ދިއްދޫ ކައުންސިލްގެ ރައީސްގެ މަގާމުން ހާޝިމް އިސްތިއުފާ ދެއްވައިފި
22 ޖެނުއަރީ 2019 | އަންގާރަ 07:29ހާޝިމް އިސްތިއުފާ ދެއްވާފައިވަނީ މިއަދު
އަލީ ހާޝިމް
ހއ.ދިއްދޫ ކައުންސިލްގެ ރައީސްގެ މަގާމުން އަލީ ހާޝިމް އިސްތިއުފާ ދެއްވައިފިއެވެ.
ހާޝިމް ދިއްދޫ ކައުންސިލްގެ ރައީސްގެ މަގާމުން އިސްތިއުފާ ދެއްވާފައިވަނީ ރައްޔިތުންގެ މަޖިލީހުގެ ކުރީގެ މެމްބަރު އިބްރާހިމް އިސްމާއިލް ދެއްކެވި ވާހަކަތަކާ ގުޅިގެން އޭނާ ދިފާއުކުރައްވައި ވާހަކަ ދައްކަވާފައި ވާތީ އޭނާގެ އިތުބާރު ނެތް ކަމުގެ ވޯޓު ނަގައި އޭނާ މަގާމުން ވަކިކުރަން ޕެޓިޝަނެއްގައި ސޮއިކުރަން ފަށާފައި ވަނިކޮށެވެ.
ހާޝިމް ރާއްޖެއެމްވީއަށް ވިދާޅުވީ އިސްތިއުފާ ދެއްވީ ރައްޔިތުންނަށް ތަކުލީފަކަށް އެކަންތައް ނުހެއްދެވުމަށް ކަމަށާއި ޑިމޮކްރަޓިކް އެންމެ ރީތި ގޮތަކީ އެއީ ކަމަށް ވާތީކަމަށެވެ.
"އިސްތިއުފާ ދިނީ އަޅުގަނޑާ ދެކޮޅަށް ޕެޓިޝަނެއްގައި ސޮއިކުރަން ފެށުމުން. އެކަން ތަކުލީފަކަށް ވުމަށް ނޭދޭތީ. އަދި ޑިމޮކްރަޓިކް އެންމެ ރީތި ގޮތަކީ އެއީ. މިހާތަނަށް އަޅުގަނޑު ކުރި މަސައްކަތަށް ރައްޔިތުން ދެއްވި އެއްބާރުލުމަށް ޝުކުރު އަދާކުރަން" ހާޝިމް ވިދާޅުވިއެވެ.
ހާޝިމާއި ދެކޮޅަށް ހުށައަޅަން ނިންމި ޕެޓިޝަންގައި ބުނެފައިވަނީ އިސްލާމް ދީނާއި ގުރުއާނާއި ރަސޫލާއަށް ފުރައްސާރަކޮށް ދައްކަމުންދާ ވާހަކަތަކަށް ހާޝިމް ފާޅުގައި ތާއީދު ކުރައްވަމުން ގެންދަވާ ކަމަށާއި އެފަދަ މީހުންގެ ދިފާއުގައި ހާޝިމް ވާހަކަ ދައްކައި އެއީ މޮޅު ބައެއް ކަމަށް ސިފަކުރާ ކަމަށެވެ. އެހެންކަމުން ހާޝިމް މަގާމުން ވަކިކުރުމަކީ ކައުންސިލްގައި ދެން ތިއްބެވި ހަތަރު މެމްބަރުންގެ ޒިންމާއެއްކަމަށް ވަނީ ބުނެފައެވެ.
"ދިއްދޫ ކައުންސިލްގެ ރައީސްކަން ކުރައްވާ ބޭފުޅަކު މިފަދަ ގޮތަކަށް އާއްމުންގެ ތެރޭގައި ފިތުނަވެރިކަން އުފެދޭނެ ވާހަކަތަކެއް ދައްކާފައިވާ ކަމީ އެއްވެސް ހާލަތެއްގައި ބަލައިގަނެވޭނެ ކަމެއް ނޫނެވެ. އަދި ރާއްޖޭގެ ބައެއް ނޫސްތަކުގައި ދިއްދޫ ކައުންސިލްގެ ރައީސް މި އިބާރާތް ބޭނުންކޮށް ޚަބަރު ޝާއިއު ކޮށްފައިވާ ކަމީ ދިއްދޫ ރައްޔިތުންނަށް ލިބިގެންދިޔަ ބޮޑު ލަދުވެތި ކަމެކެވެ" ޕެޓިޝަންގައި ވެއެވެ.
