ކުރީގެ ރައީސް އަބްދުﷲ ޔާމީން އިސްކޮށް ހުންނަވައިގެން އުފައްދަވަން މަސައްކަތްކުރައްވަމުން ގެންދަވާ ސިޔާސީ ޕާޓީ، ޕީޕަލްސް ނެޝަނަލް ކޮންގްރެސް (ޕީއެންސީ) ރަޖިސްޓްރީ ކުރުން ލަސް ވަނީ ސައްހަ ފޯމު ހުށަނާޅާތީ ކަމަށް އިލެކްޝަންސް ކަމިޝަނުން ބުނެފިއެވެ.
އީސީގެ މެމްބަރު އަހުމަދު އަކްރަމް ވިދާޅުވީ އެ ކޮމިޝަނުން ގަބޫލުކުރާ ގޮތުގައި ޕާޓީ ރަޖިސްޓްރީކުރަން ހުށައަޅާ ފޯމުގައި ސައްހަކަން ކަށަވަރު ކުރުމަކީ ޕާޓީ އުފައްދަން ހުރަސްއެޅުން ނޫން ކަމަށެވެ.
ޕީޕީއެމް ގެއްލިދާނެކަމުގެ ބިރަށްޓަކައި އުފައްދާ ޕީއެންސީއާ ބެހޭ ގޮތުން ޕީޕީއެމްގެ ޕާލަމެންޓަރީ ގްރޫޕްގެ ލީޑަރު އަހްމަދު ނިހާން ކުރެއްވި ޓްވީޓެއްގައި ވިދާޅުވީ "ޕީއެންސީގެ ހުއްދަ ލަސްކޮށް ޕީއެންސީގެ މެމްބަރުން ތާށިކޮށްފައިވާ" ކަމަށެވެ. އަދި ޕީއެންސީ އުފެއްދުމަށް އީސީއިން އެޕާޓީއަށް ޖެއްސުން ކުރާ ކަމަށް ވިދާޅުވިއެވެ.
އަކްރަމް ވިދާޅުވީ ޕީއެންސީ އިން ޕާޓީ ހަދަން ހުށައެޅީ 4000 ފޯމު ކަމަށާއި ޕާޓީ އުފެއްދުމަށް ބޭނުންވާ އަދަދު ހަމަ ނުވާތީ އިތުރު ފޯމު ހުށައެޅުމަށް އެކަމުގައި އިސްކޮށް އުޅުއްވާ ޕީޕީއެމްގެ ނައިބު ރައީސް އަބްދުއްރަހީމާ ބައްދަލުކުރައްވައި އެދިފައިވާނެ ކަމަށެވެ. އަދި އިތުރު 1100 ފޯމު ޕީއެންސީގެ ފަރާތުން އަލުން ހުށައަޅާފައިވާ ކަމަށް ވިދާޅުވިއެވެ. އާ ފޯމުތަކެއް ހުށަހެޅުމުން އެކަން ބަލަމުން އަންނަ ކަމަށް ވެސް އޭނާ ވިދާޅުވިއެވެ.
"ކަމިޝަނުން ގަބޫލުކުރާ ގޮތުގައި ސައްހަކަން ކަށަވަރު ކުރުމަކީ ހުރަސް އެޅުމެއް ނޫން. ޕީއެންސީއަށް ވެސް އެ ފުރުސަތު އޮންނާނެ. ވީ އެންމެ އަވަހަކަށް ޕީއެންސީ އިން އަލަށް ހުށައެޅި ފޯމު ސައްހަ ނަމަ އެޕާޓީ އުފެއްދުމަށް ހުއްދަ ދޭނަން،" އަކްރަމް ވިދާޅުވިއެވެ.
ޕީއެންސީ އިން ހުށައެޅި 1100 ފޯމު ސައްހަ ނޫން ނަމަ އަލުން އެ ފުރުސަތު އީސީ އިން އަނެއްކާ ވެސް އެ ޕާޓީއަށް ދޭނެއެވެ. އަކްރަމް ވިދާޅުވީ ސިޔާސީ ޕާޓީ އުފެއްދުމުގެ ފުރުސަތު ކޮންމެ ބަޔަކަށް ވެސް އޮންނާނެ ކަމަށެވެ. އީސީ އިން އަބަދު ވެސް މަސައްކަތް ކުރާނީ ގާނޫނީ އިމުގެ ތެރެއިން ކަމަށް އޭނާ ވިދާޅުވިއެވެ.
އަކްރަމް ވިދާޅުވީ ޕީއެންސީއަށް ހުށައެޅި ފޯމްތައް ވެރިފައި ކުރުމުގެ މަސައްކަތް އެ ކަމިޝަނުން ފަށާފައިވާ ކަމަށެވެ. ކުރިން ހުށަހެޅި ފޯމްތަކުގައި ގިނަ މައްސަލަތަކެއް ހުރި ކަމަށާއި އޭގެ ތެރޭގައި ފިންގަޕްރިންޓް ދިމާނުވުމާއި ތާރީހްތައް ދިމާނުވުން ފަދަ މައްސަލަތައް ހިމެނޭ ކަމަށް އަކްރަމް ވިދާޅުވިއެވެ.
އެއްވެސް މީހެއްގެ ނުރުހުމުގައި ސޮއިކުރުވާފައި ނުވާނެ ކަމަށް އެ ޕާޓީ އުފެއްދުމަށް އިސްކޮށް އުޅުއްވާ ރައްޔިތުންގެ މަޖިލީހުގެ ފޮނަދޫ ދައިރާގެ މެމްބަރު އަބްދުއްﷲ އަބްދުއްރަހީމް ވަނީ ވިދާޅުވެފައެވެ.
