ހަފްތާ ރެސް މާކެޓް ހުޅުވައިފި
ރަސްމީ ގޮތުން ހުޅުވައިދެއްވާނީ ރައީސް ސޯލިހު
ހަފްތާ ރެސް މާކެޓް ވަގުތީ ގޮތުން ހުޅުވާފައިވަނީ ހަވީރު
ޔޫތް މިނިސްޓްރީން އިންތިޒާމު ކޮށްގެން ބާއްވާ ''ހަފްތާ ރެސް'' މާކެޓް މިއަދު ހަވީރު ވަގުތީ ގޮތުން ހުޅުވައިފިއެވެ.
ޖުމްލަ 69 ސްޓޯލް ހިމެނޭ މި މާކެޓް ހުޅުވާފައިވާއިރު ރަސްމީކޮށް ހުޅުވާ ހަފްލާ އޮންނާނީ މިރޭ އަށް ގަޑި ތިރީހުގައި ކަމަށް ޔޫތް މިނިސްޓްރީ އިން މައުލޫމާތު ދެއެވެ.
މި މާކެޓް ރަސްމީ ގޮތުން އިފްތިތާހު ކޮށްދެއްވާނީ ރައީސުލް ޖުމްހޫރިއްޔާ އިބްރާހިމް މުހައްމަދު ސޯލިހުއެވެ.
ވަގުތީ ގޮތުން މި މާކެޓް ހުޅުވާފައިވާއިރު ގިނަ ބައެއްގެ ތަރުހީބު ލިބެމުންދާ ކަމަށް އެކަން އިންތިޒާމް ކުރި ފަރާތުން ބުނެއެވެ. އެގޮތުން ތިން ސްޓޯލް ފިޔަވާ ހުރިހާ ސްޓޯލެއް ވެސް ހުޅުވާފައިވާ ކަމަށް އެ ފަރާތުން ބުންޏެވެ. ބާކީ ހުރި ސްޓޯލްތައް ހުޅުވުން އޮންނާނީ މިރޭ އެވެ.
މީގެ އިތުރުން މުނިފޫހިފުލުވުމުގެ ހަރަކާތްތައް ވެސް މިރޭ ކުރިއަށް ދާނެއެވެ. ހަފްތާ ރެސްގެ މާކެޓް އޮންނާނީ ކޮންމެ ހަފްތާއަކު ހުކުރު އަދި ހޮނިހިރު ދުވަހު އެވެ. މި މާކެޓް ގައި ބޮޑަށް އިސްކަން ދެވޭނީ ވިޔަފާރީގެ ތެރެއަށް އަލަށް ވަންނަ ބޭނުންވާ ފަރާތްތަކަށް ކަމަށް މިނިސްޓްރީ އޮފް ޔޫތް އެންޑް އެމްޕަވާމަންޓް އަހުމަދު މަހްލޫފު ވަނީ ވިދާޅުވެފައެވެ.
