އަފްޣާނިސްތާނުގެ ސިފައިންގެ އިންޓެލިޖެންސް ބޭސްއަކަށް ހަމަލާދީ 40 އަށްވުރެ ގިނަ މީހުން މަރާލައިފި
ބައެއް ރިޕޯޓްތައް ބުނާގޮތުން މަރުވި މީހުންގެ އަދަދު 100 އަށްވުރެ އިތުރު
ބަޑީގެ ހަމަލާދިނުމުގެ ކުރިން ބޮމުގެ ހަމަލާ ދީ ކަމްޕައުންޑަށް ވަންނާނެ މަގުވަނީ ހަދާފައި
އަފްޣާނިސްތާނުގެ އަސްކަރިއްޔާގެ އިންޓެލިޖެންސް މަރުކަޒަކަށް ތާލިބާނުން ދިން ހަމަލާއެއްގައި 40 އަށްވުރެ ގިނަ މީހުން މަރާލައި 50 އަށްވުރެ ގިނަ މީހުން ޒަޚަމްވެފައިވާކަމަށް އެ ގަައުމުގެ އިންޓެލިޖެންސް އިދާރާއިން ބުނެފިއެވެ.
ހޯމަ ދުވަހު ދިން ހަމަލާގައި މަރުވި މީހުންގެ އަދަދު 43އަށް އަރާ ކަމަށާއި 54 މީހުން ޒަޚަމްވެފައިވާކަމަށް އިންޓެލިޖެންސް އިދާރާއިން ބީީބީސީގައި ބުނެފައިވެއެވެ.
ބަޑީގެ ހަމަލާތަކުގެ ކުރިން ހަނގުރާމަވެރިންވަނީ ބޭސްއަށްދިއުމަށް މަގުހެދުމަށް ކާރު ބޮމެއް ގޮއްވާލާފައެވެ.
ބައެއް ރިޕޯޓްތައް ބުނާގޮތުން މަރުވި މީހުންގެ އަދަދު 100 އަށްވުރެ އިތުރެވެ.
މި ހަމަލާއަކީ އެ ގައުމުގެ އިންޓެލިޖެންސް އޮފިޝަލުންނަށް އަމާޒުކޮށް ދެވުނު މިފަދަ އެންމެ ނުރައްކާތެރި އެއް ހަމަލާއެެވެ.
ވަރްދަކް ޕްރޮވިންސްގައި ގާއިމްކޮށްފައިވާ ނޭޝަނަލް ޑައިރެކްޓަރޭޓް ފޮރ ސެކިއުރިޓީ(އެންޑީއެސް)ގެ ބޭސްއަށް ދިން މި ހަމަލާ އައިސްފައިވަނީ އެމެރިކާގެ ޑިޕްލޮމޭޓުންނާއި ތާލިބާނުންނާއެކު ކުރިޔަށް ގެންދާ ސުލްހައިގެ ވާހަކަތަކުގެ ބުރެއް ޤަތަރުގައި ބޭއްވިތާ ގަޑިއުރުތަކެއްގެ ތެރޭގައެވެ.
