އަހަރެން ބޭނުންވަނީ ޗެލްސީގައި މަޑުކުރަން: ވިލިއަން
27 މެއި 2017 | ހޮނިހިރު 14:10ވިލިއަން ހޯދުމަށް މެންޗެސްޓާ ޔުނައިޓެޑުން ވަނީ ޝައުގުވެރިކަން ފާޅުކޮށްފަ
ޗެލްސީއަށް ކުޅޭ ބްރެޒިލްގެ ދެ ތަރިން
ބޭނުން ވަނީ ޗެލަސީގައި މަޑުކުރަން ކަމަށާއި، ޓްރާންސްފާގައި ހުށަހެޅުމެއް ލިބުނު ކަމުގައު ވިޔަސް ރިޖެކްޓްކޮށްލާނެ ކަމަށް ޗެލްސީއަށް ކުޅެމުން އަންނަ ބްރެޒިލްގެ ފޯވާޑް ވިލިއަން ބުނެފިއެވެ.
އެފްއޭ ކަޕުގެ ފައިނަލުގައި އާސެނަލްއާ ދެކޮޅަށް ނިކުންނަ މެޗުގެ ކުރިން ނޫސްވެރިންނާ ވާހަކަ ދައްކަމުން ވިލިއަން ބުނީ، އޭނާ ޗެލްސީގައި ހުރީ އުފަލުން ކަމަށާއި، ޗެލްސީގެ މެނޭޖްމަންޓާއި، ކުޅުންތެރިންނާއި އަދި ސަޕޯޓަރުންނާ ދެމެދު ވަރަށް ގާތް ގުޅުމެއް އޮންނަ ކަމަށެވެ. އަދި، އޭނާ ޗެލްސީގައި ހަދާފައިވާ އެއްބަސްވުން ހަމަވާނީ 2020 ވަނަ އަހަރުގައި ކަމުން އިތުރު ގޮތަކަށް ނުވިސްނާ ކަމަށް ވެސް އޭނާ ބުނެފައި ވެއެވެ.
އޭނާ ބުނެފައި ވަނީ، ޗެލްސީ މިއޮތީ އަލުން ޗެމްޕިއަންސް ލީގަށް ކޮލިފައި ވެފައި ކަމަށާއި، އެހެންކަމުން އަންނަ ސީޒނުގެ ޗެމްޕިއަންސް ލީގުގައި މޮޅު ކުޅުމެއް ދެއްކުމަށް އުންމީދު ކުރަމުން އަންނަ ކަމަށެވެ. އަދި ޗެލްސީއާ އެކު އަންނަ ސީޒަނުގައި ޗެމްޕިއަންސް ލީގު ކާމިޔާބުކުރުމަށް މަސައްކަތް ކުރަން ކެތްމަދުވެފައި ހުރި ކަމަށް ވެސް އޭނާ ވަނީ ބުނެފައެވެ. އޭނާ ބުނީ އަންނަ ސީޒަނުގައި ވެސް ލީގު ކާމިޔާބުކުރުމަށް މިހާރުއްސުރެ އަމާޒު ހިފާފައިވާ ކަމަށެވެ.
އިތުރަށް ވާހަކަ ދައްކަމުން ވިލިއަން ބުނީ، މިސީޒަން ދެ ތައްޓާއެކު ނިންމާލެވިއްޖެ ނަމަ އެއީ ލިބޭނެ ވަރަށް ބޮޑު ކާމިޔާބީއެއް ކަމަށާއި، އެހެންކަމުން ހޮނިހިރު ދުވަހުގެ ރޭ އާސެނަލްއާ ދެކޮޅަށް ކުޅޭ އެފްއޭކަޕް ފިނައިލް މެޗު ކާމިޔާބުކުރަން ކުރެވެން ހުރި ހުރިހާ މަސައްކަތެއް ކުރާނެ ކަމަށެވެ.
