ގއ. އަތޮޅު ކައުންސިލްގެ ރައީސް އަތޮޅުގެއިން ބޭރުކޮށްފި
އަތޮޅު ގެއިން ނެރެފައިވަނީ މިމަހުގެ 10ގައި
ގއ. އަތޮޅުގެ ހުންނަ ގއ. ވިލިނގިލި
ގއ. އަތޮޅު ކައުންސިލްގެ ރައީސް ހުސައިން އާދަމް އަތޮޅުގެއިން ބޭރުކޮށްލައިފި އެވެ.
ހުސައިން އާދަމް ވިދާޅުވީ ގއ. އަތޮޅު ގޭގައި އޭނާ ދިރިއުޅެނީ ދާންދޫ ދާއިރާއިން އިންތިހާބުވި އަތޮޅު ކައުންސިލްގެ މެމްބަރެއްގެ ހައިސިއްޔަތުން ރަށުން ބޭރުގައި ދިރިއުޅެން ޖެހިފައިވާތީ ކަމަށެވެ. އަދި އަތޮޅު ކައުންސިލް ހުންނަ ރަށް ކަމަށްވާ ގއ. ވިލިނގިލީގައި ރިއިއުޅޭއިރު އަތޮޅު ގެއަކީ މީގެ ކުރިން ވެސް އަދި މިހާރު ވެސް ބައެއް އަތޮޅު ކައުންސިލަރުން ދިރިއުޅޭތަން ކަމަށް ވާތީ ކަމަށް ވެސް ހުސައިން ވިދާޅުވި އެވެ.
ހުސައިން ވިދާޅުވީ އަތޮޅު ގޭގައި ދިރިއުޅެނީ ކައުންސިލްގެ ނިންމެއްގެ ދަށުން ކުލި ވެސް ދައްކައިގެން ކަމަށާއި ދިރިއުޅޭ ރަށް ނޫން އެހެން ރަށެއްގައި ދިރިއުޅޭ އަތޮޅު ކައުންސިލަރުން އާއްމުންގެ ގޭގޭގައި ދިރިއުޅުމަކީ ރަށުގެ ނުވަތަ އަތޮޅުގެ ކަންކަން ނިންމަން ތިބޭ ބައެއްގެ ހައިސިއްޔަތުން ނަޒާހަތްތެރިކަމާ މެދު ސުވާލު އުފައްދަފާނެ ކަމެއްކަން އޭނާ ފާހަގަކުރެއްވިއެވެ. އަދި ސެކިއުރިޓީ އާއި އެހެނިހެން ކަންކަމަށް ބަލާއިރު ވެސް އަތޮޅު ކައުންސިލަރުން ދިރިއުޅެން އެންމެ އެކަށޭނަ ތަނަކަށް އަތޮޅުތަކުގައި ހުންނާނީ އަތޮޅުގެ ކަމަށް ވެސް ހުސައިން ވިދާޅުވި އެވެ.
ހުސައިން ވިދާޅުވީ ރަށުން ބޭރު ކައުންސިލަރުން އަތޮޅު ގޭގައި ދިރިއުޅުނަސް އެރަށަށް ވަޑަގަންނަވާ ދައުލަތުގެ އިއްޒަތްތެރިންނަށް އެއްވެސް އުނދަގުލެއް ދަތިކަމެއް މެދުވެރި ނުވާނެ ކަމަށާއި އެރަށަށް ވަޑައިގަންނަވާ އިއްޒަތްތެރިންނަނާއި ދައުލަތުގެ އެކިއެކި ބޭނުންތަނަށް އަތޮޅުގެ މިހާރު ވެސް ބޭނުން ކުރަމުންދާ ކަމަށެވެ.
ހުސައިން ވިދާޅުވީ އޭނާ އަތޮޅުގެއިން ނެރެފައިވަނީ ފިނޭންސް މިނިސްޓްރީން އާއްމުކޮށްފައިވާ އުސޫލެއްގެ ދަށުން ކަމަށާއި އެ އުސޫލުގެ ދަށުން ދައުލަތުގެ އިއްޒަތްތެރިންނަށް އަތޮޅުގެ ބޭނުން ކުރެވޭއިރު އަތޮޅު ކައުންސިލަރުންނަށް ބޭނުން ނުކުރެވެންވީ ސަބަބެއް ނުވިސްނޭ ކަމަށެވެ.
ހުސައިން ވިދާޅުވީ ބައެއް އަތޮޅުތަކުގެ އަތޮޅުގެ ބައެއް އަތޮޅު ކައުންސިލަރުން މިހާރު ވެސް ބޭނުން ކުރަމުންދާ ކަމަށާއި ސަރުކާރުން ތަފާތު ކުރުން ގެންގުޅޭތީ ހިތާމަ ކުރާ ކަމަށެވެ.
އަތޮޅުގެއިން ހުސައިން ނެރެފައިވަނީ ހޯމް މިނިސްޓްރީން އަންގައިގެން ވިލިނގިލީގައި ހުންނަ ޕޮލިސް ސްޓޭޝަންގެ ފުލުހުން ގޮސް މިމަހުގެ 10 ވަނަ ދުވަހު އެވެ.
މިކަމާ ގުޅޭ ގޮތުން ލޯކަލް ގަވަރންމަންޓް އޮތޯރިޓީ (އެލްޖީއޭ)ގެ ބަހެއް ހޯދުމަށް އެ އޮތޯރިޓީގެ ސީއީއޯ މުހައްމަދު ޝަފީގު މަހުމޫދުއަށް ގުޅާލުމުން ފޯނަށް ޖަވާބު ދެއްވާފައިނުވާތީ އެލްޖީއޭގެ ބަހެއް ވަނީ ލިބޭގޮތް ނުވެފަ އެވެ.
