އެމެރިކާ އަސްކަރިއްޔާގެ 1000 ސިފައިންގެ ފައުޖެއް، އިސްލާމިކް ސްޓޭޓް (އައިއެސް) އާއި ދެކޮޅަށް ކުރާ ހަނގުރާމައިގައި ކުވައިތަށް، ރިޒާވް ފޯސްއެއްގެ ގޮތުގައި ފޮނުވުމަށް ވިސްނަމުންދާ ކަމަށް ރައީސް ޓްރަމްޕްގެ ސަރުކާރުން ބުނެފިއެވެ.

ކުވައިތަށް ރިޒާވް ފޯސްއެއް އެމެރިކާއިން ފޮނުވުމަށް ވިސްނަމުންދާކަން ހާމަކޮށްފައިވަނީ އެމެރިކާގެ އޮފިޝަލުންނާ ހަވާލާދީ ރޮއިޓާސްއިންނެވެ. އެމެރިކާ އަސްކަރިއްޔާއިން މަދަދުދީގެން ސީރިޔާ އަދި އިރާގުގައި އައިއެސްއާ ދެކޮޅަށް ހަނގުރާމަ ކުރަމުންދާ ފަރާތްތަކުން މިހާރު ވަނީ އައިއެސްއާ ދެކޮޅަށް ހިންގާ އޮޕަރޭޝަން ވަރުގަދަކޮށްފައެވެ.

ކުވައިތަށް އެމެރިކާގެ ރިޒާވް ފޯސްއެއް ފޮނުވުމަށް ތާއިދު ކުރާ ފަރާތްތަކުން ބުނަނީ އޭރުން ސީރިޔާ އަދި އިރާގުގައި ހަނގުރާމަ ކުރަމުންދާ ފަރާތްތަކަށް ދިމާވެދާނެ ނުރައްކާތެރި ހަމަލާތަކަށް، އަވަހަށް އެހީތެރިވާން ފުރުސަތު ލިބިގެން ދާނެކަމަށެވެ.

އެމެރިކާގެ އޮފިޝަލުންތަކެއް ކުވައިތަށް ރިޒާވް ފޯސްއެއް ފޮނުވުމަށް ވިސްނަމުންދާ ކަމަށް ބުނިނަމަވެސް، އެމެރިކާގެ ޑިފެންސް ސެކްރެޓަރީ ޖިމް މެޓިސްގެ ތާއިދު މިކަމަށް އޮތް ކަމެއް ނޭގެއެވެ. ޕެންޓަގަންގެ ސްޕޯކްސްމަން ޖެފް ޑޭވިސް، ކުވައިތަށް ރިޒާވް ފޯސް ފޮނުވުމާއި ބެހޭގޮތުން ސުވާލު ކުރީމައި ވަކި އެއްޗެއް ވިދާޅުނުވި ކަމަށް ރިޕޯޓުތައް ބުނެއެވެ.