދާޅުވިއެވެ. ނަމަވެސް އީސީން ބުނީ ހުށަހެޅި ފޯމްތަކުގައި ގިނަ މައްސަލަތަކެއް ހުރި ކަމަށާއި، އޭގެ ތެރޭގައި ފިންގަޕްރިންޓް ދިމާނުވުމާއި ތާރީހްތައް ދިމާނުވުން ފަދަ މައްސަލަތައް ހިމެނޭ ކަމަށެވެ.
"އަޅުގަނޑުމެން ފުރަތަމަ ހުށަހެޅި 4000 ފޯމްގެ ތެރެއިން 1945 ފޯމް ވެރިފައި ކޮށްފައި ވިދާޅުވީ 1100 ހާ ފޯމް ގެންނަވާށޭ ޖެހިގެން އަންނަ ދުވަހު ރަޖިސްޓްރީ ކޮށްދޭނެ ކަމަށް. އެހެން ނަމަވެސް މިއަދު މި ބުނީ އޭގެން ސައްހަވީ 300 ވަރަކަށް ފޯމޭ" އޭނާ ވިދާޅުވިއެވެ.
ޕީއެންސީއިން އީސީއަށް ހުށައެޅި 5،100 ފޯމުގެ ތެރެއިން 2،300 ވަރަކަށް ފޯމު ސައްހަ ވުމުން، ޕީއެންސީ ރަޖިސްޓްރީވުމަށް 700 އަށްވުރެ ގިނަ ސައްހަ ފޯމު މަދުވެގެން ބޭނުންވާނެއެވެ.
