ރެއާލް މެޑްރިޑަށް ކުޅެމުން އަންނަ ފްރާންސްގެ ޑިފެންޑަރު ރަފައެލް ވަރާން ބޭނުންވަނީ ކެރިޔަރު އެއްކޮށް ރެއާލްގައި ހޭދަކުރަން ކަމަށް ރިޕޯޓްތައް ބުނެފިއެވެ.

ޑޮންބަލޮންއިން ބުނީ، ވަރާން ބޭނުންވަނީ ރެއާލްގައި މަޑުކުރަން ކަމަށާއި، ކެރިޔަރު ނިންމާލަންވެސް ބޭނުންވަނީ އެ ކްލަބާއެކުގައި ކަމަށެވެ.

ޑޮންބަލޮންއިން މިހެން ބުނެފައިވަނީ، ކުރިޔަށް އޮތް ޖެނުއަރީ ޓްރާންސްފާއާ އަމާޒުކޮށް ވަރާން ހޯދުމަށް ގިނަ ކްލަބްތަކުން މަސައްކަތް ކުރަމުން އަންނަ ދަނޑިވަޅެއްގައެވެ.

ރެއާލްއާއެކު ވަރާން ހަދާފައިވާ އެއްބަސްވުން މިދިޔަ އަހަރުގެ ސެޕްޓެމްބަރު މަހު އާކޮށްފައިވާއިރު، އާ އެއްބަސްވުމުގެ މުއްދަތު ހަމަވާނީ 2022 ވަނަ އަހަރެވެ.

ފްރާންސްގެ ލެންސް އިން ސީނިއާ ފުޓުބޯޅަ ކެރިޔަރު ފެށި ވަރާން ރެއާލްއަށް ބަދަލުވީ 2011 ވަނަ އަހަރުގެ ސީޒަނުގައެވެ. އޭނާ ވަނީ މިހާތަނަށް ރެއާލްއަށް ކުޅުނު 252 މެޗުގައި 10 ލަނޑު ކާމިޔާބުކޮށްފައެވެ.

ވަރާން ވަނީ ރެއާލްއާއެކު ސްޕެނިޝް ލަލީގާ ދެފަހަރު، ކޮޕާޑެލްރޭ އެއްފަހަރު، ސްޕެނިޝް ސުޕާކަޕް ދެފަހަރު، ޔުއެފާ ޗެމްޕިއަންސް ލީގު ހަތަރު ފަހަރު، ޔުއެފާ ސުޕަކަޕް ތިންފަހަރު އަދި ފީފާ ކްލަބް ވޯލްޑްކަޕް ހަތަރު ފަހަރު ހޯދާފައެވެ.

ފްރާންސް ގައުމީ ޓީމަށް 2013 ވަނަ އަހަރުން ފެށިގެން ކުޅެމުން އަންނަ ވަރާން ވަނީ މިހާތަނަށް ގައުމީ ޓީމަށް 53 މެޗު ކުޅެ، ތިން ލަނޑު ކާމިޔާބުކޮށްފައެވެ.

ވަރާން ވަނީ މި އަހަރު ރަޝިއާގައި ނިމިގެންދިޔަ ފީފާ ވޯލްޑްކަޕް ފްރާންސަށް ކާމިޔާބުކޮށްދިނުމަށްވެސް މުހިންމު ދައުރެއް އަދާކޮށްފައެވެ.

މީގެއިތުރުން މި އަހަރު ފީފާ އިން މޮޅު ކުޅުންތެރިން ހިމަނައިގެން އެކުލަވާލި 11 ކުޅުންތެރިންގެ ލިސްޓުގައިވެސް ވަރާން ވަނީ ހިމެނިފައެވެ.